އީސަގެ މައްޗަށް ކޮށްފައިވާ ގެވެށި އަނިޔާގެ ތުހުމަތު: ތަހުގީގު ނިމި، ދައުވާ ކުރަން ފޮނުވަނީ
ކެނދިކުޅުދޫ ދާއިރާގެ މެމްބަރު އަހުމަދު އީސަ އޭނާގެ ކުރީގެ އަނބިކަނބަލުން އަސްރާ ނަސީމަށާއި އެ ދެމީހުންގެ ދަރިކަލުންނަށް ގެވެށި އަނިޔާ ކުރި ކަމުގެ މައްސަލައިގެ ތަހުގީގު ނިންމައި، ދައުވާކުރަން ފޮނުވުމުގެ މަސައްކަތް ކުރަމުން އަންނަ ކަމަށް ފުލުހުން މިއަދު ވިދާޅުވެއްޖެއެވެ.
އީސަގެ ފަރާތުން ގެވެށި އަނިޔާ ލިބުނު ކަމަށް ބުނެ ފުލުހަށް މައްސަލަ ހުށަހެޅީ އަސްރާ އަމިއްލައަށެވެ. ނަމަވެސް ފަހުން އެ މައްސަލަ ކުރިއަށް ގެންދަން ބޭނުން ނުވާ ކަމަށް އަސްރާ ވަނީ ބުނެފައެވެ. އެހެން ނަމަވެސް ފުލުހުން ނިންމީ އެ މައްސަލައިގެ ތަހުގީގު ކުރިއަށް ގެންދާށެވެ.
ފުލުހުން އޭރު ވިދާޅުވީ، މައްސަލަ ކުރިއަށް ގެންދަން ބޭނުން ނުވެގެން ހުށަހެޅި ނަމަވެސް، ޖިނާއީ މައްސަލަތައް ތަހުގީގުކުރާއިރު، އެ މައްސަލައިގެ ތަހުގީގު ހުއްޓައިނުލައި ކުރިއަށް ގެންދާނެ ކަމަށެވެ.
އޮންލައިން ނޫހަކަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލު ވިދާޅުވީ މި މައްސަލައިގެ ތަހުގީގު މިހާރު އެއްކޮށް ނިމިފައިވާ ކަމަށާއި މައްސަލައިގައި ދައުވާ ކޮށްދިނުމަށް އެދި ޕްރޮސެކިއުޓާ ޖެނަރަލްގެ އޮފީހަށް ފޮނުވުމުގެ އެންމެ ފަހުގެ މަސައްކަތްތައް ކުރަމުން އަންނަ ކަމަށެވެ.
ގެވެށި އަނިޔާގެ މައްސަލަ ހުށަހެޅުމަށް ފަހު އެ މައްސަލަ އަނބުރާ ނަގަން އަސްރާ އެދުނީ ކީއްވެކަން އަދި އެނގިފައެއް ނުވެއެވެ.
Ads by STO
