ކެމްޕެއިނަށް ރަށްރަށަށް ދެވޭ އުސޫލު އުވާލުމަކުން އިންތިޚާބަށް އަސަރެއް ނުކުރާނެ: ޝަރީފް
ކަރަންޓީން ނުވެ ކެމްޕެއިން ކުރުމަށް ރަށްރަށަށް ދެވޭ އުސޫލު އުވާލުމަކުން އިންތިޚާބަށް އަސަރެއް ނުކުރާނެ ކަމަށް އިލެކްޝަންސް ކޮމިޝަންސްގެ ރައީސް އަހްމަދު ޝަރީފް ވިދާޅުވެއްޖެއެވެ.
“ދެން”އާ ވާހަކަ ދައްކަވަމުން ޝަރީފް ވިދާޅުވީ ކެމްޕެއިން ކުރުމަށް ރަށްރަށަށް ދެވޭ އުސޫލް އުވާލި ނަމަވެސް ކެމްޕެއިން ކުރުމުގައި ހުރިހާ ފަރާތަކަށް ވެސް ހަމަހަމަ ފުރުސަތުތަކެއް ދިނުމަށް އެޗްޕީއޭގައި އީސީން އެދިފައިވާނެ ކަމަށެވެ.
މީގެ އިތުރުން، ފަސް ދުވަހަށް ކަރަންޓީނު ނުވެ ރަށްރަށަށް ދެވޭ އުސޫލް އުވާލި ނަމަވެސް މީގެ ކުރިން ކެމްޕޭނު ކުރަމުން އައި ގޮތަށް ކެމްޕޭން ކުރުމުގެ ފުރުސަތު ހުޅުވާލެވިފައިވާ ކަމަށް ޝަރީފް ވިދާޅުވިއެވެ.
“ އިލެކްޝަން ކޮމިޝަންގެ ފަރާތުން ދަންނަވާފައި ވާނީ އެއްވެސް ފަރާތަކަށް ދޫކުރާ ކަމުގައި ވަނީނަމަ ހަމަހަމަ ކަމާއެކު ހުރިހާ ފަރާތްތަކަށް ވެސް ކެމްޕޭން ކުރެވޭ ގޮތަށް ހަމަޖައްސައި ދެއްވާށޭ، ކަރަންޓީނު ވެގެން ކަމުގައި ވިޔަސް ގައިދުރު ކޮށްގެން ކަމުގައި ވިޔަސް”
އީސީ ޝަރީފް
ސިއްޙީ ކުއްލި ނުރައްކަލުގެ ޙާލަތުގައި އިންތިޚާބު ބާއްވާނަމަ، އިންތިޚާބު ބޭއްވުމުގައި އަމަލުކުރަން ޖެހޭ ގޮތުގެ ގައިޑްލައިނެއް އެޗްޕީއޭއިން އެކުލަވާލާ އާންމު ކުރަންވާނެކަމަށް ލޯކަލް ކައުންސިލްތަކުގެ އިންތިޚާބުގެ ޚާއްޞަ ޤާނޫނުގައި ބަޔާން ކޮށްފައި ވާތީ އެ އޭޖެންސީން އިންތިޚާބު ކުރިއަށް ގެންދާނެގޮތުގެ ގައިޑްލައިނެއް އެކުލަވާލާ އިލެކްޝަންސް ކޮމިޝަނަށް ފޮނުވިއެވެ. ނަމަވެސް އިލެކްޝަނުން ވަނީ އެ ގައިޑްލައިނާ އެއްގޮތަށް އިންތިޚާބު ކުރިއަށް ގެންދިއުމުގައި ބޮޑެތި ގޮންޖެހުންތަކެއް ހުރިކަން ފާހަގަކޮށް މަޖިލީހާ ހިއްސާ ކޮށްފައެވެ.
މަޖިލީހަށް އީސީގެ ކަންބޮޑުވުންތައް ހުށަހެޅުމުން މަޖިލީހުގެ މިނިވަން މުއައްސަސާތަކުގެ ކޮމިޓީއިން އެދިލެއްވުމުން އެޗްޕީއޭއިން ވަނީ 5 މީހުންގެ ޓީމްތަކަށް 5 ދުވަހަށް ކަރަންޓީން ނުވެ ރަށްރަށަށް ކެމްޕެއިން ދަތުރުތައް ކުރެވޭނެ އުސޫލެއް އާންމު ކޮށްފައެވެ. ނަމަވެސް އާންމުންގެ ކަންބޮޑުވުންތަކާއި ފާޑުކިޔުންތަކާއެކު އެ އުސޫލް އާންމު ކުރިތާ 24 ގަޑިއިރު ވެސް ނުވަނީސް އެޗްޕީއޭއިން އެ އުސޫލް އުވާލިއެވެ.
