ބޮޑުބޭބެ ރާޖީވްގެ ކުރީގެ ފޮޓޯއެއް ހިއްސާކޮށް، ކަރީނާ ލިޔެފައިވަނީ ހިތް ކުދިކުދި ވެއްޖެ ކަމަށް!
ބޮލީވުޑުގެ މަޝްހޫރު އެކްޓަރު ރާޖިވް ކަޕޫރުގެ ކުއްލި މަރާއެކު މުޅި އިންޑިއާއަށް ވެސް ލިބިފައިވަނީ ކުއްލި ސިހުމެކެވެ. އަދި މިޚަބަރާއެކު ބޮލީވުޑު އާއިލާއަށް ވެރިވެގެން ދިޔައީ ފުން ހިތާމައެކެވެ. އެގޮތުން ބޮލީވުޑުގެ ބައެއް ތަރިން ކަމަށްވާ މަދޫރީ އާއި ސަނީ ޑިއޯލް އާއި އަކްޝޭ ކުމާރު އަދި މިނޫން ވެސް ފަންނާނުން ވަނީ މީސްމީޑިއާގައި މިކަމާ ގުޅިގެން ހިތާމަ ފާޅުކޮށްފައެވެ.
ރާޖީވްގެ މަރާއެކު ކަޕޫރު އާއިލާއަށް ލިބިގެން ދިޔައީ ވަރަށް ވެސް ބޮޑު ހިތާމައެކެވެ. އާއިލާގެ އެއް މެންބަރު ކަމުގައިވާ ރިޝީ ކަޕޫރު ދުނިޔެ ދޫކޮށް މާގިނަ ދުވަސްތަކެއް ނުވެ ރާޖީވް ދުނިޔެ ދޫކުރުމުން އެއާއިލާގެ މައިކަށި ވަނީ ބިންދައިގެން ގޮސްފައެވެ. މިހިތާމަވެރި ވަގުތުގައި ބޮލީވުޑުގެ މަޝްހޫރު އެކްޓްރެސް އަދި ރާޖީވަށް ބޮޑުބޭބެ ކިޔާ އޭނާގެ ކޮއްކޮ ކަރީނާ ކަޕޫރު ވަނީ ބޮޑުބޭބެއާއެކު ނަގައިފައިވާ ފޮޓޯއެއް މީސްމީޑިއާގައި ހިއްސާ ކޮށްފައެވެ.
ކުޑަ ދުވަސްކޮޅެއްގެ ތެރޭގައި ވިހަން ތައްޔާރުވެފައި އިން ކަރީނާ މި ފޮޓޯ ހިއްސާ ކުރަމުން ބުނެފައި ވަނީ ހިތް ކުދިކުދި ވެއްޖެ ކަމަށެވެ.
"ހިތް ކުދިކުދި ވެއްޖެ، ނަމަވެސް ހިތްވަރު ކުރާނަން" ކަރީނާ ބުނެފައި ވެއެވެ.
ދެވަނަ ދަރިއަށް ބަނޑުބޮޑުވެ އިން ކަރީނާ ވިހެއުމަށް މާގިނަ ދުވަހެއް ދެން ނެތެވެ. އަދި މިފަދަ ނާޒުކު ދަނޑިވަޅެއްގައި ކަރީނާގެ ލޯބިވާ ބޮޑުބޭބެ ވަކިވެދިއުމަކީ ކަރީނާއަށް ލިބިގެން ވަރަށް ބޮޑު ހިތާމައެއް ގޮތުގައި އޭނާ ވަނީ ސިފަ ކޮށްފައެވެ.
https://www.instagram.com/p/CLEW4PoJyu4/?igshid=1rlu3xchhxbbx
ރާޖީވްގެ މަރާއެކު ބޮލީވުޑް އާއިލާގެ ގިނަ ފަންނާނުންތަކެއް ވަނީ މީސްމީޑިއާގައި ހިތާމަ ފާޅު ކޮށްފައެވެ. އަދި އޭނާގެ ގިނަ ސަޕޯޓަރުން ވެސް އެ ހިތާމައިގައި ބައިވެރިވެފައި ވެއެވެ.
ރާޖީވް ކަޕޫރުގެ ފާހަގަކޮށްލެވޭ ފިލްމުތަކުގެ ތެރޭގައި ރާމް ތެރީ ގަންގާ މޭލީ (1985) އަދި އެކް ޖާންހޭ ހަމް (1983) ފާހަގަ ކޮށްލެވެއެވެ. މީގެ އިތުރުން ރާޖީވް ޑައިރެކްޓް ކޮށްފައިވާ ފިލްމު ތަކުގެ ތެރޭގައި ޕްރޭމް ގްރާންތު ފާހަގަ ކޮށްލެވެއެވެ.
