ދަރީންނަކީ އަމިއްލަ ނަފްސަށް އިތުބާރުކުރާ ހަރުދަނާ ބަޔަކަށް ހަދާނީ ކިހިނެއް؟
ދަރީން ލިބި އެކުދީން ހެދި ބޮޑުވަމުން އަންނައިރު ކޮންމެ މައެއްގެ ބަފައެއްގެ އުއްމީދަކީ ކުދީންނަށް ރަނގަޅު ، ފާގަތި މުސްތަގުބަލެއް ހޯދައި ދިނުމެވެ. އެކުދީންނަށް ބޭނުންވާހާ އެއްޗެއް ހޯދައިދީ ، ބޭނުން ކަމެއް ކޮށްދެނީ އެ މަގުޞަދުގައެވެ. ނަމަވެސް ، ދަރީންނަކީ މައިންބަފައިން ބޭނުން ގޮތަކަށް ބައްޓަން ކުރެވޭނެ ބައެކެވެ. ހަމައެކަނި ބޭނުންވާހާ ތަކެއްޗެއް ހޯދައިދީގެން ، ނުވަތަ ބޭނުންވާހާ ކަމެއް ކޮށްދީގެން ، މުސްތަގުބަލްގައި މައިންބަފައިން ދެކެން ބޭނުންވާ ދަރިފުޅެއް ނުފެންނާނެއެވެ. ހަރުދަނާ،ހިތްވަރުގަދަ، އަމިއްލަ ނަފްސަށް އިތުބާރު ކުރާ ފުރާ ފުރިހަމަވެފައިވާ މީހެއް ފެންނާނީ ދަރިފުޅު ތުއްތުއިރު އެކުއްޖާ ތަރުބިއްޔަތު ކުރި ގޮތަކުންނެވެ.
ކުއްޖާގެ ފުރަތަމަ އަދި އެންމެ ބޮޑަށް ތަރުބިއްޔަތުދޭ މަދަރުސާއަކީ ކުއްޖާގެ ގެއެވެ. އެގޭގައި ދިރިއުޅޭ މައިންބަފައިންނާއި އޭނާގެ ލޯބިވެރީންނެވެ. ދަރީންނަކީ އުފާވެރި އަދި އަމިއްލަ ނަފްސަށް އިތުބާރު ކުރާ ކުއްޖަކަށް ހަދަން ބޭނުންނަމަ މި ތިން ކަންތައް ކުއްޖާގެ މަދަރުސާއިން ދައްކައިދޭން ޖެހެއެވެ. އެގޮތަށް ޢަމަލު ކުރަން ޖެހެއެވެ.
ކުދީން ޢަމަލު ކުރާނެ އުސޫލުތަކެއް، ގަވާއިދުތަކެއް އޮތުން
އަހަރެމެންގެ އާންމުންގެ ވިސްނުމުގައި ކުދީންނަށް ، ކުރެވޭނެ ކަންކަމާއި ނުކުރެވޭނެ ކަންކަމާއި ކަންކަން ކުރާނެ ވަގުތުތަކެއް އޮތުމަކީ ކުރެވޭނެ ކަމެއް ނޫނެވެ. އެކުދީން ބޭނުންވާނީ މިނިވަން ކަމާއެކު ބޭނުން ކަމެއް ބޭނުން ގަޑިއަކު ކުރަން ކަމަށް ގިނަ ބަޔަކު ދެކެއެވެ. ނަމަވެސް މިއީ މުޅިން ކުށްހީއެކެވެ. ދަރީން ކަންކަން ކުރާނެ ގަވާއިދުތަކެއް އޮވެ ، އެ ގަވާއިދުތަކަށް އަމަލު ކުރުމަކީ އެ ކުދީން ހިތް އެދޭ ކަމެކެވެ. މި ގޮތަށް ޢަމަލު ކުރުމުން ކުދީންނަށް އަޚްލާޤާއި ، ކިޔަމަންތެރިކަން ދަސްވެއެވެ.
މައިންބަފައިންނަކީ ކުދީންގެ އެންމެ ގާތް އެކުވެރީންކަމުގައި ވާ ފަދައިން އެއީ އެ ކުދީންނަށް މަގު ދައްކައިދޭ މީހުން ކަމުގައި ވެސް ވާން ޖެހޭނެއެވެ. ކުދީން ހިތް ނުރުހިދާނެ ކަމަށް ޓަކައި ހުރިހާ ކަމެއް ދޫކޮށްލައިގެން ހުރުމަކީ އެކުދީންގެ ޝަޚްޝިއްޔަތު އުފެއްދުމުގައި ހެދޭނެ ވަރަށް ބޮޑު ގޯހެކެވެ.
ކުދީންނަށް ގޮތް ނިންމުމަށް ބާރު އެޅުން
ކުދީންގެ އެކި ކަންކަމުގައި ގޮތް ނިންމުމުގެ ފުރުސަތު ދީ އެކަމަށް ކުދީންނަށް ބާރު އެޅުމަކީ އެކުދީންގެ އަމިއްލަ ނަފްސުގެ ކުރިއެރުމަށް ދެވޭނެ ބާރެކެވެ. އެ ކަމެއްގެ ފައިދާއާއި ގެއްލުން ކުއްޖާއަށް ފަހުމް ކޮށްދީ ކުއްޖާއަށް ގޮތް ނިންމުމުގެ އިޚްތިޔާރު ދިނުމަކީ ވަރަށް މުހިންމު ކަމެކެވެ. ކުދިކުދި ކަންކަމުން ފެށިގެން ގޮތް ނިންމުމުގެ އިޚްތިޔާރު ކުއްޖާއަށް ދެވިއްޖެނަމަ ، އެ ކުއްޖާ ހެދި ބޮޑުވާނީ ރަނގަޅު ނިންމުން ނިންމާ ކުއްޖެއްގެ ގޮތުގައެވެ. އެހެންވުމުން ދިރިއުޅުމުގައި ދިމާވާ ބޮޑެތި ކަންކަމުގައި ވެސް ރަނގަޅު ވިސްނުން އިސްކޮށް އެކަންކަމުން އަރައިގަތުމުގެ މަގު ފަހިވެގެން ދެއެވެ.
ކުދީންނާ ވާހަކަދައްކާ ގޮތް
ހަރުދަނާ އަދި އަމިއްލަ ނަފްސަށް އިތުބާރު ކުރުން ފެށިގެން އަންނަނީ ކުދިންނާ މުޢާމަލާތްކޮށް މުޚާތަބު ކުރާ ގޮތުގެ މައްޗަށެވެ. ކުދީން އަބަދު ގޯސްކޮށް އެކުދީން ކުށްވެރިކޮށް ޝަކުވާކޮށް ފާޑު ކިޔުމަކީ ހެދޭނެ ވަރަށް ބޮޑު ގޯހެކެވެ. އޭގެ ބަދަލުގައި ކުއްޖާގެ ރަނގަޅު ވާހަކައާއި ބަސްއަހާ ވާހަކަ ދައްކާ އެކުއްޖާއަށް އިތުބާރު ދިނުމަކީ ވަރަށް މުހިންމު ކަމެކެވެ. ހަމައެހެންމެ ޝަކުވާ ކުރުމުގެ ބަދަލުގައި ކުދީންނަށް އެންމެ ރަނގަޅު ގޮތް ކިޔައިދީ ، އެކަމުގެ ނަމޫނާ ވެސް ދައްކާށެވެ. އަދި ކުދީންނާ ވާހަކަ ދައްކާއިރު އަޑުލައި ނުހަދާ މަޑުމައިތިރިކަމާއި ކިޔަމަންތެރިކަމާއެކު އެކުދީންނާ ވާހަކަ ދެއްކުމަކީ އެކުދީން ވެސް އެކަން ކޮޕީކޮށް އެކުދީންގެ ކިބައިގައި އަށަގަންނުވާނޭ ކަމެކެވެ.
