3 މަހަށް ވުރެ ގިނަ ދުވަސް ފަހުން މާލޭގައި ކުރެވުނު ފުރަތަމަ ހުކުރު ނަމާދު، އުފާވެރި އިހްސާސްތަކެއް!
ތިން މަހަށް ވުރެ ގިނަ ދުވަހަށް ފަހު މާލޭ ސަރަހައްދުގެ މިސްކިތްތަކުގައި މިއަދު ހުކުރު ނަމާދު ކޮށްފިއެވެ.
ކޮވިޑް-19 ގެ ސަބަބުން މިއަހަރުގެ މާރިޗު މަހުގެ 20 ވީ ހުކުރު ދުވަހުގެ ފަހުން މާލޭގެ މިސްކިތްތަކުގައި ހުކުރު ނަމާދު ކޮށްފައެއް ނުވެއެވެ. އެހެން ކަމުން މާލޭގައި ހުކުރު ނަމާދު ނުކޮށް 16 ހުކުރު މިހާރު މިވަނީ ފާއިތުވެ ގޮސްފައެވެ. ނަމަވެސް ފުރަބަންދުގެ ލުއި ތަކާއެކު މިސްކިތްތައް ހުޅުވާލައިމިއަދު މިވަނީ ރައްކާތެރިކަމުގެ ފިޔަވަޅު ތަކާއެކު މާލޭގެ ހުރިހާ މިސްކިތެއްގައި ވެސް ހުކުރު ނަމާދު ކޮށްފައެވެ.
އަޅުގަނޑުމެންގެ މުޖުތަމައުގައި މިއަދު ތިބި އެންމެ ދުވަސްވީ މީހުންގެ ހަނދާނުގައިވެސް ރާއްޖޭގައި ހުކުރު ނަމާދު ނުކުރަން ޖެހޭފަދަ ހާލަތެއް ކުރިމަތި ނުވާކަމުގައި އެފަރާތްތަކުން ބުނެއެވެ. އަދި ހަމަ އެހެންމެ ނަމާދު ނުކޮށް މިސްކިތްތައް ބަންދު ކުރަން ޖެހޭ ފަދަ ހާލަތެއް ކުރިމަތި ނުވާ ކަމުގައި ވެސް ގިނަ ބަޔަކުވަނީ ބުނެފައެވެ. މިކަމުން ދައްކުވައިދެނީ ކޮވިޑް-19 ގެ ބިރުވެރިކަމެވެ.
މިއަދު މާލޭ ސަރަހައްދުގެ މިސްކިތްތަކުގައި ހުކުރު ނަމާދު ކޮށްފައިވާއިރު ގިނަ ބަޔަކު ވަނީ ހުކުރު ނަމާދުގައި ބައިވެރިވެފައެވެ. ގިނަ ބަޔަކު އަމިއްލަމުޞައްލައެއް ހިފައިގެން މިސްކިތަށް ގޮސްފައިވާއިރު ގިނަ ފަރާތްތަަކުން ރައްކާތެރިކަމުގެ ފިޔަވަޅެއްގެ ގޮތުން މާސްކު އަޅައިގެން މިސްކިތަށް ދިޔަ ކަން ފާހަގަކުރެވެއެވެ.
އެތައް ދުވަހަކަށް ފަހު ހުކުރު ނަމާދު ކުރެވުމުން މިއަދު ކުރެވެނީ އުފާވެރި އިހުސާސެކެވެ. ހުކުރު ނަމާދަށް ގޮސް ހުތުބާ އަޑުއަހާލައ ނަމާދު ކޮށްލުމުން އެ ލިބޭހިތްހަމަ ޖެހުން އެތައް ދުވަހަކަށް ފަހު މިއަދު ލިބިއްޖެއެވެ.
ނަމަވެސް މިއަދު އެެއް ކަމެއް ތަފާތެވެ. ނަމާދުކޮށް ނިންމުމަށްފަހު ސަލާން ގަލާންކޮށް ހެދުމެއް މިއަދު ނެތެވެ. ނަމަވެސް އެއީ މިއަދަށް ހުރި ގޮތެވެ. ރައްކާތެރިކަމުގެ ފިޔަވަޅު ތަކާއެކު ނަމަވެސް މިއަދު ހުކުރު ނަމާދު ކުރުމުގެ ފުރުސަތު ލިބުނުކަމަށް ޓަކައި اللهގެ ހަޒްރަތަށް ހަމްދާއި ޝުކުރު ކުރަިމެވެ.
Ads by STO
