ރައްޔިތުންނަށް ދަތުރުނުކުރެވޭއިރު، ކެމްޕެއިން ދަތުުރުތައް ކުރެވޭ ސަބަބު ރައްޔިތުންނަށް ހާމަކޮށްދޭންޖެހޭ: ދިޔާނާ
ކެމްޕެއިނު ދަތުރުތަކަށް ކަރަންޓީނު ނުވެ ދެވޭ އުސޫލަށް ކުރީގެ ބަންޑާރަ ނައިބު ދިޔާނާ ސައީދު ވަރަށް ބޮޑަށް ފާޑު ވިދާޅުވެއްޖެއެވެ.
މިކަމާ ގުޅިގެން ދިޔާނާ ކުރެއްވި ޓްވީޓުގައި ވިދާޅުވީ ދަތުރުފަތުރު ކުރުމަކީ ގާނޫނު އަސާސީގެ 41 ވަނަ މާއްދާގެ ދަށުން ލިބިދޭ އަސާސީ ހައްގެއް ކަމަށެވެ.
އަދި މިފަދަ އަސާސީ ހައްގެއް ގާނޫނުގެ ދަށުން ހިފަހައްޓަން ޖެހޭ ހާލަތުގައި ވެސް ހިފަހައްޓަން ޖެހޭނީ ރައްޔިތުންގެ މެދުގައި ހަމަހަމަކަމާއެކު ތަފާތުކުރުން ނެތް ފަދަ އުސޫލަކުން ކަމަށް ދިޔާނާ ވިދާޅުވިއެވެ.
އެގޮތުން ސިއްހީ ނުރައްކަލުގެ ހާލަތުގައި ރައްޔިތުން މި ހައްގުން މަހުރޫމް ކޮށްފައިވާ ހިނދު، އެ ހައްގު ސިޔާސީ ފަރާތްތައް ކެމްޕެއިނު ކުރަންދޭން ޖެހޭ ސަބަބު ބަންޑާރަ ނައިބު ރައްޔިތުންނަށް ސާފުކޮށްދޭން ޖެހޭ ކަމަށް ދިޔާނާ ވިދާޅުވިއެވެ.
ލޯކަލް ކައުންސިލް އިންތިޚާބުގައި ވާދަ ކުރާ ކެނޑިޑޭޓުންނަށް ކެމްޕޭން ކުރުމަށް ކަރަންޓީން ނުވެ ދަތުރު ކުރެވޭނެ އުސޫލެއް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އާންމުކުރުމާ ގުޅިގެން އެކަމާ ގުޅިގެން ގިނަ ރައްޔިތުން އަންނަނީ ފާޑު ކިޔަމުންނެވެ.
އެޗްޕީއޭއިން ރޭގެ ވަގުތެއްގައި ނެރުނު އެ އުސޫލުގައި ބުނެފައި ވަނީ ކެނޑިޑޭޓުން ތާއީދު ހޯދުމަށް މަސައްކަތް ކުރުމުގައި އަމަލު ކުރަން ވާނީ އެ އޭޖެންސީން ކަނޑައަޅާ އުސޫލެއްގެ ދަށުން ކަމަށެވެ. އަދި ތާއީދު ހޯދުމަށް ކެމްޕޭން ދަތުރުތައް ކުރަން ވާނީ އެ އޭޖެންސީން އެކަމަށް ހާއްސަކޮށް ކަނޑައަޅާ ގައިޑްލައިނާ އެއްގޮތްވާ ގޮތުގެ މަތިން ކަމަށް ވެސް އެ އުސޫލުގައި ބުނެފައި ވެއެވެ.
އެ އުސޫލުގައި އިތުރަށް ބުނެފައި ވަނީ އެޗްޕީއޭ އިން އާންމު ކުރާ ގައިޑްލައިނާ ޚިލާފު ވެއްޖެ ނަމަ އެ ކެނޑިޑޭޓަކަށް ނުވަތަ ފަރާތަކަށް ތާއީދު ހޯދުމަށް އެއް ރަށުން އަނެއް ރަށަށް ދަތުރު ކުރެވޭނީ އެ އޭޖެންސީގެ ކަރަންޓީނު ކުރުމުގައި އަމަލު ކުރާ އުސޫލާ އެއްގޮތްވާ ގޮތުގެ މަތިން ކަމަށެވެ.
Ads by STO
