މި އަހަރުގެ ސާނަވީ އިމްތިހާނު ފަށައިފި
މި އަހަރުގެ ސަނަވީ އިމްތިހާނު ފަށައިފިއެވެ.
އެޑިއުކޭޝަން މިނިސްޓްރީ އިން ވިދާޅުވީ 235 ސެންޓަރުގައި މިއަދު އިމްތިހާނު ކުރިއަށްދާނެ ކަމަށެވެ. އަދި މި އިމްތިޙާނުތަކުގައި ޖުމްލަ 5955 ދަރިވަރުން ބައިވެރިވެއެވެ.
މީގެ އިތުރުން މިނިސްޓްރީން ވިދާޅުވީ އިމްތިޙާނު ސެންޓަރުތައް މިއަދު ފެށޭ އިމްތިޙާނުތަކަށް ފުރިހަމައަށް ތައްޔާރު ކޮށްފައިވާ ކަމަށެވެ. މިގޮތުން ކޯވިޑް-19 އަށް ފައްސި ވެފައިވާ ދަރިވަރުންނާއި ކަރަންޓީނު ކޮށްފައިވާ ދަރިވަރުންގެ ތެރެއިން އިމްތިޙާނު ހެދޭ ޙާލަތުގައި ތިބި ދަރިވަރުންނަށް އިމްތިޙާނު ފޯރުކޮށްދިނުމުގެ އިންތިޒާމުތައް ހެލްތް ޕްރޮޓެކްޝަން އެޖެންސީ އާއި ރަށްރަށުގެ ސިއްޙީ އިދާރާތަކުގެ އިތުރުން، ރަށްރަށުގެ ޓާސްކްފޯސްތަކާ ގުޅިގެން ހަމަޖައްސައިފައި ވާނެ ކަމަށް ވެސް އެޑިޔުކޭޝަނުން ވިދާޅުވެފައި ވެއެވެ.
އެޑިއުކޭޝަން މިނިސްޓްރީން ވަނީ މިކަންކަން އިންތިޒާމުކުރުމުގައި ޑިޕާޓްމަންޓް އޮފް ޕަބްލިކް އެގްޒޭމިނޭޝަންސް އާއި އެޗް.ޕީ.އޭ ގެ އިރުޝާދުގެ ދަށުން ސްކޫލްތަކުން ކުރައްވަމުން ގެންދަވާ މަސައްކަތް ފާހަގަކޮށް ސްކޫލްތަކުގެ އިސްވެރިންނާއި އެންމެހައި މުވައްޒަފުން އަދި ބެލެނިވެރިންނަށް ޝުކުރު ދަންނަވައިފައެވެ.
އޯލެވެލް އިމްތިހާނު މިއަދު ފެށިއިރު އޭލެވެލް އިމްތިހާނު ވެސް ފެށިގެން ކުރިއަށް އެބަދެއެވެ.
