ވެރިކަމުގެ ފުރަތަމަ ދުވަހު އެމެރިކާއަށް މުސްލިމުން ވަނުން މަނާ ކުރާ "މުސްލިމް ބޭން" އުވާލާނެ
މުސްލިމުންގެ އާބާދީ ބޮޑު ޤައުމުތަކުން އެމެރިކާއަށް ވަނުން މަނާ ކުރަން އެޤައުމުގެ މިހާރުގެ ރައީސް ޑޮނާލްޓް ޓްރަންޕް ކުރި އަމުރު، ވެރިކަމަށް ވަޑައިގަންނަ ފުރަތަމަ ދުވަހު އުވާ ލައްވާނެކަން ހާމަކޮށްފިއެވެ.
ހުވާ ކުރެއްވުމަށްފަހު އެންމެ އިސްކަމެއްދޭނެ ކަންތައް ބަޔާން ކުރާ ، އެމެރިކާގެ ވައިޓް ހައުސްގެ ޗީފް އޮފް ސްޓާފް ކަމަށް ދެން ވަޑައިގަންނަވާނެ ރޮން ކްލެއިން ލިޔުއްވާފައިވާ މެމޯއެއް ޔޫއެސް މީޑިއާއިން ވަނީ އާއްމުކޮށްފައެވެ. މިމެމޯގައި ޓްރަމްޕް ތަންފީޒު ކުރެއްވި ބައެއް ސިޔާސަތުތަކަށް ބައިޑެންގެ ވެރިކަމުގެ ފުރަތަމަ ދުވަސްކޮޅުގެ ތެރޭގައި ބަދަލު ގެންނާނެއެވެ. މީގެ ތެރޭގައި ބައެއް ޤައުމުތަކުގެ މުސްލިމުންނަށް އެޤައުމަށް އެތެރެނުވެވޭ ގޮތަށް ކުރި އަމުރު ވެސް ހިމެނެއެވެ.
މުސްލިމު ބައެއް ޤައުމުތަކުން އެމެރިކާއަށް އެތެރެވުން މަނާ ކުރުމަކީ 2016 ވަނަ އަހަރުގެ ޓްރަންޕްގެ ރިޔާސީ ވަޢުދެކެވެ. މިވަޢުދަށް ކުލަވަރު ގެނެސް، ތަންފީޒް ކޮށްފައި ވަނީ 2017 ވަނަ އަހަރުގެ ޖަނަވަރީ މަހުގެ ތެރޭގައެވެ. އޭރު އެ އަމުރުގައި އޮތީ އީރާން، އިރާގް، ސީރިއާ، ޔަމަން، ސޯމާލިއާ، ސޫދާން އަދި ލީބިޔާގެ ރައްޔިތުން އެމެރިކާއަށް ވަނުން މަނާ ކުރުމަށެވެ.
ނަމަވެސް މިއަމަރަށް އެމެރިކާގެ ބައެއް ކޯޓްތަކުން ގޮންޖެހުމާއެކު، އަމުރަށް ދެ ފަހަރެއްގެ މަތިން ވަނީ ބަދަލުތަކެއް ގެނެސްފައެވެ. އެންމެ އިރާން، އުތުރު ކޮރެއާ، ސީރިއާ، ލީބިޔާ، ޔަމަން، ސޯމާލިއާ އަދި ވެނެޒުއޭލާގެ ރައްޔިތުންނަށް ނުވަދެވޭ ގޮތަށް ތަންފީޒް ކުރުމަށް 2018 ވަނަ އަހަރު ސްޕްރީމް ކޯޓުން ވަނީ ހުއްދަ ދީފައެވެ.
