ޚާއްސަ އެހީއަށް ބޭނުންވާ މީހާގެ ޕާކިންޒޯން، ޚާއްސައެއް ނޫން: ތަކްލީފްތައް އަސަރާއެކު އޭނާގެ ދުލުން!
ދާދި އިހަކަށް ދުވަހު މީސްމީޑިއާގައި ދައުރުވި ފޮޓޯއެކެވެ. ފޮޓޯގައި ފެނިގެން ދަނީ ޚާއްސައެހީއަށް ބޭނުންވާ ރައްޔިތެއް ކަމަށްވާ އަހުމަދު ފާއިޒަށް ހާއްސަކޮށްފައިވާ ޕާރކިން ޒޯނުގައި ޕާކް ކޮށްފައިވާ އޭނާގެ ސައިކަލު ނެރެވޭނެ ގޮތެއް ނެތުމުން އެތަނުގައި ގޮތް ހުސްވެފައި އިން މަންޒަރެވެ. ދިވެހިބަހުގެ އެކަޑަމީ ކުރިމަތީގައި ހަދާފައިވާ އެ ޕާރކިން ޒޯނުގައި އެވަގުތު ވެސް އާންމު ރައްޔިތުންގެ ދެ ސައިކަލެއް ޕާކު ކޮށްފައި ހުއްޓެވެ.
މިކަމާ ގުޅިގެން "ދެން" އިން ވަނީ ފާއިޒްއާ ވާހަކަދެކެވި، ކަން ދިމާވި ގޮތުގެ ފުރިހަމަ މައުލޫމާތުގެ އިތުރުން އެފަދަ ކަންކަމާ ގުޅިގެން ދިމާވާ ދަތިތަކާ ގުޅިގެން މައުލޫމާތު ސާފުކޮށްފައެވެ.
ރާއީސް ޔާމީންގެ ވެރިކަމުގައި ނުކުޅެދުންތެރިކަން ހުންނަ ފަރާތްތަކަށް ޕާކިން ޒޯން ތަކެއް ހެދުމުގެ މަސައްކަތުގެ ތެރޭގައި އެންމެ ފުރަތަމަ މިފަދަ ގޮތަކަށް ޒޯނެއް ތައްޔާރު ކުރެވުނު ފަރާތަކީ އަހުމަދު ފާއިޒް ކަމަށާއި، އަދި އެގޮތަށް އެންމެ ފުރަތަމަ ޒޯނެއް ތައްޔާރު ކުރެވުނީ ބުރުޒުމަގުގެ އިލެކްޝަން ކޮމިޝަން ކައިރީގަައި ކަމަށް ފާއިޒް ވަނީ "ދެން"އާ ހިއްސާ ކޮށްފައެވެ. އެއީ އޭނާ އެންމެ ފުރަތަމަ ދިރިއުޅެމުން އައި ގެއާ ކައިރީގައިި ތައްޔާރު ކުރެވުނު ޒޯނެކެވެ. ނަމަވެސް ދިރިއުޅެމުން ދިޔަ ގެ ބަދަލުވުމާއެކު ކުރިން ތައްޔާރުކުރެވުނު ޒޯނު މިހާރު ދިރިއުޅޭ ގެ ކައިރިއަށް ބަދަލު ކުރެވިގެން ދިޔައެވެ. އެ ޒޯނަކީ ދިވެހި ބަހުގެ އެކަޑަމީ ކައިރީގައި، ސޯސަން މަގުގައި މިހާރު ތައްޔާރު ކުރެވިފައިވާ ޒޯނެވެ. އަދި މީގެ އިތުރުން ފާއިޒަކީ ފެނަކައިގަ މަސައްކަތް ކުރާ މީހެއް ކަމުން ދެ ޒޯނެއް އެނާއަށް ދިނުމަށް އެދިފައި ވީނަމަވެސް އެކަން ކާމިޔާބު ވެފައި ނުވާ ކަމަށް ވެސް ފާއިޒް "ދެން"އާ ހިއްސާ ކުރިއެވެ.
ނުކުޅެދުންތެރިކަން ހުންނަ ފަރާތްތައް ބޭނުންކުރަމުން ގެންދާ އެއްގަމު އުޅަނދު ފަހަރު ތަކަކީ އާންމު ރައްޔިތުން ގެންގުޅޭ އުޅަނދުތަކަށް ވުރެ ބޮޑު އަދި އެހާމެ ތަފާތު އުޅަނދުތަކެކެވެ. އެފަދަ މީހުންނަށް ދުއްވަން ފަސޭހަ ވާނޭ ފަދައިން އަދި ދުއްވުމުގެ ފުރުސަތު ފަހި ކޮށްދިނުމަށް މިފަދަ އުޅަނދުތައް ފަރުމާ ކުރެވުނީ ވެސް އެމީހުންނަކީ މުޖުތަމައުގައި ބާކީ ކޮށްލެވޭ ފަދަ ބަޔަކަށް ނުހެދުމަށެވެ. އެމީހުންނަކީ ވެސް ހަމަ އާންމު ރައްޔިތުންނެކޭ އެއްފަދައިން އެހެންމީހުންގެ އަޅާލުމާއި އަދި ލޯބި ބެނުންވާނޭ މީހުންނެވެ. އެއީ ވެސް ހަމަ އެހެން މީހުންނެކޭ އެއްފަދައިން އިންސާނުންނެވެ. އެމީހުންނަށް ހުރިހާ ކަމެއް ކުރުމުގެ ކުޅަދާނަކަން ލިބިފައި ނުވި ނަމަވެސް އެމީހުންނަށް އިޙުސާސް ކުރެވޭނެއެވެ. އުނދަގޫ ތަކާއި ތުރާތަކާއި ކުރިމަތިލާން ޖެހޭނެއެވެ.
އެހެންނަމަވެސް އަޅުގަނޑުމެންގެ މި މުޖުތަމަޢުން އެފަދަ ހާއްސަ އެހީއަށް ބޭނުންވާ ފަރާތްތަކާއި މެދު އިހާނެތިކޮށް ކަންތައް ކުރާ މަންޒަރު ފެންނަނީ މަދެއްކޮށެއް ނޫނެވެ. އަހުމަދު ފާއިޒަކީ ވެސް ހަމަ އެފަދަ ތަކުލީފުތަކާ ކުރިމަތިކާ ހިތްރުގަދަ ޒުވާނެކެވެ. ހިނގުމުން މަހުރޫމު ވެފައިވީ ނަމަވެސް މުޖުތަމަޢުން ކުރެވޭ ބައެއް ކަންކަމުގެ ސަބަބުން ލިބޭ އުނދަގޫތަކަށް ފާއިޒް ކުރިމަތިލަނީ ކެރިހުރެއެެވެ. އަޑު އުފުލަނީ ފާޅުގައެވެ. ފާއިޒްގެ ވާހަކަތައް "ދެން"އާ ހިއްސާ ކުރަމުން ދިޔަ އިރު ފާއިޒްގެ އަޑުގައި އެތައް ވާހަތަކެއް ބުނަން ބޭނުންވެފައި ވާކަން ފާހަގަވިކަހަލައެވެ. އެތައް ޝަކުވާތަކެއް ކުރަން ބޭނުންވާ ކަން ހާމަވިކަހަލައެވެ.
ފާއިޒަކީ މީހަކާ އިނދެ ޒަވާޖީ ޙަޔާތެއް ފަށައިގެން އުޅޭ އުފާވެރި ފިރިހެނެކެވެ. އަދި ދާދި ފަހުން އާއިލާއަށް އުފަންވި އައު މެހެމާނާއެކީ އޭނާއަކީ މިހާރު ތިން ކުދިންގެ ބައްޕައެއް ވެސް މެއެވެ. އެހެންނަމަވެސް ފާއިޒްގެ އެންމެ ދަރިއަކީ ދުވަސްނުފުރާ ވިހޭ ކުއްޖެއްކަމުން ކުއްޖާއަށް ބޭނުންވާ މައިމީހާގެ ގާތުން ނަގާ ބުއް ،ތިންގަޑި އިރުން ތިންގަޑި އިރުން ހޮސްޕިޓަލަށް ގެންދަން ޖެހޭ ކަމަށް ފާއިޒް ބުންޏެވެ. އެހެންނަމަވެސް އޭނާ ބޭނުން ކުރާ ސައިކަލު ޕާކު ކުރަން ޚާއްސަކޮށްފައިވާ ޒޯނުގައި، އާންމުންގެ ސައިކަލު ޕާކަށް ޖަހައިފައި ހުރުމުގެ ސަބަބުން ދަރިފުޅަށް، އެދަރިފުޅުގެ ކާނާ ނުގެންދެވި އެތައް އިރެއް މަގުމަތީގައި ހޭދަކުރަން ޖެހޭ ކަމަށް ފާއިޒް އަސަރާއެކީ "ދެން"އާ ހިއްސާ ކުރިއެވެ.
މީގެ އިތުރުން ވެސް އެތައް ގޮން ޖެހުންތަކަކާ ކުރިމަތިލާން ޖެހޭ ކަމަށާއި، ހަގީގަތުގައި އެޒޯންތައް ތައްޔާރުކުރުމުން އެފަދަ މީހުންނަށް މިހާރު އެއްވެސް ފަސޭހައެއް ނުވާ ކަމުގައި ފާއިޒް ފާހަގަކުރިއެވެ. ޚާއްސަކޮށް ރޭގަނޑު ގަޑީގައި ސައިކަލު ޕާކު ކުރާން ތަންކޮޅެއް ހޯދުމަކީ އެހެން ގަޑިތަކާ ޚިލާފަށް ވަރަށް އުނދަގޫ ވަގުތެއް ކަމަށާއި، ގިނަ ރޭރޭ އާޒިމް ފުލުހުންނަށް ގުޅާ އެމީހުން އައިސް، ޚާއްޞަ އެހީއަށް ބޭނުންވާ މީހުންނަށް ޚާއްސަ ކޮށްފައިވާ ޒޯނުގައި ޕާކުކޮށްފައިވާ ސައިކަލު ނެރެފައިވާނެ ކަމަށް ވެސް ފާއިޒް ބުންޏެވެ. އަދި އެފަދަ ވަގުތެއްގައި، އަވަސް އަރުވާލައިގެން ތަނަކަށް ދާން ބޭނުންވާނަމަ، ވަގުތަށް އެތަނަށް ދިއުމުގައި އެތަކެއް ދަތިތަކާ ކުރިމަތިލާން ޖެހޭ ކަމަށް ވެސް އޭނާ ފާހަގަ ކުރިއެވެ.
ފާއިޒު ބުނީ މީހެއްގެ ސައިކަލް ޒޯންގައި ހުރި ނަމަވެސް ވެރިފަރާތުން އައިސް އެ ނަގަން ދެން މިހާރު ބަހައްޓާ ކަމަށާއި އެގޮތުން ވަރަށް ބޮޑަށް ދަތިވާ ކަމަށެވެ.
“މިހާރު ދެ ދަރީން ސުކޫލަށް ވެސް ގެންދަން ޖެހޭ ، މީހެއްގެ ސައިކަލެއް ހުއްޓަސް ފުލުހުން އައިސް އެމީހަކާ ގުޅާ ސައިކަލް ނަގަންދެން އަޅުގަނޑު ހުންނަން ޖެހެނީ”ކުރިން ފުލުހުން ވަގުތުން އައިސް މައްސަލަ ހައްލުކޮށްދޭކަން ފާހަގަ ކުރަމުން ފާއިޒު ބުންޏެވެ. އަދި ހަމައެހެންމެ ފާއިޒަށް މިއަދު ޕާރކިން ޒޯނެއް ލިބުމުގައި އެންމެ ބޮޑު އެހީތެރިކަމެއް ލިބުނީ ކުރީގެ ޑިސޭބަލް އެމްބެސެޑަރ އަހުމަދު ހިޝާންގެ ބުރަ މަސައްކަތުންކަން ފާހަގަކޮށް ހިޝާން އަށް ވަރަށް ޚާއްސަ ޝުކުރެއް ފާއިޒް ވަނީ ރައްދުކޮށްދީފއެވެ.
ހަމައެއާއެކު ވާރޭ ވެހޭ ދުވަހެއް ނަމަ، ޕާކު ކުރާނެ ތަންކޮޅެއް ހޯދުމުގައި ތެމިގެން ވެސް އެތައް ދުވަހެއް ދުއްވާފައި ވާނެ ކަމަށާއި، ކުޑަ ހިފައިގެން ނުދުއްވަނީ، އޭނާއަކީ އެއްއަތުން ކުޑަ ހިފައިގެން ސައިކަލު ދުއްވަން އެހާ ފަރިތަ ނޫން މީހަކަށް ވުމުން ކަމުގައި އާޒިމް ބުންޏެވެ. ކަން މިހެން އޮތުމާއެކު ހަމަ ހަގީިގަތުގައި ވެސް ފާއިޒް އެތައް ގޮންޖެހުންތަކަކާ ކުރިމަތިލައިފައިވާ ކަން ފާހަގަކުރެވެއެވެ. އަދިި މިފަދަ މަންޒަރުތައް ހުއްޓުވުމަށް ފާއިޒް ކުރަމުންދާ އާދޭހުގެ އަޑު އަހާނެ ބަޔަކު މިއަދު އަޅުގަނޑުމެންގެ މުޖުތަމައުގައި ވާނެކަން ވެސް ގައިމެވެ. ބޭނުން ވަނީ ފާއިޒްގެ މި ޝަކުވާތައް އެފަރާތާ ހަމައަށް ފޯރުކޮށްދިނުމެވެ.
