ދަރީންގެ ކުރިމަތީގައި މައިންބަފައިން ޒުވާބުކުރަން ހެޔޮ ނުވާނެ!
ދަރިންނަކީ ނިޢުމަތެކެވެ. މަތިވެރި އަމާނާތެކެވެ. ވީއިރު ދަރިން ތަރުބިއްޔަތު ކުރުމުގައި ކޮންމެ މައެއް ވެސް އަދި ބަފައެއް ވެސް ސަމާލުކަން ދޭން ޖެހޭ އެތައް ކަމެއް ވާކަން ކަށަވަރެވެ.
އެހެންނަމަވެސް އަޅުގަނޑުމެންގެ މި މުޖުތަމަޢުން ފެންނަމުންދާ ހިތާމަވެރި މަންޒަރަކީ ނިކަން ލޯބިން އުޅެމުން އަންނަ އާއިލާއެއް ކުޑަ ވަގުތުކޮޅެއްގެ ތެރޭގައި ބައިބައިވެގެން ދާ މަންޒަރެވެ. މަންމަ ނުވަތަ ބައްޕަގެ ލޯބިން މަޙުރޫމު ވެގެން ދާ ނިކަމެތި ދަރިފުޅު ރޯ ރުއިމުގެ އަޑު ކެނޑިގެން ނުދާ މަންޒަރެވެ. އެކަމުގެ ސަބަބުން އެ ދަރިފުޅު ތަހައްމަލު ކުރަން ޖެހެނީ ވޭނީ ދިރިއުޅުމެކެވެ.
ދަރީން ކުރިމަތީގައި، ޒުވާބު ކުރުމާއި، އެކަކު އަނެކަކަށް އަނިޔާ ކުރުމަކީ ހަމަ ޔަގީނުން ވެސް ނަފްސާނީ ގޮތުން ދަރީން ބަލިކަށި ކޮށްލާ ދިރިއުޅުން، ބަނަ ކޮށްލާ ކަމެކެވެ. ދަރީން ދަސްކުރަމުން ދާނީ އެމީހުންގެ ލޯ ކުރިމަތީގައި ހިނގަމުން އަންނަ ކަންކަމެވެ. މިފަދަ އެތައް ހާދިސާތަކެއް ދުނިޔޭގެ އެކި ކަންކޮޅުތަކުގައި ހިނގާފައިވާއިރު، އެކަމުގެ ސަބަބުން ދެމަފިރިން މުޅި އުމުރަށް ވެސް އެކަމާ ދެރަވާ ވަރުގެ ބޮޑު ހިތާމަތަކާ ކުރިމަތިލާން ޖެހިފައި އެބަ ހުއްޓެވެ.
ދެމަފިރީން ޒުވާބު ކުރާ މަންޒަރާއި އަނިޔާވެރިވާ މަންޒަރު ދަރީންނަށް ފެންނަ ނަމަ ކުއްޖާގެ މިޒާޖަށް ބޮޑެތި ބަދަލުތަކެއް އައިސް ކުއްޖާ ގަބުވުން ފަދަ ހާލަތަށް ބަދަލުވުމަކީ ވެސް ވުން އެކަށީގެންވާ ކަމެއް ކަމުގައި ނަފްސާނީ ޢިލްމުވެރިން އަންނަނީ ތަކުރާރުކޮށް ބުނެދެމުންނެވެ.
ދެމަފިރިއެއްގެ ދެމެދުގައި ހަމަނުޖެހުމެއް ހިނގައިފި ނަމަ ދަރީންނަށް ނާންގާ އެކަން ހައްލު ކުރެވޭތޯ މަސައްކަތް ކުރާށެވެ. އެހެނީ ދަރިންނަށް އެންމެ ނޭދެވޭ އަސަރު ކުރާނީ އެދަރިއެއްގެ މައިންބަފައިންގެ ކިބައިން ފެންނަ ނައްސި ކަންތަކުންނެވެ. އެންމެ ގާތުން ފެންނަ މަންޒަރު ތަކުން އެކުދިންގެ މިޒާޖާއި، ވިސްނުމަށް ބަދަލު އައުމަކީ ކޮންމެ ދުވަހަކުމެ ފެންނަ ހަގީގަތެވެ.
