ފުލުހުންގެ މުއައްސަސާ ހަމައަށް ނޭޅި އޮތުމަކީ ލަދުގަންނަން ޖެހޭ ކަމެއް: މޫސާ ސިރާޖު
ރައްޔިތުން އެމްޑީޕީއަށް ވެރިކަމާއި ސްޕަ މެޖޯރިޓީ ދިނުމުން ވެސް ފުލުހުންގެ މުއައްސަސާ ހަމައަކަށް ނޭޅި އޮތުމަކީ ލަދުގަންނަން ޖެހޭ ކަމެއް ކަަމަށް ފޮނަދޫ ދާއިރާގެ މެންބަރު މޫސާ ސިރާޖު ވިދާޅުވެއްޖެއެވެ.
ޒުވާނުންތަކެއް ހިމެނޭ "ރައިޒް އަޕް އެމްވީ" މޫވްމަންޓުން އިންތިޒާމުކޮށްގެން ކުރިއަށް ގެންދިޔަ މުޒާހަރާއެއް ރޫޅައިލުމަށް ފުލުހުން ހާލަތާ ނުބައްދަލު ބާރުގެ ބޭނުން ކުރާ ވީޑިއޯއެއް ޓްވީޓް ކުރައްވަމުން މޫސާ ސިރާޖު ވިދާޅުވީ، ފުލުހުންގެ އަނިޔާވެރިކަން ހުއްޓުވޭނީ ޙާލަތާ ނުބައްދަލު ބާރު ބޭނުންކުރާ ފުލުހުންނަށާއި އެފުލުހުންނަށް އަމުރު ކުރާ ފުލުހުންނަށް ފިޔަވަޅު އެޅިގެން ކަމަށެވެ.
ރޭގެ މުޒާހަރާއަކީ މަސައްކަތްތެރިންގެ ދުވަހާ ގުޅިގެން، މަސައްކަތުގެ މާހައުލުގައި ދިމާވާ ޖިންސީ ފުރައްސާރައާ ދެކޮޅަށް ކުރެވުނު މުޒާހަރާއެކެވެ. ރޭގެ މުޒާހަރާ ރޫޅާލުމުގައި ބާރުގެ ބޭނުން ކޮށްފައިވާ ގޮތް ޕްރޮފެޝަނަލް ސްޓޭންޑަޑްސް ކޮމާންޑާއި ޔޫސް އޮފް ފޯސް ރިވިއު ކޮމިޓީން ބަލައި ގޮތެއް ނިމެންދެން، ފްރޮންޓް ލައިން ޕޮލިސިންގެ މަސްއޫލިއްޔަތުތަކުން އެ ފުލުހުން މިހާރު ވަނީ ދުރުކޮށްފައިކަމަށް ފުލުހުން ވަނީ ބުނެފައެވެ.
