ޚާއްޞަ އެހީއަށް ބޭނުންވާ ކުދީންގެ ހައްގުގައި ވަކާލާތުކުރާ ހިތްވަރުގަދަ މަންމައެއް: އެދެނީ އެންމެންގެ އިހްސާންތެރިކަމަށް!
މައެއް,އެ މައެއްގެ ދަރިފުޅު ބަލާ، ބޮޑުކޮށް ހެޔޮ ތަރުބިއްޔަތެއް ދިނުމަށް ޖާނުން ފިދާވަނީ ހަމަ ގައިމުވެސް އެ ދަރިފުޅު ދެކެ އެ މަންމަ ވާ ލޯތްބެއްގެ ބޮޑުކަމުންނެވެ. އެދަރިއަކަށް ޓަކައި އެމަންމަ ދެކެމުން އަންނަ ހުވަފެންތަކާއި އެ ދަރިފުޅަށް ރަނގަޅު މުސްތަޤުބަލެއް ބިނާ ކުރުމުގެ އުއްމީދު މަންމަގެ ހިތުގައި އޮތުމުން ކަން ވެސް ގައިމެވެ. ދޮނެއް ކަޅެއް، ހިއްކެއް ފަލައެއް އަދި ކިއެއްތޯއެވެ؟ އެ ދަރިފުޅަކީ ބަލި ކުއްޖެއްކަމުގައި ވީ ނަމަވެސް އެ ދަރިއަކަށް ޓަކައި އެ މަންމަގެ ހިތުގައިވާ މައިވަންތަ ކަމުގެ ކުލުނާއި ލޯތްބަށް ކުޑަވެސް ބަދަލެއް ނެތިއެވެ.
އަޅުގަނޑުމެންނަށް އެކަނިވެރި މައިން އެމައިންގެ ދަރިން ތަރުބިއްޔަތު ކުރާ މަންޒަރު ފެނެއެވެ. އަދި އެކަމަކީ ފަސޭހަ ކަމެއް ނޫން ކަން ވެސް ބުއްދި ސަލާމަތުން ހުރި އިންސާނެއް ނަމަ ދަންނާނެކަން ވެސް ޔަގީނެވެ. ކަން މިހެން އޮތް އިރު، ނުކުޅެދޭ ދަަރިއެއް ގިނިކަންޏާ ބަލާ ބޮޑު ކުރުމަކީ، ކިހާ އުނދަގޫ ކަމެއް ކަން އަޅުގަނޑުމެންނަށް ވިސްނާ ވެސް ނުލެވޭނެއެވެ. އުފުލަން ޖެހޭ ބުރައާއި ތަކުލީފުތައް ދުލުން ނުވަތަ ގަލަމުން ވެސް ބަޔާން ނުކުރެވޭނެކަން ވެސް ގައިމެވެ. އެހެންނަމަވެސް އެފަދަ މައިން، އެމައިންގެ ހިތްވަރާއި މިންނަތުން، އެމައިންގެ ދަރިން ބަލާ ބޮޑުކުރަމުން އަންނަނީ އެއްވެސް ޝަކުވާއެއް ނެތިއެވެ.
މުޖުތަމައު ދެކޭ ގޮތާ މެދު ސަމާލުކަން ދޭން ބޭނުންނުވެ، ދަރިފުޅުގެ ކުރިއެރުމަށް މުހިންމު އިސްކަމެއްދީގެން އެ ކުދިން ބޮޑުކުރާ މައިންބަފައިން ބައިވަރެވެ. އެއީ ރައްދު ދޭން ޖެހިއްޖެ ހާލަތެއްގައި ރައްދު ވެސް ދޭނެ މައިންބަފައިންނެވެ.
އުމުރުން 35 އަހަރުގެ މަރިޔަމް އަބްދުލް ރަޙީމް، އާންމު ނަމުން ނަމަ މަރިޔަމް އަކީ މިފަދަ ހިތްވަރު ގަދަ އެކަނިވެރި މައެކެވެ. އަދި ދަންނަވަންތޯއެވެ؟ މަރިޔަމްއަކީ ރާއްޖޭގައި މިފަހަކަށް އައިސް ގިނަވަމުން އަންނަ އޯޓިޒަމް ސްޕެކްޓްރަމް އަށް ނިސްބަތްވާ ކުއްޖެއްގެ ހިތްވަރު ގަދަ މަންމައެކެވެ. މަރިޔަމްގެ ދިރިއުޅުމުގެ ހާލަތާ ގުޅިގެން މައުލޫމާތު ސާފު ކޮށްލުމަށް "ދެން"އިން ވަނީ މަރިޔަމްއާ ބައްދަލު ކޮށްފައެވެ. ދެކެވުނު ވާހަކަތަކުން މަރިޔަމް ގެ ހިތްވަރު ގަދަ ކަމާއި ފުރިހަމަ މައިވަންތަކަމުގެ ލޯބި ހާމަވެގެން ދިޔައެވެ.
"އެކަނިވެރި މައެއް" އެ ޓައިޓަލް އަޅުގަނޑަށް ނުދެއްވާ!
އެކަނިވެރި މަޔަކަށް ވުމުގެ ސަބަބުން ދިމާވާ ގޮން ޖެހުންތަކަކީ ކޮބައިތޯ އަޅުގަނޑުމެން ކޮށްލި ސުވާލަކަށް މަރިޔަމް ދިނީ ހީވެސް ނުކުރާ ފަދަ ޖަވާބެކެވެ. އެއީ އެކަނިވެރި މަޔަކަށް ވުމުގެ ސަބަބުން ގޮން ޖެހުންތަކަކާ ކުރިމަތިލާން ނުޖެހޭ ކަމަށެވެ. އެންމެ ފުރަތަމަ ވެސް ދިން ޖަވާބުން މަރިޔަމް އަކީ ކަންކަމުގައި ވީހާ ވެސް "ޕޮޒިޓިވް" ކޮށް ވިސްނާ މީހެއްކަން ހާމަވެގެން ދިޔައެވެ. ގޮން ޖެހުން ތަކަކާ ކުރިމަތި ވުމުގެ ބަދަލުގައި ބައިވަރު ކަންކަން ކުރުމުގައި އެތައް ގުނައެއް ފަސޭހަވެގެން ދިޔަ ކަމުގައި މަރިޔަމް ފާހަގަ ކުރިއެވެ. އެހެންނަމަވެސް އެކަނި ކުދިން ގޮވައިގެން އުޅޭ މަންމައިންނަށް މުޖުތަމައުން “އެކަނިވެރި މައިން”ގެ ލޭބަލް ދިނުމަކީ، އެކަމާމެދު މަރިޔަމް އެހާ ހިތްހަމަ ޖެހޭ ކަމެއް ނޫނެވެ. އަދި އެކަމުގެ ސަބަބުން މަރިޔަމްގެ ހިތްވަރަށް ކުޑަވެސް އުނިކަމެއް ނާދެއެވެ.
މީގެ އިތުރުން އެކަނިވެރި މަޔަކަށް ވުމުން އެވާހަކަ ދެއްކުމުގެ ބަދަލުގައި، ދިރިއުޅުމުގައި ހާސިލު ކުރެވުނު ކާމިޔާބީތަކާއި ލަނޑުދަނޑިތަކުގެ ވާހަކަ އެއްވެސް މީހެއް ނުދައްކަނީ ކީއްވެތޯ މަރިޔަމް ވަނީ ސުވާލު އުފައްދާފައެވެ. އެކަނިވެރި މަޔަކަށް ވުމުގެ ސަބަބުން ކުއްޖާއަށް ލިބެންޖެހޭ ލޯތްބާއި ކުލުނުގެ މިންވަރަށް ކުޑަވެސް އުނިކަމެއް އައިސްފައިނުވާނެ ކަން ވެސް އޭނާ ވަނީ ފާހަގަ ކޮށްފައެވެ. އަދި އެކަނި ވެރި މަޔަކަށް ވުމުގެ ސަބަބުން އޭނާ ވަރަށް ގިނަ ގޮންޖެހުންތަކާ ކުރިމަތިލާން ޖެހޭނެ ކަމުގައި މުޖުތަމަޢުން ގަބޫލުކުރާ ގަބޫލުކުރުން ހުއްޓާލަން ޖެހޭ ކަމުގައި ވެސް އޭނާ ފާހަގަކުރިއެވެ. ސަބަބަކީ އެކަނިވެރި ހުރިހާ މައިންނަކީ ދަތިތަކާ ކުރިމަތިލާން ޖެހޭ މީހުންނޫން ކަމަށާއި، އެހެންނަމަވެސް ވަރަށް ދަތި ހާލުގައި ދިރިއުޅެމުން އަންނަ އެކަނިވެރި މައިން ވެސް މަދު ނޫން ކަމުގައި އޭނާ ފާހަގަކުރިއެވެ.
ނުކުޅެދޭ ދަރިއެއް ބަލަމުން ދުވަހުގެ މަސައްކަތްތައް!
މަރިޔަމްއަކީ ބިޒްނަސް އެޑްމިނިސްޓްރޭޝަންގެ ދާއިރާއިން މަތީ ތައުލީމް ހާސިލުކޮށް، ޕާރޓް ޓައިމް ލެކްޗަރަރ އެއްގެ ގޮތުގައި މަސައްކަތް ކުރަމުން އަންނަ ހީވާގި ކަނބަލެކެވެ. އެތައް ދަރިވަރުންނެއްގެ "ފޭވަރިޓް" އެކެވެ. އެތައް ބައެއްގެ "އިންސްޕިރޭޝަން"އެކެވެ. އެހެންނަމަވެސް ކުރަމުން ދިޔަ މަސައްކަތަށް ދަރިފުޅުގެ ސަބަބުން އެއްވެސް ދަތިކަމަކާ ކުރިމަތިލާން ނުޖެހޭ ކަމުގައި މަރިޔަމް ފާހަގަކުރިއެވެ. އެގޮތުން ކިޔަވައިދިނުމަށް ކޮލެޖަށް ދާން ޖެހުނު ކަމުގައިވީ ނަމަވެސް، މަރިޔަމްގެ އާއިލާއާއި ގާތް ރަހުމަތްތެރިންގެ ފަރާތުން އެހީތެރިކަން ލިބޭ ކަމުގައި މަރިޔަމް ފާހަގަކުރިއެވެ.
މީގެ އިތުރުން ބައެއް ފަހަރު ދަރިފުޅު ބަލައިދޭނެ މީހަކު ހޯދުމުގައި އުނދަގުތަކާ ކުރިމަތިލާން ޖެހުނު ނަމަވެސް، މަސައްކަތް ކުރުމުން އެންމެ ފަހު ވަގުތުގައި ކޮންމެވެސް އަލި މަގެއް ފެންނާނެ ކަމުގައި މަރިޔަމް ފާހަގަކުރިއެވެ. އަދި އެފަދަ ދަތިތަކުގައި ވެސް، "ނުވާނޭ" ކަމަށް ހީކޮށް އެކަމަށް ހައްލެއް ހޯދުމަށް މަސައްކަތް ކުރުމުގެ ބަދަލުގައި އެކަމާ ހިތާމަ ކުރާނަމަ އެކަމަށް ހައްލެއް ނުލިބޭނެ ކަމުގައި އޭނާ ފާހަގަކުރިއެވެ.
"މިސާލަކަށް ދަރިފުޅު ބަލައިދޭނެ މީހެއް އެގަޑިތަކަށް ހޯދަން އުނދަގޫ ވާނެ، އެކަމަކު އޭތި ކޮންމެ މީހަކު ވެސް ކޮންމެވެސް ގޮތަކުން މެނޭޖު ކުރަން އުޅުނީމަ އަސްލު ވާނީ. ޖަސްޓް ބިކޯޒް ލައިފް ގެޓްސް ޓަފް، ވީ ޑޯންޓް ގެޓް ޓު ސިޓް އެންޑް ކްރައި އެބައުޓް އިޓް"
މަރިޔަމް
މަރިޔަމް ދިރިއުޅުމަށް ކުރާ އެކި މަސައްކަތްތަކުގައި އޭނާއަށް އެހީތެރިވެދެނީ އޭނާގެ ރަހުމަތްތެރިންނާއި ގާތްމީހުން ކަމުގައި ވެސް އޭނާ ފާހަގަކުރިއެވެ. އަދި ކޮންމެ މީހަކު ވެސް އެމީހަކަށް ވީ ވަރަކަށް އެހީތެރިކަން ފޯރުކޮށްދޭ ކަމުގައި ވެސް މަރިޔަމް “ދެން”އާ ހިއްސާ ކުރިއެވެ.
ނުކުޅެދުންތެރިކަން ހުންނަ ކުދިންނާ މެދު މުޖުތަމަޢުން ހޭލުންތެރިވާންޖެހޭ ވަރަކަށް ހޭލުންތެރިއެއް ނޫން
ނުކުޅެދުންތެރިކަން ހުންނަ ކުދިންނާ ދޭތެރޭ މުޖުތަމަޢުން ވަރަށް ބޮޑަށް ހޭލުންތެރިވާންޖެހޭ ކަމަށް ފާހަގަކޮށް މަރިޔަމް ބުނީ، މުޖުތަމަޢުން އަބަދުވެސް ދައްކަނީ ކުއްޖާއަަށް ކުރެވޭ ކަންކަމަށް ވުރެ ބޮޑަށް އެކުއްޖާއަށް ނުކުރެވޭ ކަންކަން ކަމުގައި ކަމަށެވެ. ހަގީގަތުގައިވެސް މިއީ އަޅުގަނޑުމެންގެ މި ކުޑަކުޑަ މުޖުތަމައުން ފެންނަމުންދާ ވަރަށް ނާތަހުޒީބީ މަންޒަރެކެވެ. ނުކުރެވޭ ކަންކަމުގެ ވާހަކަ ދެއްކުމުގެ ބަދަލުގައި ކުއްޖާއަށް ކުރެވޭ ކަންކަމުގެ ވާހަކަ ދައްކައި އެކަންކަމަށް އެކުދިންނަށް ތަރުހީބު ދިނުމަކީ ހަމަގައިމުވެސް އެކުދިންގެ ހިތަށް ލިބިގެންދާނެ ހަމަޖެހުމެއްކަން ވެސް ގައިމެވެ. އެކުދިން އުފާވެ އެފަދަ ކުދިން ތަރުބިއްޔަތު ކުރަމުން އަންނަ މައިންނަށް ލިބިގެންދާނެ ހިތްވަރެއް ކަން ވެސް ކަށަވަރެވެ.
"ޑިސެބިލިޓީއެކޭ ބުނާއިރަށް ހީވާނީ އެއީ ނުހިނގޭ ކުއްޖެކޭ ނޫނީ ކަންފަތަށް އަޑު ނީވޭ ކުއްޖެކޭ. އޯޓިޒަމް ކުދިންނާ ބެހޭ ގޮތުން ކޮމިޔުނިޓީން އެވެއާނަސް ބޭނުންވާރަށް ގާތަށް ވެސް ނުދޭ"
މަރިޔަމް
ހަމައެއާއެކު މުޖުތަމަޢުގެ އިތުރުން ސަރުކާރުގެ ކަމާ ބެހޭ އިދާރާ ތަކުން ވެސް އެފަދަ ކަންކަމަށް ހޭލުންތެރިވާން ޖެހޭ މިންވަރަށް ހޭލުންތެރި ނޫންކަމަށާ އެއީ ކުރިމަތިލާންޖެހޭ ވަރަށް ބޮޑު ގޮންޖެހުމެއް ކަމުގައި އޭނާ ވަނީ ފާހަގަކޮށްފައެވެ. ބެލެނިވެރިއެއްގެ ހައިސިއްޔަތުން ވިސްނާލައިފިނަމަ، ހޭލުންތެރިވާންޖެހޭ މިންވަރަށް ހޭލުންތެރި ނޫންކަން އަމިއްލައަށް ވެސް ވިސްނޭނެ ކަމުގައި އޭނާ "ދެން"އާ ހިއްސާ ކުރިއެވެ.
އަދި އެފަދަ ކުދިންގެ ބެލެނިވެރިންނާއި އިތުރު ފަރާތްތައް ޝާމިލުވާނޭހެން ވައިބަރ ގުރޫޕެއް ވެސް ވާނީ ހަދާފައި ކަމަށާއި އޭގައި އެންމެން ވެސް މަސައްކަތް ކުރަނީ ވަރަށް ގުޅިގެން ކަމަށް ވެސް އެގުރޫޕުގެ އެއް "އެޑްމިން" އެއްކަމުގައިވާ މަރިޔަމް ފާހަގަކުރިއެވެ.
މަރިޔަމް ދެންއަށް އިންޓަވިއު ދެނީ، ދެން އިމޭޖަސް: ޝަމްވީލް
ނުކުޅެދުންތެރިކަން ހުންނަ ކުދިންގެ ހައްގުގައި އެތައް މަސައްކަތްތަކެއް!
ނުކުޅެދުންތެރިކަން ހުންނަ ކުދިންގެ ހައްގުގައި އެތައް މަސައްކަތްތަކެއް މިއަދާ ހަމައަށް ވެސް ކޮށްފައި ހުންނާނެ ކަމަށާއި، މުސްތަގުބަލުގައި އެކުދިންގެ ހައްގުގައި އެތައް ކަމެއް ކުރުމަށް ތައްޔާރަށް ހުރިކަމުގައި މަރިޔަމް "ދެން"އާ ވާހަކަދައްކަމުން ވަނީ ބުނެފައެވެ. އެގޮތުން ވޭތުވެ ދިޔަ ދެތިން އަހަރުތެރޭގައި ސަރުކާރުގެ ކަމާ ބެހޭ އިދާރާތަކަށާއި، އެހެނިހެން އިސް ބޭފުޅުންނާ ބައްދަލުކޮށް އެފަދަ ކުދިންގެ ހައްގުގައި އެތައް ވާހަކަތަކެއް ދެކެވިފައި ވާނެކަމާއި ބައެއްފަހަރު އެކަމުން ރަނގަޅު ނަތީޖާއެއް ވެސް ފެންނަ ކަމުގައި މަރިޔަމް ފާހަގަކުރިއެވެ.
"އެގޮތަށް ހުންނާނެ މިވީ ދެތިން އަހަރުތެރޭގަ އެޑިއުކޭޝަން މިނިސްޓްރީއަށް ގޮސްފަ. އެޑިއުކޭޝަން މިނިސްޓަރާ ވަރަށް ބޮޑަށް ފޯކަސް ކުރެވޭ އެއީ މިކުދިންނާ ވަރަށް ބޮޑަށް ޑައިރެކްޓް ކޮށް ރިލޭޓް ވާތީވެ. ދެން ޖެންޑާ މިނިސްޓަރ، ހެލްތު މިނިސްޓަރ، މިހުރިހާ ބޭފުޅުންނާ މީޓްކޮށްފަ ހުންނާނީ،"
މަރިޔަމް
މީގެ އިތުރުން ވެސް އެފަދަ ކުދިންނާ ގުޅޭ އެހެން އިދާރާ ތަކާއި ބައްދަލު ކުރެވި އަދި އިތުރު ބޭފުޅުންނާ ބައްދަލު ކުރުމަށް ރޭވިފައިވާ ކަމުގައި ވެސް މަރިޔަމް ބުންޏެވެ. އެހެންނަމަވެސް މިކަމުގައި މުޖުތަމައުން ބައިިވެރިވާނެ އިތުރު މީހުން މަދުވުމާ ގުޅިގެން، ހަގީގަތުގައި އަޑު އުފުލަން ޖެހޭ މިންވަރަށް އަޑު އުފުލިފައި ނުވާ ކަމުގައި އޭނާ ފާހަގަކުރިއެވެ. އެކަމުގައި އާންމުންގެ އެހީތެރިކަން ބޭނުންކަމަށާއި، ހަމައެކަނި އެފަދަ ކުދިންގެ ބެލެނިވެރިން އެކުދިންގެ ހައްގުގައި ނިކުމެ ކުރާ މަސައްކަތުން ވެސް އެންމެ އެދެވޭ ނަތީޖާއެއް ނުލިބުނު ނަމަވެސް، އާންމުންގެ އެހީއާއެކު މިކަން ކުރެވޭނެ ނަމަ މިއަދު މިފަދަ ކުދިންގެ ހައްގުގައި އަޑު އުފުލަން ނުޖެހޭނެ ކަމުގައި ވެސް އޭނާ "ދެން"އާ ހިއްސާ ކުރިއެވެ.
ހަމައެއާއެކު މިހާރު ވެސް ސަރުކާރުން އެހީވެދޭކަން ފާހަގަކުރާ ކަމަށާއި، އެކަމަށް ޝުކުރުވެރިވާ ކަމުގައި ވެސް އޭނާ ފާހަގަކުރިއެވެ.
މަރިޔަމް ޔޫތު މިނިސްޓަރ މަހްލޫފާއި މިނިސްޓްރީގެ ބައެއް އިސްވެރިންނާއެކު
ނުކުޅެދުންތެރިކަން ހުންނަ ކުއްޖެއްގެ މަަންމައެއްގެ ހައިސިއްޔަތުން ބުނެލަން ބޭނުންވަނީ..
ނުކުޅެދުންތެރިކަން ހުންނަ ކުދިން ބަލާ ބޮޑުކޮށް އަދި އެކުދިންނަކީ މުޖުތަމަޢުގައި ބޭކާރުކޮށް އެހެންމީހުންނާ ބާކީ ކޮށްލަން ޖެހޭ ކުދިންނެއް ނޫނެވެ. އެކުދިންނަކީ އެއަށް ވުރެ މާ ޚާއްސަ ބައެކެވެ. އެކުދިންނަށް އަޅުގަނޑުމެންގެ ފަރާތުން އެހީތެރިކަމާއި ލޯތްބާއި އޯގާތެރިކަން އިންތިހާއަށް ބޭނުންވެއެވެ. އެކުދިންނަށް ކަންކަން ކުރުމުގައި އިތުރު ފުރުސަތުތައް ފަހިކޮށްދީ، އެކުދިންނަށް ކަންކަމުގައި އަބަދުވެސް ހިތްވަރު ދިނުމަކީ އަޅުގަނޑުމެން ކޮންމެ ފަރުދެއްގެ ވެސް ވާޖިބެކެވެ.
އެގޮތުން އެފަދަ ކުއްޖެއްގެ މައެއްގެ ހައިސިއްޔަތުން މުޖުތަމަޢަށް މަރިޔަމް ދޭން ބޭނުންވާ މެސެޖަކީ ކޮބައި ހެއްޔެވެ؟
"ކޮންމެ މީހަކަށް ވެސް ކުރެވޭނެ ކަންކަން ފޯކަސް ކުރޭ. އޭނާއަށް ނުކުރެވޭ ކަންކަމުގެ ވާހަކަ ދެއްކުމުގެ ބަދަލުގައި އޭނާާއަށް ކުރެވޭ ކަންކަމުގެ ވާހަކަ ދައްކާލިޔަސް އެހިސާބުން މުޖުތަމައުން ރަނގަޅު ބަދަލެއް ފެނިގެން ދާނެ"
މަރިޔަމް
މިގެ އިތުރުން ކޮންމެ އިންސާނެއް ވެސް އެ އިންސާނެއްގެ ހައިސިއްޔަތުން ބަލައިގަނެ، އެފަދަ މީހެއްގެ ކިބައިން ތިމާ ބޭނުންވާ ކަމެއް ނުކުރެވުނަސް، އެފަދަ މީހަކަށް ކުރެވޭ ކަންކަމާމެދު ވިސްނާލާ އެމީހުންނަށް ކުރެވޭ ކަންކަން ބަލައިގަނެ އެހިސާބުން އޭނާއަށް އެހީތެރިވެދީ، އިތުރު ކަންކަން ކުރުމަށް ދަސްކޮށްދިނުމުގައި އެންމެން މަސައްކަތް ކުރުމަށް މަރިޔަމް "ދެން"އާ ހިއްސާ ކުރިއެވެ.
ހަމައެއާއެކު މިއަދު ވަޒީފާ އަދާކުރުމުގައި ވެސް އެފަދަ ނުކުޅެދުންތެރިކަން ހުންނަ ކުދިންގެ އެކަނިވެރި މައިންނަށް ގިނަ ގޮންޖެހުންތަކަކާ ކުރިމަތިލާން ޖެހިފައިވާއިރު، އެކަމަށް ހައްލެއް ލިބޭނެ ދުވަހަކަށް ވެސް އިންތިޒާރު ކުރާ ކަމުގައި އޭނާ ބުންޏެވެ. ދުވާލެއްގެ މައްޗަށް 8 ގަޑިއިރު ވަޒީފާގައި ހޭދަކުރާއިރު، ދަރިފުޅަށް ދޭންވާ ވަގުތު ދޭންވާ ވަރަށް ވުރެ މަދުން ދެވުމަކީ ވަރަށް ބޮޑު މައްސަލައެއް ކަމަށާއި، އެކި ދާއިރާތަކުން ޑިގްރީ ފެންވަރުގައި ތައުލީމު ހާސިލުކޮށް އެންމެ އެކަށޭނެ ވަޒީފާއެއް ނުލިބި، އެފަދަ އެތައް، ހާއްސަ އެހީއަށް ބޭނުންވާ ކުދިންގެ އެކަނިވެރި މައިން މިއަދު ގިނަވެފައިވާ ކަމުގައި ވެސް އޭނާ ފާހަގަކުރިއެވެ.
ހަގީގަތުގައި ހާއްސަ އެހީއަށް ބޭނުންވާ ފަރާތްތަކަށް ކަންކަން ދަސްކޮށްދީ، އެފަރާތްތަކަށް ނުކުރެވޭ ކަންކަމުގެ ވާހަކަތައް ދެއްކުމުގެ ބަދަލުގައި އެފަދަ މީހުންނަށް ކުރެވޭ ކަންކަމުގެ ވާހަކަ ދެއްކުމަކީ އަނެކާއަށް ދެވޭ ހިތްވަރެއް ކަން ވެސް ގައިމެވެ. މަރިޔަމް ފަދަ އެތައް މައެއް އަދި އެތައް ބަފައެއް މިއަދު އަޅުގަނޑުމެންގެ މި ކުޑަކުޑަ މުޖުތަމަޢުގައި އެމީހުންގެ ދަރީންގެ ހައްގުގައި ނިކުމެ އުޅެއެވެ. އަދި އެފަދަ ކުދިން ތަރުބިއްޔަތު ކުރަމުން އަންނަ ބެލެނިވެރިން މިއަދު ވަޒީފާ އަދާ ކުރުމުގައި ވެސް ދަތިތަކާ ކުރިމަތިލާއިރު، އުއްމީދަކީ މުސްތަޤުބަލުގައި އެފަދަ ބެލެނިވެރިންނަށް ވަޒީފާ އަދާ ކުރުމުގައި ލުއި ފަސެހަ ގޮތްތަކެއް ހޯދައިދިނުމެވެ.
5000 ރުފިޔަަ