ޕާކިން ޖާގަތަކުގެ އަގު މިހާރު މާ ބޮޑު، އެ އަގު ކުޑަ ކުރާނަން:ޑރ.މުޢިއްޒު
ހަތަރު ފުރޮޅީ އުނޅަދުތައް ޕާކް ކުރުމަށް މާލޭ ސިޓީ ކައުންސިލުން ކަނޑައަޅާފައިވާ ޕާކިން ސްލޮޓްތަކަށް ކަނޑައަޅާފައިވާ އަގުތަކަކީ މާ ބޮޑު އަގެއް ކަމަށް ކުރީގެ ހައުސިން މިނިސްޓަރ ޑރ. މުޙައްމަދު މުޢިއްޒު ވިދާޅުވެއްޖެއެވެ.
މާލޭ މޭޔަރު ކަމަށް ވާދަ ކުރައްވާ މުޙައްމަދު މުޢިއްޒު ، ރޭ އޮންލައިންކޮށް ބޭއްވެވި އާންމު ބައްދަލުވުމެއްގައި ވިދާޅުވީ ސިޓީ ކައުންސިލުން ޕާކިން ޖާގަތަކަށް މިހާރު ކަނޑައަޅާފައިވާ އަގު ކަމަށްވާ -/3،000 ރުފިޔާ އަކީ މާ ބޮޑު އަގެއް ކަމަށާއި އެތަނުގެ އަގު ހުންނަން ވާނީ މަތިވެގެން -/1000 ރުފިޔާއަށް ކަމަށެވެ. އަދި އެމަނިކުފާނުގެ ނަޒަރުގައި އެތަނަށް އެންމެ އެކަށީގެންވާ އަގަކީ 500 ރުފިޔާއާއި 1000 ރުފިޔާއާ ދެމެދުގެ އަގެއް ކަމަށް ވެސް މުއިއްޒު ފާހަގަ ކުރެއްވިއެވެ.
މުއިއްޒު ވިދާޅުވީ އެފަދަ ބޮޑު އަގެއް ޓެކްސީ ޑްރައިވަރުން އަތުން ނެގުމުން އެމީހުންނަށް ލިބޭ އާމްދަނީގެ ބޮޑު ބައެއް ޕާކިންއަށް ޚަރަދު ކުރަން ޖެހޭ ކަމަށާއި އޭގެ އިތުރުން ވެސް އެތައް ޖޫރިމަނާތަކަކާ އެމީހުން ކުރިމަތިލާން ޖެހޭ ކަމަށެވެ.
ޑރ.މުޢިއްޒު ވަނީ އެމަނިކުފާނު މޭޔަރު ކަމަށް ހޮވިއްޖެނަމަ ސިޓީ ކައުންސިލުން ދޫކުރާ 4 ފުރޮޅީ އުޅަނދުތައް ޕާކް ކުރުމަށް ދޫކުރާ ޕާކިން ޖާގައިގެ ކުލި 3000 ރުފިޔާއިން 1000 ރުފިޔާއާއި 650 ރުފިޔާއާ ދެމެދުގެ އަގަކަށް ކުޑަ ކުރެއްވުމަށް ވައުދުވެވަޑައިގެންފައެވެ.
