ކުދި ޤައުމުތަކަށް ހަކަތަ އިޤްތިޞާދުކޮށްދިނުމަށް އެހީވުމަށް ގޮވާލައްވައިފި
ކޮވިޑް-19ގެ ސަބަބުން ލިބުނު ގެއްލުންތަކުން އަރައިގަތުމަށް މަސައްކަތް ކުރަމުންދާ މި ދަނޑިވަޅުގައި ބައިނަލްއަޤްވާމީ ފަރާތްތަކާއި ޕްރައިވެޓް ސެކްޓަރުން ވެސް ކުދި ޖަޒީރާ ޤައުމުތަކުން އިޔާދަކުރަނިވި ހަކަތަ ބޭނުން ކުރުމަށް މަގު ފަހި ކޮށްދޭން ޖެހޭ ކަމަށް ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.
ޝާހިދު މިހެން ވިދާޅުވީ ޖެނީވާގައި ހުންނަ އދގެ އޮފީހަށް ކަނޑައަޅާފައި ހުންނަ ދިވެހިރާއްޖޭގެ ދާއިމީ މިޝަންއާއި ބާބެޑޯސްގެ ދާއިމީ މިޝަން ގުޅިގެން ވޯލްޑް ޓްރޭޑް އޯގަނައިޒޭޝަންގައި ވިޔަފާރިއާއި ތިމާވެއްޓާއި ގުޅޭ ގޮތުން ބޭއްވި ހައި-ލެވެލް ވަރޗުއަލް ބައްދަލުވުމުގައެވެ.
މިނިސްޓަރު ޝާހިދުގެ ވާހަކަފުޅުގައި ވަނީ ދުނިޔެ ހޫނުވުމާ، ޤުދުރަތީ ކާރިސާތަކާ، ކަނޑުގެ ދިރުންތައް މަރުވުމާ، ކަނޑުގެ ލޮނުގަނޑު އުސްވުން ފަދަ ކަންކަމުގެ ސަބަބުން ޖަޒީރާ އާބާދީތަކާއި އައްސޭރިފަށުގައި ދިރިއުޅޭ އާބާދީތަކުން އާމްދަނީ ހޯދަން ކުރާ މަސައްކަތްތަކަށް އޭގެ ނޭދެވޭ އަސަރުކޮށް، ކުރިމަގަށް އެކަމުގެ ސަބަބުން ހުރަސް އެޅޭ ކަން ފާހަގަ ކުރައްވާފައެވެ.
ކޮވިޑްގެ ސަބަބުން ލިބުނު ގެއްލުންތަކުން އަރައިގަތުމުގައި ތިމާވެއްޓާ ރައްޓެހި ގޮތްތަކެއް ގެންގުޅުމަށް ކުރެވޭ މަސައްކަތުގައި، ތިމާވެއްޓާ ރައްޓެހި ވިޔަފާރީގެ ޕްރެކްޓިސްތައް ޕްރޮމޯޓްކުރަން ޖެހޭ ކަން ފާހަގަ ކުރައްވައި މިނިސްޓަރު ވިދާޅުވީ މިފަދަ އެއް މިސާލަކީ ރާއްޖޭގެ މަސްވެރިކަން ކަމަށާއި ޒަމާންތަކެއް ވަންދެން ރާއްޖޭގައި މަސްވެރިކަން ކުރަމުން އަންނަނީ ދެމެހެއްޓެނިވި ގޮތެއްގައި ކަމަށެވެ. އަދި މަސްވެރިކަމުގެ ބާނާ އެއްވެސް އެއްޗެއް އުކާ ނުލައި، ކޮންމެ އެއްޗަކީ ކޮންމެ ވެސް ބޭނުމެއް ހިފޭ އެއްޗެއް ކަމަށް ވެސް މިނިސްޓަރު ވިދާޅުވިއެވެ.
މީގެ އިތުރުން މިހާރު ގިނަ ވަމުން އަންނަ ޤުދުރަތީ ކާރިސާތަކާ ކުރިމަތިލުމަށް ކުދި ޖަޒީރާ ޤައުމުތައް ފުރިހަމައަށް ތައްޔާރު ނުވާކަމަށް ވެސް މިނިސްޓަރު ޝާހިދު ވިދާޅުވިއެވެ. އެގޮތުން ކުދި ޖަޒީރާ ޤައުމުތަކުން އާމްދަނީ އާއި ވަޒީފާ އަށް ބަރޯސާ ވަނީ ސާފު، ދެމެހެއްޓެނިވި ތިމާވެއްޓާ ގުޅިފައިވާ ކަންކަމަށް ކަމަށް ވެސް މިނިސްޓަރު ވިދާޅުވިއެވެ.
