މާންދޫ ކްލަސްޓާ: ގަމުން އިތުރު މީހަކު ފައްސި ވެއްޖެ
ލ. ގަމުން އިތުރު މީހަކު ކޮވިޑް-19އަށް ފައްސި ވެއްޖެއެވެ.
ގަމު ރީޖަނަލް ހޮސްޕިޓަލުގެ މެނޭޖަރ ޢަލީ ނަޝީދު "ދެން" އަށް މައުލޫމާތު ދެއްވަމުން ވިދާޅުވީ، މިރޭ އިތުރު 29 ޓެސްޓެއްގެ ނަތީޖާ ލިބިފައިވާ ކަމަށެވެ. އަދި އޭގެ ތެރެއިން 28 ނަތީޖާ ނައްސިވެފައިވާއިރު އެކަކު ފައްސިވެފައިވާ ކަމަށެވެ.
"ދެން" އަށް މަޢުލޫމާތު ލިބިފައިވާ ގޮތުގައި މިރޭ އެ ރަށުން ފައްސިވެފައި ވަނީ އަލަށް އާބާދުވި ސަރަޙައްދަށް ނިސްބަތްވާ އަންހެނެކެވެ. މިއީ މި ކްލަސްޓާއާ ގުޅިގެން މުކުރިމަގާއި، މާންދު ފިޔަވާ އެހެން ސަރަހައްދަކުން ފައްސިވި ފުރަތަމަ މީހާއެވެ
ގަމުން މިރޭ ފައްސިވީ މީހާއާއެކު، މިހާރު އެ ރަށުން ކޮވިޑަށް ފައްސިވީ މީހުންގެ އަދަދު މިވަނީ 55އަށް އަރައިފައެވެ.
މާންދޫން ކޮވިޑް-19ގެ ކޭސްއެއް ފުރަތަމަ ފެނިފައި ވަނީ އޭޕްރީލް 23 ވަނަ ދުވަހުއެވެ. އެއާއެކު މާންދޫ ވަނީ މޮނިޓަރިންގއަށް ލާފައެވެ. އޭގެ ފަހުން ގަމުން މި ކްލަސްޓަރއާ ގުޅުން ހުރި ކޭސްއެއް ފެނި، ގަން،ފޮނަދޫ ވެސް މޮނިޓަރިންއަށް ލައިފައިވެއެވެ.
ގަމަކީ ރާއްޖޭގެ އެކި ހިސާބުތަކުން ޑޮކްޓަރަށް ދައްކަން ގިނަ އަދަދެއްގެ މީހުން އަންނަ ރަށަކަށް ވުމާއެކު ރަށް މޮނިޓަރިންނަށް ލުމުން ގިނަ ބަޔަކު ރަށު ބަންދުވެފައިވެސް އެބަ ތިއްބެވެ.
Ads by STO
