ކޮވިޑް-19ގެ ސަބަބުން މަޖިލިސް ޖަލްސާތައް އޮންލައިކޮށް ބާއްވައިދިނުމަށް އެދިއްޖެ
ކޮވިޑް-19ގެ ސަބަބުން މަޖިލިސް ޖަލްސާތަކާއި ކޮމިޓީ ބައްދަލުވުންތައް އޮންލައިކޮށް ބާއްވައިދިނުމަށް މައްޗަންގޯޅި ދެކުނު ދާއިރާގެ މެންބަރު އަހުމަދު ހައިތަމް އެދިވަޑައިގެންފިއެވެ.
ރައްޔިތުންގެ މަޖިލިސްގެ ރައީސް، ރައީސް މުހައްމަދު ނަޝީދަށް މެންބަރު ހައިތަމް ފޮނުވި ސިޓީއެއްގައި ވިދާޅުވީ ކޮވިޑް-19 ބަލީގައި ފައްސިވާ މީހުންގެ އަދަދު ދުވަހަކަށް ވުރެއް ދުވަހެއް ވަރަށް ބޮޑުތަނުން އިތުރުވަމުންދާ ކަމަށާއި މިބަލީގައި ނިޔާވާ މީހުންގެ އަދަދު ނިސްބަތުން ވެސް އަންނަނީ އިތުރުވަމުންކަމަށެވެ.
އަދި އެޗް.ޕީ.އޭގެ އެންގުން ނަންބަރު 2021/38 ގައި ވާގޮތުގެ މަތިން ދައުލަތުގެ އޮފީސްތަކާއި އަމިއްލަ އޮފީސްތަކަށް ހާޒިރުވެގެން މަސައްކަތް ކުރުން މަޑުޖައްސާލުމުގެ ދަށުން ކޮންމެހެން ޙާޒިރުވެގެން ކުރަންޖެހޭ ކަމެއް ފިޔަވައި އެހެނިހެން ކަންކަން އޮންލައިންކޮށް ކުރިއަށް ގެންދިޔުމަށް އަންގައިފައިވާ ކަމަށެވެ.
މީގެ އިތުރުން ހައިލަމް ވިދާޅުވީ ރައްޔިތުންގެ މަޖިލިސްއަކީ 159 ސްޓާފުންނާއި 87 މަޖިލިސް މެންބަރުން އަދި އެކި ކަންކަމުގައި ބޭރުން އެކި ފަރާތްތަކުން ޙާޟިރުވެ މަސައްކަތުގެ މާޙައުލުގައި އުޅޭ ތަނެއްކަމުން ބަލަހައްޓަން ޖެހޭ މިންވަރަށް ގައިދުރުކަން ނުބެހެއްޓޭކަން ފާހަގަ ކުރާކަމަށެވެ.
ރައީސް ނަޝީދުގެ މޭސްތިރިކަމުގެ ދަށުން ދުނިޔޭގައި އެންމެ ފުރަތަމަ އޮންލައިންކޮށް މަސައްކަތް ކުރެވެން ފެށުނު މަޖިލިސް ކަމުގައި ރާއްޖޭގެ މަޖިލިސް ހިމެނިގެން ދިޔަކަން ފާހަގަކޮށް ހައިތަމް ވިދާޅުވީ މި ޙާލަތުގައި ރާއްޖެ ވާހިނދު، ކޮވިޑް ކޮންޓްރޯލް ކުރުމުގައި އޮންލައިން ކޮށް މަސައްކަތް ކުރުމަކީ މިކަން ކޮންޓްރޯލް ކުރުމަށް ވެވޭނެ އެހީއެއް ކަމުގައި ދެކޭ ކަމަށެވެ. އެހެންކަމުން މަޖިލިސްގެ ޖަލްސާތަކާއި ކޮމިޓީތައް އޮންލައިން ކޮށްދެއްވުމަށް އެދި ދަންނަވާ ކަމަށެވެ.
ރާއްޖޭގައި ކޮވިޑަށް ފައްސިވާ މީހުން ގިނަވުމާ ގުޅިގެން މީގެ ކުރިން ވަނީ މަޖިލިސް ޖަލްސާތައް އޮންލައިންކޮށް ބާއްވައިފައެވެ. ނަމަވެސް އޭގެ ފަހުން ފައްސިވާ މީހުންގެ އަދަދުތައް މަދުވުމާ ގުޅިގެން ޖަލްސާތައް މަޖިލިސް އިދާރާގައި ވަނީ ބާއްވަން ފަށައިފައެވެ.
