ދައުލަތަށް ގިނަ ދުވަހު ޚިދުމަތް ކުރެއްވި ޢުމަރު ޒާހިރުގެ ތާއީދު ވެސް މުޢިއްޒަށް
ކުރިއަށް އޮތް ލޯކަލް ކައުންސިލު އިންތިހާބުގައި މާލެސިޓީގެ މޭޔަރު ކަމަށް ވާދަ ކުރައްވާ އިދިކޮޅު ޕީޕީއެމްގެ ނައިބު ރައީސް ޑރ. މުޙައްމަދު މުޢިއްޒަށް، ކުރީގެ މިނިސްޓަރު ޢުމަރު ޒާހިރު ވެސް ތާއީދު ކުރައްވަން ނިންމަވައިފިއެވެ.
ދިވެހި ރާއްޖޭގެ ދައުލަތަށް ގިނަ ދުވަހު ޚިދުމަތް ކުރައްވާފައިވާ ޢުމަރު ޒާހިރު، ޑރ. މުޢިއްޒަށް ތާއީދު ކުރައްވަން ނިންމަވާފައިވާކަން ހާމަ ކުރެއްވީ ޑރ. މުޢިއްޒު ކުރެއްވި ޓްވީޓަކުންނެވެ.
"އަޅުގަނޑު އެ ބޭފުޅަކަށްޓަކައި އަބަދުވެސް ފަޚުރުވެރިވާ އޮނަރަބަލް އުމަރު ޒާހިރު، ލޯކަލް ކައުންސިލްތަކުގެ އިންތިޚާބުގައި މާލޭގެ މޭޔަރުކަމަށް ތާއީދު ކުރައްވަނީ އަޅުގަނޑަށްކަން އިއުލާން ކުރެއްވުން އެންމެ ރަނގަޅުކަމަށް އަޅުގަނޑު ގާތު ވިދާޅުވީތީ، އޮނަރަބަލް މިނިސްޓަރަށް ހިތުގެ އިޚުލާސްތެރި ޝުކުރު ދަންނަވަން" ޑރ. މުޢިއްޒު ވިދާޅުވިއެވެ.
މާލެ ސިޓީގެ މޭޔަރު ކަމަށް ޑރ. މުޢިއްޒަށް ތާއީދު ކުރައްވާނެ ކަމަށް ޢުމަރު ޒާހިރު ވިދާޅުވެފައިވާއިރު، ސިޔާސީ ގޮތުން ނަން ހިނގާ އެތައް ބަޔަކު މިހާރު ވެސް ވަނީ އެމަނިކުފާނަށް ތާޢީދު ކުރައްވާކަން ހާމަ ކުރައްވާފައެވެ.
