ޖުމުހޫރީ ދުވަހާ ގުޅިގެން އަންނަ ބުރާސްފަތި ދުވަސް ސަރުކާރު ބަންދުކޮށްފި

ޖުމްހޫރީ ދުވަހުގެ މުނާސަބަތާ ގުޅިގެން، އަންނަ ބުރާސްފަތި ދުވަހަކީ ސަރުކާރު ބަންދު ދުވަހެއްގެ ގޮތުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ކަނޑައަޅުއްވައިފިއެވެ.

ރައީސުލްޖުމްހޫރިއްޔާގެ އޮފީހުން ބުނީ މިގޮތަށް ހަމަޖެއްސެވީ، ޖުމްހޫރީ ދުވަހާ ގުޅިގެން ސަރުކާރު ބަންދު ދުވަސްތަކަށް މެދުކެނޑުމެއް ނައިސް މުވައްޒަފުންނަށް ޗުއްޓީ ލިބޭނެ އިންތިޒާމު ހަމަޖައްސަވައިދެއްވުމުގެ ގޮތުން ކަމަށެވެ.

މިއަހަރުގެ ޖުމްހޫރީ ދުވަސް ފާހަގަކުރުމަށް ބާއްވާ ރަސްމީ ޖަލްސާ ބޭއްވުމަށް މިހާރު ތާވަލުކޮށްފައި ވަނީ މި މަހުގެ 19 ވާ ބުރާސްފަތި ދުވަހުގެ ރެއަށެވެ. ހުޅުމާލޭ ސެންޓްރަލް ޕާކުގައި ބާއްވާ މި ޖަލްސާ ފެށުމަށް ހަމަޖެހިފައި ވަނީ އެރޭ 8:30 ގައެވެ.

މި ޖަލްސާގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގައުމާ މުޚާތަބު ކުރައްވައި ވާހަކަފުޅު ދައްކަވާނެއެވެ. މީގެ އިތުރުން، މަތީ ދަރަޖަ ހޯދާ ފަރާތްތަކަށް ރައީސް ދެއްވާ ޚާއްސަ އިނާމާއި، ދައުލަތަށް ޚިދުމަތް ކުރުމުގެ އިނާމު ދިނުން ވެސް މި ރަސްމިއްޔާތުގައި އޮންނާނެއެވެ.