އިތުރަށް ފައިސާ ނުލިބި އިންތިހާބު ނުބޭއްވޭނެ: ޝަރީފު
އިތުރަށް ބޭނުންވާ ފައިސާ ނުލިބި އިންތިހާބު ނުބޭއްވޭނެކަމަށް އިލެކްޝަން ކަމިޝަން (އީސީ)ގެ ރައީސް އަހުމަދު ޝަރީފު ވިދާޅުވެއްޖެއެވެ.
ޝަރީފް މިހެން ވިދާޅުވެފައި ވަނީ ރައްޔިތުންގެ މަޖިލީހުގެ މާލިއްޔަތު ކޮމެޓީގައި މިއަދު ވާހަކަފުޅު ދައްކަވަމުންނެވެ. ޝަރީފު ވިދާޅުވީ ބޮޑު ހަރަދެއް ހިނގާ އިރު އެފައިސާ ނުލިބި އިންތިހާބު ނުބޭއްވޭނެ ކަމަށެވެ.
ޝަރީފު ވިދާޅުވީ އެންމެ ބޮޑު ހޭދައެއް ހިނގަނީ ވޯޓުލާ މަރުކަޒުގެ ކަންކަން އެޗްޕީއޭގެ ގައިޑުލައިންނާ އެއްގޮތަށް ކުރުމަށް ކަމަށެވެ. އެގޮތުން ކޮންމެ ވޯޓުލާ މަރުކަޒަކަށް އިތުރަށް ތިން އޮފިޝަލުން ނަގަން ޖެހޭ ކަމަށެވެ. އަދި މުޅި ޖުމުލަ ވޯޓުލާ މަރުކަޒުތަކަށް ބެކަޕް ޕްލޭންްއަކާ ނުލާ 8،000 އޮފިޝަލުން ބޭނުންވާ ކަމަށެވެ.
ކޮމިޓީގައި ވާހަކަ ދައްކަވަމުން އީސީގެ ރައީސް އަހްމަދު ޝަރީފް ވިދާޅުވީ، ކޮވިޑް ބަލިމަޑުކަމުގައި އިންތިހާބު ބާއްވާނަމަ އިންތިހާބަށް ގިނަ އަދަދަކަށް ހަރަދު ކުރުމުގެ އިތުރުން ގިނަ ވަގުތު ވެސް ހޭދަ ވާނެ ކަމަށެވެ.
އަންނަ އެޕްރީލް މަހުގެ 10 ވަނަ ދުވަހު ބާއްވާން ނިންމާފައިވާ ކައުންސިލް އިންތިހާބުގެ އެންމެ ފަހުގެ މައުލޫމާތު ހިއްސާ ކުރުމަށް އިލެކްޝަން ކޮމިޝަނުން ބާއްވާ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ކޮމިޝަނުގެ ރައީސް އަހުމަދު ޝަރީފް ވިދާޅުވީ، އިންތިހާބުގައި ވޯޓުލުމަށް 735 މަރުކަޒު ގާއިިމު ކުރަން ޖެހޭ ކަމަށެވެ. މީގެކުރިން އީސީން ލަފާ ކޮށްފައިވާ އަދަދަކީ 532 މަރުކަޒެވެ.
