މީދޫ މުޅި ކައުންސިލް ތިން މަހަށް ސަސްޕެންޑުކޮށްފި
ދ. މީދޫގެ މުޅި ކައުންސިލް ތިން މަސް ދުވަހަށް ސަސްޕެންޑު ކޮށްފިއެވެ.
ލޯކަލް ގަވަމަންޓް އޮތޯރިޓީން މިއަދު ކުރި އިއުލާނެއްގައި ބުނީ މަގާމުގެ މަސްއޫލިއްޔަތާއި ވާޖިބު އެކަށީގެންވާ ގޮތަކަށް އަދާ ނުކުރުމާއި، ވާޖިބު އަދާ ކުރުމުގައި އިހުމާލުވުމާއި ކައުންސިލުގެ ބާރުތަކާއި ވަސީލަތްތަކުގެ ބޭނުން ނަހަމަ ގޮތުގައި ހިފުމާއި، ކައުންސިލަރުންގެ ސުލޫކީ މިންގަނޑާ ހިލާފަށް ކައުންސިލަރުންގެ އަމަލުތައް ބަހައްޓާފައިވާ ކަމަށް މީދޫ ކައުންސިލަރުންގެ މައްޗަށް ހިންގި ތަހުގީގުން ހާމަވެފައިވާ ކަމަށެވެ.
ހަމައެއާއެކު އޭގެ ތެރެއިން ބައެއް އަމަލުތައް ތަކުރާރު ކޮށްފައިވާ ކަން އެނގެން އޮންނަ ކަމަށާއި، އިންކުއަރީން ފާހަގަ ކުރެވިފައިވާ ކަންކަމުގެ ކުޑަބޮޑު މިނާއި، މީދޫ ކައުންސިލަރުންނާ ގުޅޭގޮތުން މި އިންކުއަރީން ފާހަގަ ކުރެވިފައިވާ ކަންކަމުގެ ސަބަބުން ކައުންސިލަށާއި ލާމަރުކަޒީ ނިޒާމަށް ނުހަނު ގެއްލުން ލިބޭ ކަމަށް ފެންނާތީ ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުން ކަށަވަރު ކުރުމުގެ ހާއްސަ ގާނޫނުގެ ދަށުން ކައުންސިލުގެ ރައީސް އިޔާސް އިސްމާއިލް ލަތީފް، ނައިބު ރައީސް ޝުރައިފް އިބްރާހީމް ރަޝީދު އަދި ކައުންސިލަރު މުހައްމަދު ތައުފީގު، މުސާރައާއި އިނާޔަތްތައް ނުލިބޭގޮތަށް ތިން މަސް ދުވަހަށް ސަސްޕެންޑު ކޮށްފައިވާ ކަމަށެވެ.
މީދޫ ކައުންސިލްގައި ހިމެނިވަޑައިގަންނަވާ ތިން މެންބަރުންނަކީ ވެސް އެމްޑީޕީ މެންބަރުންނެވެ.
މީދޫ ތިން ކައުންސިލަރުންގެ އިތުރުން އިދިކޮޅު ޕީޕީއެމް އަށް ނިސްބަތްވެވަޑައިގަންނަވާ ހއ. އުތީމު ކައުންސިލްގެ ރައީސް އަބްދުﷲ ރަޝީދާއި ނައިބު ރައީސް މުހައްމަދު އާދަމް ވެސް ވަނީ ސަސްޕެންޑު ކޮށްފައެވެ.
އެލްޖީއޭއިން ބުނީ މި ދެ ކައުންސިލަރުން ސަސްޕެންޑުކުރީ ވެސް މަސްއޫލިއްޔަތާއި ވާޖިބު އެކަށީގެންވާ ގޮތަކަށް އަދާ ނުކުރުމާއި، ވާޖިބު އަދާ ކުރުމުގައި އިހުމާލުވުމާއި ކައުންސިލްގެ ބާރުތަކާއި ވަސީލަތްތަކުގެ ބޭނުން ނަހަމަގޮތުގައި ހިފުމާއި، ކައުންސިލަރުންގެ ސުލޫކީ މިންގަނޑާ ހިލާފަށް ކައުންސިލަރުންގެ އަމަލުތައް ބަހައްޓާފައިވާކަން އެނގެން އޮތުމާއި، އަދި އޭގެ ތެރެއިން ބައެއް އަމަލުތައް ތަކުރާރު ކޮށްފައިވާކަން އެނގެން އޮތުމުން ކަމަށެވެ.
