ކުޑަކުދިންނަށް ކޮވިޑް ޖެހުމުން ފެންނާނެ ނުރައްކާތެރި ޢަލާމަތްތައް
ހަލުވިކަމާ އެކު ކޮވިޑް19 ފެތުރެމުންދާއިރު ރާއްޖޭގައި ކުޑަކުދިންނަށް ބަލި ޖެހޭ ނިސްބަތް ވެސް ދުވަހެއް ދުވަހަކަށް ދަނީ އިތުރުވަމުންނެވެ. އައިޖީއެމްއެޗުގެ ކުޑަކުދިންގެ ޑޮކްޑަރު، ޑރ. އަހްމަދު ފައިސަލް ވަނީ ކުޑަކުދިންނަށް މި ބަލި ޖެހުމުން ފެންނާނެ ޢަލާމަތްތައް ހިއްސާކޮށްފައެވެ.
އާންމުކޮށް ކުޑަކުދިންނަށް މި ބަލި ޖެހެނީ މައިންބަފައިންގެ ފަރާތުން ނުވަތަ އުރާ ، ގައިގޯޅިކޮށް އުޅޭ މީހުންގެ ފަރާތުން ކަމަށް ޑރ.ފައިސަލް ވަނީ ވިދާޅުވެފައެވެ. އެހެންކަމުން ރައްކާތެރިކަމުގެ ފިޔަވަޅު އެޅުމަކީ މުހިންމުކަމެވެ. މިއީ ވީހާ ވެސް މަދުން ކުދިން ބޭރަށް ނެރެ، މީހުންނާ ކުދިން ބައްދަލުވުން ހުއްޓާލަންވީ ދުވަސްވަރެވެ.
ޑރ. ފައިސަލް ވިދާޅުވިގޮތުގައި ކުޑަކުއްޖަކަށް ބަލި ޖެހިއްޖެނަމަ ފެންނާނެ ޢަލާމަތްތަކުގެ ތެރޭގައި ނޭވާކުރުވުން، މެޔަށް ތަދުވުން، ފެން މަދުވެ 6 ގަޑިއިރުވާއިރު ވެސް ކުޑަކަމުނުދިޔުން، ގައިގައި ބިހިތަކެއް ނެގުން އަދި ލޯ ރަތްވުން ހިމެނެއެވެ.
މި ދެންނެވުނު ޢަލާމަތްތަކުގެ އިތުރުން ހުންއައުން، އާދަޔާ ޚިލާފަށް ވަރުބަލިވުން، ވާނުވާނޭގުން، މާގިނައިން ނިދުމާއި ބޭރަށް ހިނގުން ވެސް ހިމެނެއެވެ. ޑރ.ފައިސަލް ވިދާޅުވީ ކުޑަކުދިންގެ ތެރެއިން ވެސް ނުރައްކާ ބޮޑީ އިތުރު ބައްޔެއް ހުންނަ ކުދިންނަށް ކަމަށެވެ.
އޭގެ ތެރޭގައި ގުނަވަނެއް ޓުރާންސްޕުލާންޓުކޮށްފައި ހުރުން، ނޭވާ ހިއްލުން ކޮންޓުރޯލް ނުވެ ހުރުން، ހަކުރުބަލި، ހިތުގެ ބަލި އަދި ބަރުދަންމަތި ކުދިން ހިމެނެއެވެ.
ބަލި ޖެހޭ މީހުންގެ އަދަދު ފަހަކަށް އައިސް އިތުރުވަމުންދާއިރު، ކުޑަކުދިންނަށް މިކަމުގެ ނުރައްކާ ބޮޑުކަމަށް ގިނަ ޑޮކްޓަރުން ބުނެއެވެ.
ޑރ. ނަޒްލާ ވިދާޅުވީ ދުވާލެއްގެ މަތިން 10 އަހަރުން ދަށުގެ 70 ނުވަތަ 80 ކުޑަކުދިން ބައްޔަށް ފައްސިވާ ކަމަށެވެ. އަދި 1 އަހަރުން ދަށުގެ 4 ނުވަތަ 5 ކުދިން ކޮންމެ ދުވަހަކު ވެސް ފައްސިވާ ކަމަށް އޭނާ ފާހަގަ ކުރެއްވިއެވެ. ދުވަސްވީ މީހުންނާ ހިލާފަށް ކުޑަކުދިން ހައި ރިސްކު ކެޓެގަރީގައި ނުހިމެނުނު ކަމުގައިވިޔަަސް އެފަދަ ހާލަތެއް މެދުވެރި ނުވާނެއޭ ބުނަން ދަތިކަމަށް ޑރ. ނަޒްލާ ވިދާޅުވިއެވެ.
އެހެންކަމުން ރައްކާތެރިކަމުގެ ފިޔަވަޅު އަޅައި ކުރިން ދެންނެވުނު ފަދަ އެއްވެސް އަލާމާތެއް ކުއްޖެއްގެ ފަރާތުން ފެންނަކަމަށް ފާހަގަކުރެވޭ ނަމަ ފްލޫ ކްލިނިކަށް ދައްކައި ، އެޗްޕީއޭގެ ހޮޓްލައިން 1676 އަށް ގުޅުއްވާ މަޢުލޫމާތު ހިއްސާ ކުރެއްވުން މުހިންމެވެ.
