އަންނަ ބުރާސްފަތީގެ ކުރިން ރޯދަ އިނާޔަތް ދެނީ
ކުރިއަށް އޮތް ހަފްތާގެ ބުރާސްފަތި ދުވަހުގެ ކުރިން ރޯދަ އިނާޔަތު ފައިސާ ދިނުމަށް ނިންމާފައިވާ ކަމަށް ފިނޭންސް މިނިސްޓްރީން ސަރުކާރުގެ އޮފީސްތަކަށް އަންގައިފިއެވެ.
ފިނޭންސް މިނިސްޓްރީން މިއަދު ނެރުނު ސާކިއުލާއެއްގައި ބުނީ ރަމަޟާން މަހުގެ އިނާޔަތުގެ ގޮތުގައި ކޮންމެ މުވައްޒަފަކަށް ވެސް 3،000 ރުފިޔާ ދޭނެ ކަމަށާއި މުސާރަ ލިބޭގޮތަށް އެއް ވަޒީފާއަށް ވުރެ ގިނަ ވަޒީފާ އަދާކުރާ މުވައްޒަފުންނަށް އިނާޔަތުގެ ފައިސާ ދޭ އިރު، އިނާޔަތް ދޭނީ ހަމައެކަނި އެ މުވައްޒަފެއްގެ އަސާސީ ވަޒީފާ އޮންނަ އޮފީހަކުން ކަމަށެވެ.
އަދި އިނާޔަތުގެ ފައިސާ ދީފައިވާ މުވައްޒަފަކު ރޯދަ މަަހުގެ ތިންބައިކުޅަ އެއްބައި ފާއިތު ނުވަނީސް ވަޒީފާއިން ވަކިވެއްޖެނަމަ، ވަކިވި ދުވަހާ ހަމަައަށްވާ ފަައިސާ ފިޔަވައި އިތުރު ފައިސާ އެ މުވައްޒިފެއްގެ އަތުން ހޯދާ އެ ފައިސާ އަނބުރާ ޖަމާ ކުރުމަށް ވެސް އެ މިނިސްޓްރީން ވަނީ އަންގާފައެވެ.
މީގެ އިތުރުން ރޯދަ މަހުގެ ތެރޭގައި އަލަށް ވަޒީފާ ދޭ މުވައްޒަފުންނަށް އެ މުވައްޒަފަކު ވަޒީފާ އަދާކުރާ ތާރީހުން ފެށިގެން ރަސްމީ ހަތް ދުވަސް ތެރޭ ރޯދަ މަހުގެ އިނާޔަތް ދޭން ޖެހޭނެ ކަމަށް ވެސް ފިނޭންސް މިނިސްޓްރީން ނެރުނު ސާކިއުލާގައި ވަނީ އަންގާފައެވެ. އެގޮތަށް އިނާޔަތް ދޭއިރު ދުވަސް ގުނާނީ ދުވާލަކަށް ޖެހޭ އަދަދު 30 އިން ގެއްލައިގެންނެވެ.
ފިނޭންސް މިނިސްޓްރީން ވަނީ މި މަހުގެ 8 ވާ ބުރާސްފަތި ދުވަހު ރޯދަ އިނާޔަތް ދިނުމަށް ނިންމާފައިވާތީ ރޯދަ އިނާޔަތުގެ ތަފްސީލް ތައްޔާރުކޮށް އިނާޔަތު ފައިސާ ހޯދުމަށް އެ މިނިސްޓްރީއަށް ހުށައެޅުމަށް އޮފީސްތަކަށް އަންގާފައެވެ.
އެ ސާކިއުލާގައި ރަމަޟާން މަސް ފެށޭއިރު އޮފީހަށް ހިދުމަތް ނުލިބޭ ގޮތަށް، "ޕޭ ލީވް" ސްކޮލާޝިޕް މުވައްޒަފުން އަދި "ނޯ ޕޭ ލީވް" ގައި ތިބޭ މުވައްޒަފުންނަށް އިނާޔަތުގެ ފައިސާ ހަމަޖައްސައި ނުދިނުމަށް ބުނެފައިވާއިރު އެފަދަ "ލީވް" އެއްގައި ހުންނަ މުވައްޒަފަކު ރަމަޟާން މަހުގެ ތެރޭގައި އެނބުރި ހިދުމަތަށް ނުކުމެއްޖެ ނަމަ އެދުވަހަކުން ފެށިގެން ރަމަޟާން މަހުގެ ނިޔަލަށް ޖެހޭ އަދަދެއް ބަލައި، އެ އަދަދަށް އިނާޔަތުގެ ފައިސާ ދިނުމަށް ބުނެފައިވެއެވެ.
