އެކި މައްސަލަތަކާ ގުޅިގެން 11 މީހެއްގެ ޕާސްޕޯޓް ވަނީ ހިފަހައްޓާފައި: މަރު ކޮމިޝަން
ކޮމިޝަނުން ބަލަމުންދާ މައްސަލަތަކާ ގުޅިގެން މިހާތަނަށް 11 މީހެއްގެ ޕާސްޕޯޓް ހިފަހައްޓާފައި ވާކަމަށް މަރު ކޮމިޝަނުން ބުނެފިއެވެ.
މިއަދު ބޭއްވި ޚާއްސަ ޕްރެސް ކޮންފަރެންސްގައި ވާހަކަ ދައްކަމުން ކޮމިޝަންގެ މެމްބަރު މިސްބާހު އައްބާސް ވިދާޅުވީ ގެއްލުވާލާފައިވާ މީހުންނާއި މަރާލާފައިވާ މީހުންގެ މައްސަލަތައް ބެލުމަށް އުފައްދާފައިވާ ރިޔާސީ ކޮމިޝަނުން ބަލަމުންދާ އެކި މައްސަލަތަކާ ގުޅިގެން ޖުމްލަ 11 މީހެއްގެ ޕާސްޕޯޓް ހިފަހައްޓަފައި ވާ ކަމަށެވެ.
މިއަދު ނޫސްވެރިންގެ ބައްދަލުވުން ބާއްވާފައި ވަނީ މިނިވަން ނޫހުގެ ނޫސްވެރިޔާ އަހްމަދު ރިޟްވާންގެ މައްސަލައާ ގުޅިގެންނެވެ. މިސްބާހް ވިދާޅުވީ، އެކި މައްސަލަތަކުގައި ޖުމްލަ 11 މީހެއްގެ ޕާސްޕޯޓް ހިފަހައްޓާފައި ވާއިރު، ރިޟްވާންގެ މައްސަލައާ ގުޅިގެން ހިފެހެއްޓީ ކިތައް މީހުންގެ ޕާސްޕޯޓްކަން ސީދާ ދަންނަވަން ދަތި ކަމަށެވެ. އެ މައުލޫމާތު ފަހުން ދެއްވާނެ ކަމަށް މިސްބާހު ވިދާޅުވިއެވެ.
ކޮމިޝަނަށް 2 އަހަރު ވެގެން ގޮސްފައިވާއިރު 27 މައްސަލައެއް ބަލައި ބައެއް މައްސަލަތަކުގެ ރިޕޯޓް ރައީސުލްޖުމްހޫރިއްޔާއަށް އަރުވާފައިވާކަމަށާއި ގިނަ ކުރިއެރުންތަކެއް ހޯދިފައިވާކަމަށް މިސްބާހު ވިދާޅުވިއެވެ.
