ކުޑަކުއްޖަކާ ބެހުނު ކަމަށް ބުނާ ނަރުހެއް ފުރުވާލުމުން ޓްރީޓޮޕްގެ މެނޭޖްމަންޓްގެ މައްޗަށް ތަހުގީގެއް
ހުޅުމާލޭގައި ޓްރީޓޮޕް ހޮސްޕިޓަލުގައި އެޑްމިޓުކޮށްފައި އޮތް ކުޑަކުއްޖަކަށް ޖިންސީ ގޯނާ ކުރި ކަމަށް ތުހުމަތު ކުރެވޭ ނަރުހަކު ރާއްޖެއިން ފޮނުވާލި މައްސަލައިގައި، އެ ހޮސްޕިޓަލުގެ މެނޭޖްމަންޓުގެ މައްޗަށް ޖިނާއީ ތަހުގީގެއް ހިންގަން އަމުރު ކޮށްފިއެވެ.
މިކަމާ ގުޅޭގޮތުން ޕްރޮސެކިއުޓާ ޖެނެރަލް (ޕީޖީ) ޙުސެއިން ޝަމީމް ވިދާޅުވީ އެ މައްސަލައިގައި ކަން ހިނގައިދިޔަ ގޮތް ބަލައި، ހޮސްޕިޓަލުގެ މެނޭޖްމަންޓުގެ މައްޗަށް ތުހުމަތު ކުރެވޭ ޖިނާއީ މައްސަލަ ތަހުގީގުކޮށް ދައުވާ ކުރަން ފޮނުވުމަށް ފުލުހުންނަށް އަންގާފައި ވާނެ ކަމަށެވެ.
ފުލުހުންގެ މީޑިއާ އޮފިޝަލަކު ވިދާޅުވެފައި ވަނީ ޓްރީޓޮޕްގައި އެޑްމިޓު ކޮށްފައި އޮތް ފިރިހެން ކުއްޖަކަށް، އެ ހޮސްޕިޓަލުގައި މަސައްކަތް ކުރާ ފިރިހެން ނަރުހަކު ޖިންސީ ގޯނާ ކޮށްފައިވާ މައްސަލައެއް މި އަހަރުގެ ޖެނުއަރީ މަހުގެ 14 ވަނަ ދުވަހު އެ ހޮސްޕިޓަލުން ފުލުހުންނަށް ހުށަހަޅާފައިވާ ކަމަށެވެ.
މި މައްސަލައިގެ ތަހުގީގު މަރުހަލާގައި ޕީޖީ އޮފީހާ މަޝްވަރާ ކުރުމުން، ފުލުހުންނަށް މި މައްސަލަ ހުށަހެޅިއިރު ވެސް މިކަމާ ގުޅޭގޮތުން ތުހުމަތުވާ ބިދޭސީ ނަރުސް ރާއްޖެއިން ފުރައިގެން ގޮސްފައި ވާތީ އެ މީހާގެ ބައި ކުރިއަށް ނުގެންގޮސް ނިންމާލާފައިވާކަން އެނގިފައިވެއެވެ. އަދި އެ މައްސަލައިގައި އެ މީހާ ރާއްޖެއަށް ނާދެވޭ ގޮތަށް އިމިގްރޭޝަން މެދުވެރިކޮށް ބްލެކް ލިސްޓް ކުރުމަށް ޕީޖީން ލަފާދީފައި ވާތީ އެ މައްސަލަ މިހާރު ފައިލް ކޮށްފައިވާ ކަމަށް ފުލުހުން މައުލޫމާތު ދެއްވާފައިވެއެވެ.
އެއީ ކޮން ޤައުމެއްގެ ނަރުހެއް ކަމެއް ޕީޖީ އަދި ފުލުހުން ވެސް ހާމަ ކޮށްފައެއް ނުވެއެވެ.
ކުޑަކުދިންނަށް ޖިންސީ ގޯނާކުރާ މީހުންނާމެދު ހާއްސަ އުސޫލުތަކަކަށް އަމަލުކުރުމުގެ ގާނޫނު ބުނާގޮތުން ކުޑަކުއްޖަކަށް ޖިންސީ ގޯނާ ކުރިކަން އެނގި ހުރެ އެކަން ރިޕޯޓް ނުކުރުމަކީ ވެސް ކުށެކެވެ. އެކަމުގެ އަދަބަކީ 6 މަސް ދުވަހާއި 3 އަހަރާ ދެމެދުގެ މުއްދަތަކަށް ޖަލަށްލުމެވެ.
