ހިސާންގެ ކިބައިން މަޢާފަށް އެދެން ޝިޔާމަށް އަންގައިފި
ރައްޔިތުންގެ މަޖިލީހުގެ ތުޅާދޫ ދާއިރާގެ މެމްބަރު ހިސާން ހުސެއިން ދަން ޖައްސަން މީދޫ ދާއިރާގެ މެމްބަރު އަހުމަދު ޝިޔާމް މުހައްމަދު ގޮވައިލެއްވިކަމަަށް ބުނާ މައްސަލައިގައި ހިސާންގެ ކިބައިން ސިޔާމް މަޢާފަށް އެދެން އަންގަން މަޖިލީހުގެ ސުލޫކީ އަދި އިމްތިޔާޒު ކޮމެޓީއިން ނިންމަވައިފިއެވެ.
މިދިޔަ އާދިއްތަ ދުވަހު ބޭއްވި ސަލާމަތީ ހިދުމަތްތަކާ ބެހޭ ކޮމެޓީގެ ބައްދަލުވުމަށް ފަހު ސިޔާމް ވަރަށް ހުތުރުކޮށް ވާހަކަ ދެއްކެވި ކަމަށް ހިސާން ތުހުމަތު ކުރައްވާފައިވާ އިރު، އެ ދުވަހުގެ އެހެން ވަގުތެއްގައި "ހިސާނަކީ ދަންޖައްސަން ޖެހޭ މީހެއް" ކަމަށާއި "މަރާލިޔަސް ފާފަވެރި ނުވާނެ" ކަމަށް ޝިޔާމް ވިދާޅުވި ކަމަށް ބުނެ ހިސާން ވަނީ ތުހުމަތު ކުރައްވާފައެވެ.
މި މައްސަލަ މަޖިލީހުގެ އިމްތިޔާޒު ކޮމެޓީއަށާއި ފުލުހުންގެ އިތުރަށް ޑިފެންސް މިނިސްޓްރީއަށް އިއްޔެ ހުށަހަޅައިފައި ވެއެވެ.
މި ކަމާ ގުޅިގެން ބޭއްވި އިމްތިޔާޒު ކޮމިޓީގެ ބައްދަލުވުމުގައި މަނަދޫ ދާއިރާގެ މެމްބަރު އަހުމަދު ހާރޫން ހުށަހެޅުއްވީ ހިސާންގެ ކިބައިން މަޢާފަށް އެދެން ޝިޔާމްއަށް އަންގައި މަޖިލީހުން ޝިޔާމަށް ނަސޭހަތްތެރި ވުމަށެވެ. ހާރުންގެ އެ ހުށަހެޅުއްވުމަށް ގަމު ދާއިރާގެ މެމްބަރު މުހައްމަދު ވިޝާމް ތާއިދު ކުރައްވައި ދެން ތިއްބެވި މެމްބަރުންގެ ވޯޓާ އެކު އެގޮތަށް ވަނީ ފާސްކޮށްފައެވެ.
އެހެން ނަމަވެސް އެ ބައްދަލުވުމުގައި މަަޑުއްވަރީ ދާއިރާގެ މެމްބަރު އާދަމް ޝަރީފް ވިދާޅުވީ، ހިސާންގެ ކިބައިން ޝިޔާމް މަޢާފަށް އެދިވަޑައިގެން ކަމަށެވެ.
