އަހަރެއް ފަހުން މަރު ކޮމިޝަންގެ ޕްރެސްއެއް
އަހަރެއްހާ ދުވަސް ފަހުން ވީނުވީއެއް ނޭނގި ގެއްލިފައިވާ މީހުންނާއި ގޮތް ނޭނގޭ މަރުތަކާ ބެހޭ ރިޔާސީ ކޮމިޝަނުން މިއަދު ނޫސްވެރިންގެ ބައްދަލުވުމެއް ބާއްވަން ނިންމައިފިއެވެ.
އެ ކޮމިޝަނުން ބުނީ މި ބައްދަލުުން އޮންނާނީ މިއަދު މެންދުރު 1 ޖަހާއިރު ކަމަށެވެ.
މިއީ އެ ކޮމިޝަންގެ ރައީސް އަކަށް ކުރިން ހުންނެވި ހުސްނުއްސުއޫދު، ސުޕްރީމް ކޯޓުގެ ފަނޑިޔަރުކަމަށް 2019 ވަނަ އަހަރުގެ ޑިސެންބަރު މަސް ތެރޭގައި އައްޔަން ކުރެއްވުމަށް ފަހު، ބާއްވާ ފުރަތަމަ ޕްރެސްއެވެ.
މިހާރު ކޮމިޝަންގެ ރައީސް އަކަށް ހުންނެވީ ފަރީޝާ އަބްދުﷲ އެވެ. އެ ކޮމިޝަންގައި މިހާރު ތިއްބެވި މެންބަރުގެ ތެރޭގައި ހިމެނެނީ ފަރީޝާގެ އިތުރުން އަހުމަދު ނާޝިދާއި، މިސްބާހު އައްބާހެވެ.
ރައީސް އިބްރާޙިމް މުޙައްމަދު ސޯލިހު، އެކުލަވާލެއްވި މި ކޮމިޓީން އަންނަނީ ގިނަ މައްސަލަތަކެއް އިތުރަށް ތަޙުޤީޤު ކުރަމުންނެވެ. އޭގެ ތެރޭގައި މަޝްޙޫރު ދީނީ ޢިލްމުވެރިޔާ ޑރ.އަފްރާޝިމް ޢަލީ އާއި، ގެއްލިފައިވާ ނޫސްވެރިޔާ އަޙުމަދު ރިޟުވާންގެ މައްސަލަ އަދި ބްލޮގަރު ޔާމީން ރަޝީދުގެ މަރުގެ މައްސަލަ ވެސް ހިމެނެއެވެ.