ޓްރާންސްޕޯޓް އުވާލުމަށް މަޖިލީހަށް ވާނީ ހުށަހަޅާފައި: ރައީސް ޞާލިޙް
ޓްރާންސްޕޯޓް އޮތޯރިޓީ އުވާލުމަށް ރައްޔިތުންގެ މަޖިލީހަށް މިހާރު ހުށަހަޅާފައިވާނެ ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ކުރިއަށް އޮތް ލޯކަލް ކައުންސިލު އިންތިހާބުގައި މާލެސިޓީ ކައުންސިލަށް ވެރިކަންކުރާ އެމްޑީޕީގެ ޓިކެޓުގައި ވާދަ ކުރައްވާ ކެންޑިޑޭޓުންނާއެކު "ރަށްވެހި ފަތިސް" ކެމްޕޭން އިވެންޓްގައި ވާހަކަ ދައްކަވަމުން ރައީސް ޞާލިޙު މިރޭ ވިދާޅުވީ މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަންގައި މައްސަލަތަކެއް ހުރި ކަމަށް ދެކިލައްވާ ކަމަށެވެ.
އެގޮތުން ޓްރާންސްޕޯޓް މިނިސްޓްރީ އާއި ޓްރާންސްޕޯޓް އޮތޯރިޓީއާ ދެމެދު ގާނޫނީ ފުށުއެރުންތަކެއް ހުރިކަމަށް ދެކިލައްވާ ކަމަށާއި ޓްރާންސްޕޯޓް އޮތޯރިޓީގެ ގާނޫނު އުވާލުމަށް ރައްޔިތުންގެ މަޖިލިހަށް ހުށަހަޅުއްވާފައިވާނެ ކަމަށް ވެސް ރައީސް ވިދާޅުވިއެވެ.
ވެހިކަލް ރެޖިސްޓްރީ ކުރުމުގައި ސިޓީ ކައުންސިލަށް ވެސް ކުރެވޭނެ ކަންތައްތަކެއް އެބަހުރި ކަމަށާއި އެގޮތުން ހުރިހާ ސިޓީތަކެއްގެ ވެހިކަލްތަކުގެ ރެޖިސްޓްރީ ބެލެހެއްޓުން ލާމަރުކަޒީކޮށްގެން ދޫކޮށްލެވިއްޖެނަމަ މައި ސަރުކާރަށް އެކަމުގެ ލުއިތައް ލިބިގެންދާނެ ކަމަށް ދެކިލައްވާ ކަމަށް ވެސް ރައީސް ޞާލިޙު ވިދާޅުވިއެވެ.
ޓްރާންސްޕޯޓް މިނިސްޓްރީގައި މައްސަލަތަކެއް ހުރި ކަމަށް ރައީސް ވިދާޅުވިއިރު މިއަދު ހެނދުނު އެ މިނިސްޓްރީ ތެރޭގައި ބަޔަކު އިހުތިޖާޖު ވެސް ކޮށްފައިވެއެވެ.
