އަސްރާ އެދެނީ ގެވެށި އަނިޔާގެ މައްސަލަ ނުބަލަން، ނަމަވެސް ފުލުހުންގެ ތަހުގީގު ދަނީ ކުރިއަށް
ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ މެމްބަރު އަހުމަދު އީސަގެ ފަރާތުން ގެވެށި އަނިޔާ ލިބުނު ކަމަށް ތުހުމަތުކޮށްފައިވާ އޭނާގެ ކުރީގެ އަނބިކަނބަލުން އަސްރާ ނަސީމް، އެ މައްސަލަ ކުރިއަށް ނުގެންދަން އެދިފައިވާ ކަމަށް ފުލުހުން ވިދާޅުވެއްޖެއެވެ.
ފުލުހުން ވިދާޅުވީ، އަސްރާގެ ފަރާތުން އެހެން އެދިފައިވީ ނަމަވެސް އެ މައްސަލަ ކުރިއަށް ގެންދާނެ ކަމަށެވެ.
އީސަގެ ފަރާތުން ގެވެށި އަނިޔާ ލިބިފައިވާކަމުގެ މައްސަލަ އަސްރާ ހުށަހަޅައިފައި ވަނީ މިދިޔަ ހަފްތާގެ އަންގާރަ ދުވަހުގައެވެ. އަދި އެ މައްސަލައިގައި އޭނާ ވަނީ ބަޔާން ވެސް ދީފައެވެ. އަނިޔާތަކާ ގުޅިގެން އަސްރާ ވަނީ އައިޖީއެމްއެޗްއިން ފަރުވާ ވެސް ހޯދާފައި ކަމަށް މައުލޫމާތު ލިބެއެވެ.
ނަމަވެސް އެ މައްސަލަ ކުރިއަށް ގެންދަން ބޭނުން ނުވާ ކަަމަށް ބުނެ ފުލުހުންގެ އިދާރާއަށް އަސްރާ ވަނީ މިއަދުގެ ވަގުތެއްގައި ސިޓީއެއް ފޮނުވައިފައެވެ. އަދި، އެކަން ފުލުހުން ވެސް ވަނީ ޔަގީންކޮށްދީފައެވެ.
"ދެން" އަށް އެނގިފައިވާ ގޮތުގައި، މައްސަލަ އަނބުރާ ނެގުމަށް އެދި އަސްރާގެ ސިޓީއެއް ފުލުހުންނަށް މިއަދު ވަނީ ލިބިފައެވެ.ނަމަވެސް ފަށައިފައިވާ ޖިނާއީ ތަހުގީގެއް ކުރިއަށް ގެންދާނެ ކަމަށް ފުލުހުން ނިންމަވާފައިވާކަން ވެސް އެނގިފައިވެއެވެ.
ޕްރޮސެކިއުޓަރު ޖެނެރަލް (ޕީޖީ) އޮފީހުން މިއަދު އާންމުކުރި މައުލޫމާތުތަކަށް ބަލާއިރު މި މައްސަލައިގެ ތަހުގީގުގެ މައިގަނޑު މަސައްކަތްތައް ނިމި ޕީޖީ އޮފީހަށް ހުށަހެޅުމުގެ މަރުހަލާ މިހާރު ވަނީ ފެށިފައެވެ. އަދި މިއީ ދައުވާ ކުރުމާމެދު ވަރަށް އަވަހަށް ގޮތެއް ނިންމޭނެ މައްސަލައެއްކަން ވެސް އެނގިފައިވެއެވެ.
