އައްޒައަށް 4426 މުހިންމު، އެކަމަކު "ލީނާ" މާ މުހިންމު!
ދިވެހި ފިލްމު އިންޑަސްޓްރީގައި މިހާރު އެންމެ ކުރީގައި ފިޔަޖަހާ އެއް ފަންނާނަކީ މަރިޔަމް އައްޒައޭ ބުނުމުން ދޮގަކަށް ނުވާނެއެވެ.
ކޮންމެ ކަހަލަ އެކްސްޕްރެޝަނެއް ދައްކާލަން ވިޔަސް، އަދި ތަފާތު އެކި ރޯލުތައް ތަޖުރިބާ ކޮށްލަން ބޭނުންވާ އައްޒައަކީ އޭނާގެ ފޭނުން ދާއިރާގެ އެތެރޭގައާއި ބޭރުން ވެސް ހުރި ކުޅަދާނަ ފަންނާނެކެވެ.
އައްޒައާއެކު މަސައްކަތް ކުރާ މީހުންނަށާއި އޭނާއާ މަސައްކަތް ހަވާލު ކުރާ މީހުންނަށް ވެސް އައްޒަ މުހިންމުވެއެވެ. ހަމައެފަދައިން އައްޒައަށް އެމީހުން ވެސް މުހިންމު ވެއެވެ.
މުހިންމު ކަމުގެ ވާހަކަ ދައްކާއިރު، ދާދި ފަހުން "ބައިސްކޯފުން" ދެއްކި "ތުންތުން މަތިން" ޕްރޮގްރާމުގައި އައްޒައާ މިވަނީ ވަރަށް ތަފާތު މަސައްކަތެއް ހަވާލު ކޮށްފައެވެ.
އެ ޕްރޮގްރާމުގައި އައްޒަ އާއި ހަވާލު ކުރީ "މެމޮރީސް" ފޮތެކެވެ. ފޮތުގެ ކޮންމެ ޞަފްޙާއެއްގައި ދެ ހަނދާނެއްގެ ފޮޓޯ ހިއްޕާފައިވާއިރު، އޭގެން އައްޒައަށް ޖެހެނީ އެއް ފޮޓޯ (އެންމެ މުހިންމުވާ ފޮޓޯ) އިޚްތިޔާރުކޮށް އަނެއް ފޮޓޯ ވީދާލާށެވެ.
އެގޮތުން އެއް ޞަފްޙާގައި ވަނީ ފާތިމަތު ނަޙުލާ ޕްރޮޑިއުސްކުރި މަޝްހޫރު ބިރުވެރި ފިލްމު 4426 ޕްރިމިއާރ ކުރި ރޭ ނަގާފައިވާ ފޮޓޯއަކާއި އައްޒަގެ ފިރިމީހާ ޢަބްދުﷲ މުއާޒް ޕްރޮޑިއުސްކޮށް އަދި ޑައިރެކްޓުކުރި "ލީނާ" ފިލްމު ޕްރިމިއަރ ކުރި ރޭ ނަގާފައިވާ ފޮޓޯއެކެވެ.
އައްޒައާއި ނަހުލާއަކީ އަބަދުވެސް ވަރަށް ގާތް ދެ މީހުންކަން އެނގިފައިވެއެވެ. އަދި 4426 ވެފައި ވަނީ ވެސް އައްޒަގެ ފިލްމީ ކެރިއަރުގައި ކުޅުނު ވަރަށް މުހިންމު ފިލްމަކަށެވެ.
ނަމަވެސް މިފަހަރު އައްޒަ އިޚްތިޔާރު ކުރީ "ލީނާ" އެވެ. ސަބަބެއް ކަމުގައި އައްޒަ ބުނީ އެއީ މުއާ އާއި އައްޒައާއި ލޯބީގެ ގޮތުން ގުޅުމަށް ފަހު ކުރި އެންމެ ފުރަތަމަ މަސައްކަތް ކަމުގައިވާތީ ކަމަށެވެ.
އައްޒަ 4426 އިޚްތިޔާރު ނުކުރީ ފަހަރެއްގައި ވެސް އެ ފިލްމާއި ނަހޫ ވެސް މުހިންމު ނުވެގެނެއް ނޫނެވެ. އެ ފޮޓޯ އިރާލަން އައްޒައަށް ޖެހުނީ ވެސް ވަރަށް ބުރަ ހިތަކާއެކުކަން އޭނާ ފާޅުކުރިއެވެ.
މި ޕްރޮގްރާމުގައި އައްޒައާއެކު ދެން ބައިވެރިވީ މަޝްހޫރު ލަވަކިޔުންތެރިޔާ މީރާ މުހައްމަދު މާޖިދުއެވެ. އެ ދެ ފަންނާނުންނަށް އެހީތެރިވުމުގެ ގޮތުން ފިލްމީތަރި އިސްމާއިލް ޖުމާހު ވެސް ފަހުން އެ ޝޯގައި ބައިވެރިވެފައިވެއެވެ.
