އާބާދީގެ ގޮތުން ބަލާއިރު 5 ވަނައަށް އެންމެ ގިނަ މީހުން ވެކްސިން ޖެހި ގައުމަކަށް ރާއްޖެ!
ދިވެހިރާއްޖެ އަކީ އާބާދީގެ ގޮތުން ބަލާއިރު 5 ވަނައަށް އެންމެ ގިނަ މީހުން ވެކްސިން ޖެހި ގައުމުކަން ދިރާސާއަކުން ދައްކައިފިއެވެ.
މިފަދަ ކަންތައްތައް ދިރާސާކޮށް މައުލޫމާތު ހާމަ ކުރާ ވެބްސައިޓެއް ކަމަށްވާ "އަވަރ ވޯރލްޑް އިން ޑޭޓާ"ގެ ތަފާސް ހިސާބުތަކުން ދައްކާ ގޮތުގައި ރާއްޖެ އަކީ ކޮންމެ 100 މީހެއްގެ ނިސްބަތުން ފަސްވަނައަށް އެންމެ ގިނަ މީހުން ވެކްސިނޭޓް ކޮށްފައިވާ ގައުމެވެ.
އެ ޖަމިއްޔާއިން ހާމަކޮށްފައިވާ ގޮތުގައި، ފެބްރުވަރީ މަހުގެ 14 ވަނަ ދުވަހާ ހަމައަށް ކޮންމެ ދުވަހަކު އެވަރެޖްކޮށް 100 މީހުންގެ ތެރެއިން 0.79 މީހުންގެ ގަޔަށް ވެކްސިންގެ އެއް ޑޯޒް ދެވެއެވެ. މި ލިސްޓުގައި ރާއްޖެއަށްވުރެ ކުރީގައި އުޅޭ ގައުމު ތަަކަކީ އިސްރާއިލް، ޔޫއޭއީ، ޗިލީ އަދި ސާބިއާރ އެވެ.
ދުނިޔޭގައި އެންމެ ފުރަތަމަ ވެކްސިން ޖަހަން ފެށި ގައުމުތައް، އަދި ރާއްޖެއަށްވުރެ ވަސީލަތްތަކުގެ ގޮތުން މުއްސަނދި ގައުމުތައް ވެސް މި ލިސްޓުގައި އުޅެނީ ރާއްޖެއަށްވުރެ ފަހަތުގައެވެ. އެގޮތުން އިނގިރޭސިވިލާތް، އެމެރިކާ، ސްވިޒަރލޭންޑް، އިންޑިއާ އަދި ޗައިނާއަސްވުރެ ވެސް ރާއްޖެ އޮތީ ކުރީގައެވެ. އެންމެ ފުރަތަމަ ވެކްސިން ދޭން ފެށި ގައުމަކީ އިނގިރޭސި ވިލާތަށްވާއިރު އާބާދީގެ ނިސްބަތުން އެގައުމަށްވުރެ ގިނަ މީހުން ރާއްޖެއިން ވަނީ ވެކްސިނޭޓް ކޮށްފައެވެ.
ރާއްޖޭގައި ވެކްސިން ދިނުން ފަށާފައިވަނީ ފެބްރުވަރީ މަހުގެ އެއްވަނަ ދުވަހުގައެވެ. ރާއްޖޭގައި މިހާރު ޖަހަމުންދާ ވެކްސިނަކީ އޮކްސްފޯޑް އެކްސްޓްރާޒެނަކާ ފޯމިއުލާ ބޭނުންކޮށްގެން އިންޑިއާގެ ސީރަމް އިންސްޓިޓިއުޓުން ތައްޔާރު ކޮށްފައިވާ "ކޮވީޝީލްޑް" ވެކްސިނެވެ.
އިންޑިއާގެ ހިލޭ އެހީގެ ދަށުން ރާއްޖެއަށް މި ވެކްސިންގެ އެއްްލައްކަ ޑޯޒް ލިބިފައިވާއިރު، މި ޑޯޒްތައް ހުސްވަންދެން ވެކްސިން ޖެހުމަށް ވަނީ ހަމަޖެހިފައެވެ. އަދި ވެކްސިންގެ ދެވަނަ ޑޯޒް މި މަހުގެ ތެރޭގައި ލިބޭނެ ކަމަށް ހެލްތު އިމަރޖެންސީ އޮޕަރޭޝަން ސެންޓަރު (އެޗްއީއޯސީ) އިން ބުނެއެވެ.
މިހާތަަނަށް ރާއްޖޭގައި 44،817 މީހެއްގެ ގަޔަށް ވެކްސިން ޖަހާފައިވާއިރު އޭގެ ތެރެއިން 31،322 މީހުންނަކީ ގްރޭޓަރ މާލެ ސަރަހައްދުން ވެކްސިން ޖެހި މީހުންނެވެ. އަދި 7،170 މީހުންގެ ގަޔަށް ވެކްސިން ޖަހާފައިވަނީ އަތޮޅު ތެރެއިންނެވެ.
Ads by STO
