އިންޑޮނޭޝިއާ ފްލައިޓު ވެއްޓުނުއިރު ބޯޓުގެ ދެ އިންޖީނު ވެސް މަސައްކަތް ކުރޭ
ވެއްޓުނު އިންޑޮނޭޝިއާގެ ސްރީވިޖަޔާ އެއަރލައިންގެ ފްލައިޓު ،ވެއްޓި މޫދުގައި ޖެހުނުއިރު ވެސް، ބޯޓުގެ ދެ އިންޖީނު ވެސް މަސައްކަތް ކުރި ކަމަށް ފްލައިޓުގެ ކަޅު ފޮށްޓަކުން އެއްކުރި މައުލޫމާތުން ދައްކައިފިއެވެ.
ކަޅުފޮށި ފްލައިޓް ޑޭޓާ ރިކޯޑަރއަކީ، ފްލައިޓްގެ ދަަތުރު ކުރަމުން ދާއިރު، ކުރަމުންދާ ދަތުރާ ގުޅޭ ގޮތުން ރައްކާކުރަންޖެހޭ މުހިންމު އެތަކެއް މައުލޫމާތުތަކެއް ރައްކާ ކޮށްފައި ހުންނަ މުހިންމު ޑިވައިސްއެކެވެ.
ބޯޓުގެ އެއް ކަޅު ފޮށި މިހާތަނަށް ފެނިފައިވާއިރު، މި ލިބުނު އައު މައުލޫމާތާއެކު ބޯޓު ވެއްޓުނީ އިންޖީނު ފެއިލްވެގެން ކަމަށް ބެލެވޭނެ އެއްވެސް ޖާގައެއް ނެތް ކަމަށް ތަޖުރިބާކާރުން ބުނެއެވެ. އެއާއެކު ބޯޓު ވެއްޓެން މެދުވެރިވި ސަބަބާމެދު އަނެއްކާ ވެސް ވަނީ ސުވާލު އުފެދިފައެވެ.
ފުރަތަމަ ކަޅުފޮށީގެ މައުލޫމާތު ލިބިފައިވާއިރު، ތަހުގީގީ ޓީމުން ވަނީ ހުކުރު ދުވަހު ބޯޓުގެ ދެވަނަ ކަޅުފޮށި ހޯދާފައެވެ. އުތުރުން އޮންނަ ލަންކަންގް އަދި ލާކީ އައިލެންޑް ކަނޑުގެ ސަރަހައްދުން ހޯދި މި ކަޅުފޮށިން ތަހުގީގަށް ބޭނުންވާ މުހިންމު މައުލޫމާތު ތަކެއް ލިބިގެންދާނެއެވެ.
އިންޑޮނީޝިއާއިން ފުރިތާ މާ ގިނަ އިރުތަކެއް ނުވެ ގެއްލުނު ސްރީވިޖާޔާ އެއާގެ ފްލައިޓް "އެސްޖޭވައި 182"ހޯދުމުގެ މަސައްކަތް ކުރަމުން ދިޔައިރު ކަނޑުގެ ސަރަހައްދަކަށް ވެއްޓިފައި ވަނިކޮށް ފެނުމުން ރެސްކިޔު ޓީމްތަކުން ވަނީ ހަރަކާތްތެރިވެފައެވެ.
62 މީހުންނާއެކު ވެރިރަށް ޖަކާޓާއިން ފުރި ސްރިވިޖާޔާ އެއާގެ ފްލައިޓު ވެއްޓިފައިވާ ސަރަހައްދުގެ އަޑިއަށް ނޭވީގެ ޑައިވަރުން ފީނައިގެން ،ބޯޓުގެ ބައިތަކާއި އިންސާނުންގެ ހަށިގަނޑުގެ ބައިތައް ވަނީ ހޯދައި ނަގާފައެވެ.
