އުސޫލުތަކާ ހިލާފަށް ހުންނަ ކެފޭ، ޖިމް ފަދަ ތަންތަން ބަންދުކުރާނަން: އެޗްޕީއޭ
ކޮވިޑް-19އާ ގުޅިގެން ހަދާފައިވާ އުސޫލުތަކާ ހިލާފަށް ހުންނަ ތަންތަން ވަގުތުން ބަންދު ކުރާނެ ކަމަށް އެ އެޖެންސީން ބުނެފި އެވެ.
އެޗްޕީއޭއިން ރޭ ކުރި ޓުވީޓެއްގައި ބުނީ ގައިޑްލައިންތަކާ އެއްގޮތަށް މަސައްކަތް ކުރޭތޯ ބަލަން މިއަދު ހެލްތު އިންސްޕެކްޝަން ހަރަކާތެއް ފަށާނެ ކަމަށެެވެ.
އެޗްޕީއޭއިން ބުނީ މިއަދު މާދަމާ ކުރިޔަށްގެން ދާ އިންސްޕެކްޝަން ގައި އުސޫލުތަކާ ހިލާފަށް ހުންނަ ތަންތަން ވަގުތުން ބަންދު ކުރާނެ އެވެ. އެ އިންޕެކްޝަންގައި ކެފޭ އާއި ރެސްޓޯރަންޓާއި ސައި ހޮޓާތަކާއި ސެލޫން އަދި ފިހާރަތައް ވެސް ބަލާނެ އެވެ. ހިދުމަތްދޭ އެހެން ބައެއް ތަންތަނަށްވެސް އެ ޓީމުތައް ވަންނާނެ އެވެ.
މީގެ ކުރިން މާލޭ ސިޓީ ކައުންސިލްއާއި އެޗްޕީއޭ އަދި އެހެނިހެން އިދާރާތައް ގުޅިގެން އާންމު ހިދުމަތްދޭ ތަންތަން ނިއު ނޯމަލްގެ އުސޫލުތަކަށް އަމަލު ކުރޭތޯ ބެލުމަށް އިންސްޕެކްޝަނެއް ވަނީ ކުރިއަށް ގެންގޮސްފައެވެ. އެ އިންސްޕެކްޝަންގައި އުސޫލުތަކާއި އެއްގޮތަށް ހިދުމަތް ދެމުން ނުދާ ތަންތަނަށް ފިޔަވަޅު އަޅާފައެއް ނުވެއެވެ. ނަމަވެސް އެކަންކަން ރަނގަޅު ކުރަން އަންގާ ނަސޭހަތް ދިނެވެ.
