ގަން،ފޮނަދޫ ސަރަހައްދުން ފައްސިވީީ މީހުންގެ އަދަދު 12އަށް
މިހާތަނަށް ގަން،ފޮނަދޫ ސަރަހައްދުން 12 މީހަކު ކޮވިޑަށް ފައްސިވެފައިވާ ކަމަށް ގަމު ކައުންސިލުން ހާމަކޮށްފިއެވެ.
މިހާރު ކުރިޔަށްދާ ނޫސްވެރިންގެ ބައްދަލުވުމެއްގައި ގަމު ކައުންސިލްގެ ރައީސް މުޙައްމަދު ޝިޔާމް ވިދާޅުވީ، ފައްސިވެފައިވަނީ ލ.މާންދޫން 9 މީހަކާއި ލ.ގަމުން 3 މީހެއް ކަމަށެވެ. އަދި މާންދޫން ފައްސިވި ހުރިހާ އެންމެންނަކީ ވެސް ބިދޭސީން ކަމަށް ޝިޔާމް ވިދާޅުވިއެވެ.
"އަޅުގަނޑުމެން ލައިވް ފެށިއިރު، އެކެއް ފިޔަވާ ބާކީ ތިބި މީހުންގެ ހާލު ރަނގަޅު. އެކެއްގެ ފަރާތުން މާބޮޑަށް ސިންޕްޓަމްސް ފެނިގެން މިހާރު ދަނީ ޑޮކްޓަރަށް ދެއްކުމުގެ މަސައްކަތް ކުރަމުން." ޝިޔާމް ވިދާޅުވިއެވެ.
މިހާތަނަށް މި ފަރާތްތަކާ ކޮންޓެކްޓްވި ފަރާތްތަކުގެ ތެރެއިން 190 މީހުންގެ ސާންޕަލް ނެގުމުގެ މަސައްކަތް ކުރިޔަށް ދާ ކަމަށާއި އެއީ ގަމުން 100 ސާންޕަލްގެ އިތުރުން މާންދޫން 90 ސާންޕަލް ކަމަށް ގަމު ކައުންސިލުން މައުލޫމާތު ދެއެވެ.
މީގެ އިތުރުން ފައްސިވި މީހުންނާ ކޮންޓެކްޓްވި މީހުން ދިރިއުޅޭ 43 ގެއެއް މިހާރު ވަނީ ކަރަންޓީން ކުރެވިފައިވެއެވެ. މީގެ ތެރޭގައި ހިމެނެނީ މުކުރިމަގުން 25 ގެޔާއި މަތިމަރަދޫން 4 ގެޔަކާއި ތުނޑީ އާބާދުވީ ސަރަހައްދުން 6 ގެއެއްގެ އިތުރުން ތުނޑީން 8 ގެއެއް ކަމަށް ގަމު ކައުންސިލުން މައުލޫމާތު ދެއެވެ. ކަރަންޓީނަށް ލެވުނު ގެތަކަކީ މާންދޫ ކްލަސްޓަރގެ އިތުރުން ގަމުން ފެނުނު ކްލަސްޓަރގެ ޕްރައިމަރީ ކޮންޓެކްޓުން ދިރިއުޅެމުން އަންނަ ގެތަކެކެވެ.
Ads by STO
