ވ. ކެޔޮދޫން މީހަކު ފައްސިވެ، ރަށް މޮނިޓަރިންއަށް
ވ. ކެޔޮދޫން މީހަކު ކޮވިޑް-19 އަށް ފައްސިވެ، ރަށް މޮނިޓަރިން ހާލަތަށް ލައިފިއެވެ.
ކެޔޮދޫ ކައުންސިލްގެ ރައީސް އަހުމަދު ޔޫސުފް “ދެން” އަށް މަޢުލޫމާތު ދެއްވަމުން ވިދާޅުވީ ފައްސިވެފައިވާ މީހާއާ ގާތުން އެއްތާވި މީހުންގެ ސާމްޕަލް މިހާރު ނަގައިފައިވާ ކަމަށެވެ. އެހެން ނަމަވެސް ވިއްސާރަ ވުމުގެ ސަބަބުން ސާމްޕަލްތައް ނުފޮނުވި ލަސްވަމުންދާކަމަށާއި އެމްއެންޑީއެފްގެ އެހީއާއި އެކު އެ ސާމްޕަލްތައް ފޮނުވުމުގެ މަސައްކަތް މިހާތު ކުރަމުން ދާ ކަމަށް އޭނާ ވިދާޅުވިއެވެ.
އޭނާ ވިދާޅުވީ ފައްސިވެެފައި ވަނީ އެ ރަށުން މާލެ ދަތުރުކުރާ ބޯޓެއްގެ ފަޅުވެރިއެއްކަމަށެވެ. އެ މީހާގެ ޑައިރެކްޓް ކޮންޓެކްޓުންގެ ގޮތުގައި ގިނަ މީހުން ފާހަގަ ކުރެވިފައިވާ ކަމަށް ވެސް ވިދާޅުވިއެެވެ. މީގެ އިތުރުން އަހުމަދު ޔޫސުފް ވިދާޅުވީ މާލެ ދަތުރުކުރުމަށް ފަހު ރަށަށް އެނބުރި އަންނަ މީހުން ކޮވިޑް-19 އަށް ޓެސްޓު ކުރާ ކަމަށެވެ.
އެ ރަށުން ފައްސިވި މީހާއާ ގާތުން އެއްތާވި މީހުންގެ ތެރޭގައި އާއިލާގެ ގިނަ މީހުން ހިމެނެއެވެ. ބައެއް މީހުންނަށް ބަލީގެ އަލާމާތްތައް ދަނީ ފެންނަމުންނެވެ.
ރާއްޖޭގައި އަނެއްކާ ވެސް ކޮވިޑް-19 ގެ ހާލަތު ވަނީ ގޯސްވެފައެވެ. އަދި ފައްސިވާ އަދަދުތައް ވަރަށް ބޮޑަށް އިތުރެވެ. އެޗްޕީއޭގެ އެންމެ ފަހުގެ ތަފާސް ހިސާބުތަކަށް ބަލާއިރު މިހާރު ޖުމްލަ 50 ރަށެއް ވަނީ މޮނިޓަރިން ހާލަތަށް ގެނެވިފައެވެ.
