ބޯހިޔާވަހިކަމަށް އަނބުރާ ދައްކަން ނުޖެހޭ މާލީ އެހީދޭ ފުރަތަމަ ވެރިކަމަކީ މިއީ: ރައީސް
ބޯހިޔާވަހިކަމުގެ ދާއިރާއިން އަނބުރާ ދައްކަން ނުޖެހޭ މާލީ އެހީތެރިކަން ފޯރުކޮށްދޭ ފުރަތަމަ ސަރުކާރަކަށް މި ސަރުކާރު ވާނެ ކަމަށް ރައީސް ޑރ. މުޢިއްޒު ވިދާޅުވެއްޖެއެވެ.
ބޯހިޔާވަހިކަމުގެ ދާއިރާއިން ރާއްޖޭގެ ތާރީޚުގައި ވެސް ފުރަތަމަ ފަހަރަށް، އަނބުރާ ދައްކަން ނުޖެހޭ މާލީ އެހީތެރިކަން ފޯރުކޮށްދޭ ސަރުކާރަކަށް މި ސަރުކާރު ވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ސަރުކާރަށް އަހަރެއް ފުރުމާ ގުޅިގެން ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، އަމިއްލައަށް ގެދޮރު ބިނާކުރަން ބޭނުންވާ ފަރާތްތަކަށް މަގުފަހިކޮށްދިނުމަށް އަންނަ އަހަރު ހިލޭ މާލީ އެހީ ދޫކުރުމުގެ ދެ ޕްރޮގްރާމެއް ފަށްޓަވާނެ ކަމަށެވެ. އެއީ "ހެލްޕް ޓު ބައި" އަދި "ހެލްޕް ޓު ބިލްޑް" ސްކީމެވެ.
މި ދެ ސްކީމަށް އަންނަ އަހަރުގެ ބަޖެޓުން އެއް ބިލިއަނެއްހާ ރުފިޔާ ޚާއްޞަކުރާނެ ކަމަށް ރައީސް ވިދާޅުވިއެވެ. އޭގެ ތެރޭގައި ބަޖެޓުގައި ހިމަނާ 750 މިލިއަން ރުފިޔާއާއި މިހާރު ފަންޑުގައި ހުރި 250 މިލިއަން ރުފިޔާ ހިމެނެއެވެ. މިއީ ރާއްޖޭގައި މިގޮތަށް ދޫކުރާ ފުރަތަމަ ފައިނޭންސް ފެސިލިޓީކަން ރައީސް ފާހަގަކުރެއްވިއެވެ.
ރައީސް ވިދާޅުވި ގޮތުގައި "ހެލްޕް ޓު ބިލްޑް" ސްކީމުގެ ދަށުން، ލޯނު ނަގާއިރު ބޭންކަށް ދައްކަންޖެހޭ އިކުއިޓީގެ ތެރެއިން ބޮލަކަށް ދެ ލައްކަ ރުފިޔާ ސަރުކާރުން ދޭނެއެވެ. އަދި "ހެލްޕް ޓު ބައި" ސްކީމުގެ ދަށުން ފްލެޓް ނުވަތަ ގޯތި ގަންނަ ފަރާތްތަކަށް ބޮލަކަށް ދެ ލައްކަ ފަންސާސް ހާސް ރުފިޔާގެ ހިލޭ އެހީ ދިނުމަށް ވަނީ ނިންމާފައެވެ.
މީގެ އިތުރުން، މިހާރު ކުރިއަށްދާ ފަސް އިންސައްތަ އިންޓްރެސްޓުގެ "ހިޔާވަހި ފައިނޭންސް" ސްކީމުގެ ދަށުން މިހާތަނަށް 454 ފަރާތަކަށް 435 މިލިއަން ރުފިޔާ ދޫކޮށްފައިވާ ކަމަށް ރައީސް ވިދާޅުވިއެވެ. މި ސްކީމް މެދުވެރިކޮށް ވެސް އަހަރަކު އެއް ބިލިއަން ރުފިޔާ ދޫކުރުމަށް ސަރުކާރުން ވަނީ އަމާޒު ހިފާފައެވެ.





ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.