އަޝްފާޤާއި އަކްރަމްގެ އަގު ވައްޓާލަން މަސައްކަތް ކުރުމަކީ ޤައުމަށް ވެވޭ ޚިޔާނާތެއް: އަދުރޭ
ޤައުމީ ފުޓްބޯޅައިގެ ދެ ކެޕްޓަނުން ކަމަށްވާ އަލީ އަޝްފާޤު (ދަގަނޑޭ) އާއި އަކްރަމް އަބްދުލްޣަނީ (އަކޫ)ގެ އަގުވައްޓާލަން މަސައްކަތް ކުރުމަކީ ޤައުމަށް ވެވޭ ޚިޔާނާތެއް ކަމަށް ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ) ވިދާޅުވެއްޖެއެވެ.
މިރޭ ކުރެއްވި ޓްވީޓެއްގައި އަޝްފާޤު އާއި އަކްރަމް އަކީ ޤައުމަށް ރީތި ނަން ހޯއްދަވާފައިވާ ދެ ބަޠަލުންގެ ގޮތުގައި އަދުރޭ ވަނީ ސިފަ ކުރައްވާފައެވެ. އަދި އެ ދެ ބޭފުޅުންނަށްޓަކައި ޤައުމު ފަޚުރުވެރިވާ ކަމަށް ވެސް އަދުރޭ ވަނީ ވިދާޅުވެފައެވެ.
އަދުރޭގެ ޓްވީޓްގައި އިތުރަށް ވިދާޅުވެފައި ވަނީ އަކްރަމް އާއި އަޝްފާޤްގެ އަގު ވައްޓާލަން މަސައްކަތް ކުރުމަކީ ޤައުމަށް ވެވޭ ޚިޔާނާތެއް ކަމަށާއި އެކަން ހުއްޓާލުމަށް ގޮވާލާ ކަމަށެވެ.
އަޝްގާޤު އާއި އަކްރަމް އަކީ ޓެރަރިސްޓުންގެ ގޮތުގައި ސިފަކޮށް ޓްވީޓާގައި މީހަކު ވާހަކަ ދައްކާފައިވާތީ އެކަމާ ދެކޮޅަށް ގިނަ ބަޔަކު އަންނަނީ ވާޙަކަ ދައްކަމުންނެވެ. އަދި އެކަމާ ދެކޮޅަށް ފިޔަވަޅު އެޅުމަށް ފުރަތަމަ ޑިވިޝަނުގެ ކްލަބްތަކުންނާއި އެފްއޭއެމުން ވެސް ވަނީ ކަމާބެހޭ ފަރާތްތަކަށް ގޮވާލާފައެވެ.
