ދެއްވަދޫން އިތުރު 11 މީހުން ފައްސިވެއްޖެ
ގއ.ދެއްވަދޫއިން އިތުރު 11 މީހަކު ކޮވިޑަށް ފައްސި ވެއްޖެއެވެ. އެއާއެކު ދެއްވަދޫ ކްލަސްޓާގައި ފައްސިވި މީހުންގެ ޖުމްލަ އަދަދު ވަނީ 55 އަށް އަރާފައެވެ.
ދެއްވަދޫ ކައުންސިލުން ވިދާޅުވީ އެރަށުން އިތުރު 11 މީހަކު ފައްސި ވެފައިވާކަން ރޭ އެޗްޕީއޭ އިން އަންގާފައިވާ ކަމަށެވެ.
މި ކްލަސްޓާގައި އެންމެ ފަހުން ފައްސި ވެފައި ވަނީ ކުރިން ފައްސިވި ގއ. އަތޮޅު ތަޢުލީމީ މަރުކަޒުގައި ތަޢުލީމު ހާސިލު ކުރަމުން ދިޔަ ދާންދޫގެ ދަރިވަރާ ރޫމް ޝެއަރކުރާ އެސްކޫލްގެ ދަރިވަރެކެވެ.
އަދި ދާންދޫން ފައްސިވި މީހުންނާ ޑައިރެކްޓް ކޮންޓެކްޓުވި މީހަކު ހުޅުމާލޭގައި ހުރުމުން އޭނާގެ ސާމްޕަލް ނަގައި ޓެސްޓު ކުރިއިރު އޭނާ ވެސް ވަނީ ބައްޔަށް ފައްސިވެފައެވެ.
މިމަހުގެ ހަތް ވަނަ ދުވަހު ދެއްވަދޫން ކޮވިޑް-19 އަށް ފައްސިވި މީހަކާ ބައްދަލުވި އިތުރު ހަތް މީހަކު ކޮވިޑް-19 އަށް ފައްސިވުމުން އެރަށަށް އަރައި ފޭބުން މަނާ ކުރިއެވެ. ކޮވިޑަށް ފައްސި ހަތް ކޭސް ފެނުމާއެކު އެރަށް މޮނީޓަރިންގަށް ލެވި، ކޮންޓެކްޓް ޓްރޭސިންގ ހެދުމުގެ މަސައްކަތުގެ ތެރެއިން ރޭންޑަމް ސާމްޕަލް ވެސް ނަގަން ފެށުނެވެ.
މީގެ އިތުރުން ދެއްވަދޫން ލ. ފޮނަދޫއަށް ދިޔަ ދެ މީހަކު ވެސް ކޮވިޑަށް ފައްސިވުމުން ފޮނަދޫ އާއި ލ. ގަން ވެސް މޮނީޓަރިންގެ ހާލަތަށް ގެންދެވުނެވެ.
