Monday, 16 November 2026
Advertisement
Allied Insurance (leaderboard)
ޚަބަރު

ލޯނު ފައިސާ ނުދެއްކުމުން ރީކޯ މޫސަގެ ރަހާ ރިސޯޓް ވިއްކާލަން އިއުލާނުކޮށްފި

ބީއެމްއެލް އިން ނެގި ލޯނަކަށް ފައިސާ ނުދެއްކުމުގެ ސަބަބުން، ހެވީލޯޑް މޯލްޑިވްސްގެ ރަހާ ރިސޯޓު ނީލަމުގައި ވިއްކާލަން އެ ބޭންކުން އިއުލާނުކޮށްފިއެވެ.

ރަހާ ރިސޯޓް މޯލްޑިވްސް / ފޮޓޯ: ބުކިން.ކޮމް
ރަހާ ރިސޯޓް މޯލްޑިވްސް / ފޮޓޯ: ބުކިން.ކޮމް

ބޭންކް އޮފް މޯލްޑިވްސް (ބީއެމްއެލް)އިން ދޫކުރި ލޯނަކަށް ގަވާއިދުން ފައިސާ ނުދެއްކުމުގެ ސަބަބުން، ހެވީލޯޑް މޯލްޑިވްސްގެ ރަހުނެއްގެ ގޮތުގައި އޮތް ލ. އަތޮޅުގެ ރަހާ ރިސޯޓު (ލ. ފަރެސް އަދި ކުޑަފަރެސް) ވިއްކާލުމަށް ބޭންކުން އިއުލާނުކޮށްފިއެވެ.

މި ރިސޯޓު ވިއްކާލުމުގެ ހުއްދަ ސިވިލް ކޯޓުން ދީފައި ވަނީ އެ ކުންފުނިން ދައްކަންޖެހޭ ފައިސާ ނުދެއްކުމާ ގުޅިގެންނެވެ.

ބީއެމްއެލްގެ އިއުލާނުގައިވާ ގޮތުން، 100 ކޮޓަރީގެ މި ރިސޯޓު ވިއްކާލަން ހަމަޖެހިފައި ވަނީ ފާޅުކަން ބޮޑު ނީލަމެއްގައެވެ. މި ރިސޯޓު ގަތުމަށް ހުށަހެޅޭނެ އެންމެ ދަށް އަގަކީ 45,633,000 އެމެރިކާ ޑޮލަރު (ގާތްގަނޑަކަށް 703.6 މިލިއަން ރުފިޔާ)އެވެ. މި ރިސޯޓުގެ ހެޑް ލީސް މުއްދަތު ހަމަވާނީ 18 ޑިސެމްބަރު 2064 ގައެވެ.

މި މައްސަލައަކީ 2016 ވަނަ އަހަރުގެ ޑިސެމްބަރު މަހު ހެވީލޯޑް މޯލްޑިވްސް އަށް ބޭންކުން ދޫކުރި 11 މިލިއަން ޑޮލަރުގެ ލޯނެއް އަނބުރާ ނުދެއްކުމުން ފެންމަތިވި މައްސަލައެކެވެ. މި ލޯނާ ގުޅިގެން ރަހުނު ވިއްކާލުމުގެ ހުއްދަ ކޯޓުން ދީފައި ވަނީ 2 ނޮވެމްބަރު 2026 ގައެވެ. ބޭންކުން ބުނި ގޮތުގައި ރިސޯޓު ވިއްކާލާނީ މިހާރު އޮތް ހާލަތުގައި ("އޭޒް-އިޒް-ވެއަރ-އިޒް" އުސޫލުން) ކަމަށެވެ.

ރަހުނު ކުރެވިފައިވާ މި ރަށްތަކުގެ ވެރިފަރާތަކީ ހެވީލޯޑް ކުންފުންޏާއި، ރައްޔިތުންގެ މަޖިލީހުގެ ކުރީގެ ނައިބު ރައީސް ރީކޯ މޫސާ މަނިކުގެ އިތުރުން އޭނާގެ ތިން ދަރިންނެވެ. މީގެ ކުރިން ވެސް މި ރަށްތައް ވިއްކާލަން ސިވިލް ކޯޓުން ހުއްދަ ދިން ނަމަވެސް، އެ ފަހަރުގެ ހުކުމް ހައި ކޯޓުން ވަނީ ބާތިލުކޮށްފައެވެ.

ރިއެކްޝަން

Advertisement
Ooredoo — Truecaller (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.