ޓީޗަރަކު ދަރިވަރަކަށް ހަނގާ ކުރިކަމަށް ބުނާ މައްސަލައެއް: ކްލާހަށް ނުވައްދާނެ ކަމަށް ބުނެ، މަގުމަތިން ދިމާކުރި
އަތޮޅުތެރޭގެ ރަށެއްގެ ސްކޫލް ޓީޗަރަކު، އޭނާގެ ދަރިވަރަކަށް ހަނގާ ކުރިކަމަށް ބުނާ މައްސަލައެއް ފެންމަތިވެއްޖެއެވެ.
"ދެން"އަށް އެނގިފައިވާ ގޮތުގައި ހަނގާ ކުރިކަމުގެ ތުހުމަތު އުފުލިފައި ވަނީ އެ ސްކޫލްގައި އިސްލާމް އުގަންނައިދޭ ޓީޗަރެއްގެ މައްޗަށެވެ. އޭނާ ހަނގާކުރިކަމުގެ ތުހުމަތު ކޮށްފައި ވަނީ ގްރޭޑް 10ގައި ތައުލީމު ހާސިލު ކުރަމުން ދިޔަ ފިރިހެން ކުއްޖަކަށެވެ.
އެ ކުއްޖާ ކްލާހަށް ނުވެއްދި، ބޭރަށްލި، މަލާމާތްކުރި: ކުއްޖާގެ އާއިލާ
ނަން ހާމަ ނުކުރުމަށް އެދި އެ ކުއްޖާގެ ދައްތަ "ދެން"އަށް މައުލޫމާތު ދެމުން ބުނީ އެ ޓީޗަރު މިފަދައިން ކަންތައް ކޮށްފައި ވަނީ ކުއްޖާގެ އޯލެވެލް އިމްތިހާނު ވަރަށް ކައިރިވެފައި ވަނިކޮށް ކަމަށެވެ.
"ކުއްޖާ ކްލާހަށް ވަނަ ނުދީ، ކްލާހަށް ވަނީމަ ކްލާހުން ބޭރުކޮށް، ބައެއް ފަހަރު ކްލާސް ތެރޭގެ އެއް ކަނެއްގައި (ކްލާސްރޫމް ނުފެންނަހެން) ކޮޅަށް ވެސް ބެހެއްޓި. މީގެ އިތުރުން އެހެން ދަރިވަރުން ކުރިމަތީގައި ކުއްޖާ ލަދު ގަންނަވާ، މަގުމަތިން ވެސް ކުއްޖާއާ ދިމާކޮށް ސްކޫލު ތެރޭގައި ވެސް ކުއްޖާއާ ދިމާކޮށް ހެދި އަދި ބުނި ކްލާހަށް ވަދެގެން ނުވާނެ ކަމަށް. އެވަރު ނުފުދިގެން ކުއްޖާގެ ބެލެނިވެރިޔާއަށް ވެސް ގުޅާފައި ބުނި ތިމަންނަގެ ކްލާހަށް ފޮނުވައިގެން ނުވާނެއޭ ވެސް" ދަރިވަރުގެ ދައްތަ ކިޔައިދިނެވެ.
އެ ކުއްޖާގެ ދައްތަ ބުނީ ޓީޗަރު އެ ދަރިވަރަށް އެގޮތަށް ހަނގާ ކުރަނީ، މިދިޔަ ރޯދަ މަސް ތެރޭގައި އެ ޓީޗަރުގެ ސައިކަލަށް ބިސް ޖަހައިފައި ހުރެގެން ކަމަށެވެ. އެކަން ކުރީ އެ ދަރިވަރާ އިތުރު ކުދިންތަކަކާ ބައިވެރި ވެގެން ކަމަށް ޓީޗަރު ބުނި ކަމަށް ވެސް މައުލޫމާތު ދިން ފަރާތުން ބުންޏެވެ.
"އެކަމަކު އެ ކުއްޖާ އެބަ ބުނޭ ތިމަންނާއަކަށް ނުވެސް އެނގެޔޭ ޓީޗަރުގެ ސައިކަލަށް ބަޔަކު ބިސް ޖެހިކަމެއް ވެސް. މައްސަލަ ސްކޫލަށް ހުށަހަޅައިގެން، އެ މައްސަލަ ޑިސިޕްލިނަރީ މައްސަލައެއް ގޮތަށް ބަލާފައެއް ވެސް ނެތް. ރަސްމީކޮށް އެ މައްސަލަ ބެލެނިވެރިއަކަށް ވެސް ހުށަހަޅައިފައެއް ނެތް. އެކަމަކު ޓީޗަރު ކަންތައްތައް އެކުރީ ވަރަށް ޒިންމާދާރުކަން ކުޑަ ގޮތަކަށް. ސްކޫލުގެ ޓީޗަރުން ތިބޭ ވައިބާ ގްރޫޕުގައި ވެސް ކުއްޖާ ބަދުނާމުކޮށް ވާހަކަ ދައްކާ، ޕީޓީއޭ ވައިބާ ގްރޫޕުގައި ވެސް އެ ވާހަކަ ދެއްކި. ޓީޗަރު އަމިއްލައަށް ޒާތީކޮށް ޖައްސާލައިގެން އުޅުން އަޅުގަނޑުމެންނަށް ބަލައެއް ނުގަނެވޭ" ކުއްޖާގެ ދައްތަ 'ދެން'އަށް މައުލޫމާތު ހިއްސާ ކުރަމުން ބުންޏެވެ.
ސްކޫލުން އާއިލާއަށް ދިން ޖަވާބު
މައުލޫމާތު ދިން ފަރާތުން އިތުރަށް ބުނީ، ކުއްޖާގެ ބެލެނިވެރިއަކީ ވެސް އެ ސްކޫލުގެ ޓީޗަރަކަށް ވާތީ އެންމެ ފުރަތަމަ މައްސަލަ ހުށަހެޅީ ސްކޫލަށް ކަމަށެވެ. ނަމަވެސް ފުރަތަމަ ސިޓީއަށް ވެސް ތިން ހަފްތާ ވީ އިރުވެސް ޖަވާބެއް ނުލިބޭ ކަަމަށާއި އެހެންކަމުން ދެވަނަ ސިޓީއެއް ވެސް ހުށަހެޅި ކަމަށް އޭނާ ބުންޏެވެ. ނަމަވެސް އެ ސިޓީއަށް ވެސް ޖަވާބު ނުލިބުމުން، އެޑިއުކޭޝަން މިނިސްޓަރ ޓެގް ކޮށްފައި މި މައްސަލަ މީސް މީޑިއާގައި ހިއްސާ ކުރި ކަމަށް ކުއްޖާގެ ދައްތަ ބުންޏެވެ. މީސް މީޑިއާގައި ހިއްސާ ކުރުމުން، ޕްރިންސިޕަލް އެ ކުއްޖާގެ ބެލެނިވެރިޔާއަށް ގުޅި ކަމަށާއި އަދި މައްސަލަ ނުބެލި އޮތީ ކުދިންގެ އިމްތިހާނު ކުރިއަށް ދާތީ ކަމަށް ޕްރިންސިޕަލް ވިދާޅުވި ކަމަށް ވެސް ބުންޏެވެ. މީސް މީޑިއާގައި ކުރި ޕޯސްޓު ނަގަން ވެސް ޕްރިންސިޕަލް ވިދާޅުވި ކަމަށް އޭނާ ބުންޏެވެ. ނަމަވެސް އެ ޕޯސްޓު ނުނަގާނެ ކަމަށް އޭނާ ޖަވާބު ދިން ކަމަށް ވެސް ކުއްޖާގެ ދައްތަ ބުންޏެވެ.
"މި މައްސަލަ ހުށަހެޅީމަ އެނގުނީ މި ޓީޗަރާ ގުޅޭ އެތައް މައްސަލައެއް ކުރިން ވެސް ހުށަހަޅާފައި ހުރިކަން. އެހެން ދަރިވަރުންނަށް ވެސް މިގޮތަށް ހަނގާ ކުރާކަން ވެސް ހާމަވި. ސްކޫލު މެނޭޖްމަންޓުން މިދިޔަ އަހަރު ވެސް އެބައޮތް މަޝްވަރާ ކޮށްފަ މި ޓީޗަރު ގްރޭޑް 10ގެ ލީޑިންގ ޓީޗަރަކަށް ނުބަހައްޓަން. އެކަމަކު ފަހުން ނިންމާފަ އިނީ ބަހައްޓާ ގޮތަށް" ކުއްޖާގެ ދައްތަ ކިޔައިދިނެވެ.
މީގެ އިތުރުން ކުއްޖާގެ ދައްތަ ބުނީ، އިމްތިހާނާ ގާތްކޮށް މިފަދަ ކަންތައްތަކެއް ކުރުމުން ކުއްޖާއަށް ނަފްސާނީ ގޮތުން ވަރަށް އަސަރު ކޮށްފައި ހުރި ކަމަށެވެ. އަދި ކުއްޖާގެ ހިތު ތެރޭގައި ބަދަލު ހިފުމުގެ ވިސްނުމެއް އުފެދިފައިވާ ކަމަށް ވެސް ބުންޏެވެ. މިހާރު އިމްތިހާނުތައް ނިމިފައިވީ ނަމަވެސް އަދިވެސް ސްކޫލުން މިކަމާ މެދު އެއްވެސް ފިޔަވަޅެއް އަޅާފައި ނުވާކަން ވެސް މައުލޫމާތު ދިން ފަރާތުން ވަނީ ފާހަގަ ކޮށްފައެވެ.
ސައިކަލަށް ގެއްލުން ދިން ކަމަށް ކުއްޖަކު އަމިއްލައަށް އިއުތިރާފުވި، މި ކުއްޖާ ވެސް ބައިވެރިވި ކަމަށް ބުނި: ޓީޗަރު
"ދެން"އިން މި މައްސަލައާ ގުޅޭގޮތުން އެ ޓީޗަރުގެ ބަހެއް ވެސް ހޯދައިލީމެވެ. އެ ޓީޗަރު ބުނީ ނިމިދިޔަ ރަމަޟާން މަހު، އެ ޓީޗަރުގެ ސައިކަލަށް ގެއްލުންތަކެއް ދެމުންދާތީ ސައިކަލަށް ގެއްލުން ދީފައި ހުރި ފޮޓޯ ބެލެނިވެރިން ތިބޭ ވައިބާ ގްރޫޕަށްލީ ކަމަށެވެ.
" އެ ގްރޫޕަށް ފޮޓޯ ލާފައި އަޅުގަނޑު ބުނިން މިކަން ކުރާ ކުދި ބަޔަކު ހޯދާލަން ބޭނުމޭ، މިކަން ކުރާ ސަބަބު ދެނެގަންނަން ބޭނުންވެޔޭ. އެހެން ހުއްޓާ ޖެހިގެން އައި ދުވަހު ކުއްޖަކު އައިސްފައި ބުނީ ސަރއޭ ތިމަންނާއޭ ރޭގައި އެކަން ކުރީ. އަޅުގަނޑު ބުނިން އެހެންވީރު މައްސަލައެއް ނެތޭ މާފު ކޮށްފީމޭ އެއްބަސްވީތީ" ޓީޗަރު ބުންޏެވެ.
އެކަން ކުރާ އިތުރު ކުދިބަޔަކު ޓީޗަރަށް އެނގޭތޯ އެ ކުއްޖާ އެވަގުތު ސުވާލު ކުރި ކަމަށާއި ނޭނގެޔޭ ބުނުމުން، މި ކުއްޖާ ވެސް ކުރި ކަމަށް އެ ދަރިވަރު ބުނި ކަމަށް ޓީޗަރު ބުންޏެވެ.
"ދަރިވަރު އެހެން ބުނުމުން އަޅުގަނޑު އެ ކުއްޖާ މަގުމަތިން ފެނިގެން ސުވާލު ކޮށްލިން ސަރއަށް މިކަހަލަ މައުލޫމާތު ލިބިފައި އެބަވެޔޭ ތެދެއް ހެއްޔޭ. ސައިކަލަށް ގެއްލުން ދިނިން ހެއްޔޭ. އެ ދަރިވަރު ބުނި ތިމަންނަ ތިކަމެއް ނުކުރަމޭ. އަޅުގަނޑު ބުނިން ސަރ ނުބުނަމެއް ނޫންހޭ ކުރިއެކޭ މިބުނީ މިކަހަލަ މައުލޫމާތެއް ލިބިއްޖެއޭ ނޫންހޭ. ޖެހިގެން އައި ދުވަހު ގްރޭޑް 10ގެ އެހެން ދަރިވަރުންތަކެއް ވެސް އަޅުގަނޑަށް އެ މައުލޫމާތު ދިން، އެ ކުއްޖާ ވެސް ސައިކަލަށް ހަމަ ގެއްލުން ދިން ކަމަށް" ޓިޗަރު ކިޔައިދިނެވެ.
ޓީޗަރު އިތުރަށް ބުނީ އެ ކަހަލަ މައުލޫމާތުތައް ލިބުމުން ބެލެނިވެރިޔާއާ ވެސް ސުވާލު ކުރި ކަމަށެވެ. ސްކޫލުގައި ގާތްގަނޑަކަށް 25 އަހަރު ޚިދުމަތް ކޮށްދީފައިވާ އެ ޓީޗަރުގެ މުދަލަކަށް އެފަދައިން ދަރިވަރަކު ގެއްލުން ދިނުމުން ދެރަވާ ކަމަށް ބުނި ކަމަށް ވެސް ޓީޗަރު ބުންޏެވެ.
"ވޭތުވެދިޔަ 20އަކަށް އަހަރު ކިޔަވާ ވެސް ދިނީ އިސްލާމް . އަޅުގަނޑު ބުނިން ސްކޫލުގެ ލީޑިންގ ޓީޗަރެއްގެ ގޮތުގައި މަސައްކަތް ކުރުމުގެ އިތުރުން ހުރިހާ ދަރިވަރުން ވެސް ރަނގަޅު ނަތީޖާ ނެރޭތޯ ވެސް މަސައްކަތް ކޮށްދެމުން ދާ ކަމަށް ވެސް ބުނިން. އަޅުގަނޑު ބުނިން އެފަދަ އެއްވެސް ޝަކުވާއެއް ވެސް މިވީހާ އަހަރު ތަކުގައި ވެސް އައިސްފައި ނުވާނެ ކަމަށް" ޓީޗަރު ބުންޏެވެ.
އެ ޓީޗަރު އިތުރަށް ބުނީ އެފަދައިން ދަރިވަރާއި ބެލެނިވެރިންނާ ސުވާލު ކުރުމުން، އެގޮތަށް މަގުމަތިން ސުވާލު ނުކުރެވޭނެ ކަމަށް ބުނެ ބެލެނިވެރިން ސްކޫލަށް މައްސަލައެއް ހުށަހެޅި ކަމަށެވެ. ހެއްކާ އެކު ހުށަހަޅަން ސްކޫލުން އެދުމުން، މައުލޫމާތުތައް ދިން ދަރިވަރުންގެ ނަންތައް ހުށަހެޅިކަމަށް ވެސް ޓީޗަރު ބުންޏެވެ. އަދި ކަން ހިނގައި ދިޔަ ގޮތް ސްކޫލަށް ހުށަހަޅަން އެދުމުން އެކަން ވެސް ވަރަށް ތަފްސީލުކޮށް ހުށަހަޅާފައި ވާނެ ކަމަށް ވެސް އިސްލާމް ޓީޗަރު ބުންޏެވެ.
އެއްވެސް ގޮތަކަށް އެއްވެސް އިރަކު ހަނގާއެއް ނުކުރަން، އެއީ ހަގީގަތާ ޚިލާފު ވާހަކަތަކެއް: ޓީޗަރު
ދަރިވަރު ކްލާހަށް ނުވެއްދި ކަމަށާއި ދަރިވަރަށް ހަނގާ ކުރި ކަމަށް ބުނެ ދެކެވޭ ވާހަކަތައް ޓީޗަރު ދޮގު ކުރިއެވެ.
"ހަމަ ބަރާބަރަށް ދަރިވަރު ކްލާހުގައި ވެސް ބައިވެރިވި. ދަރިވަރު އަމިއްލައަށް ކަނަކަށް ދަނީ ވެސް. ކޮޅަކަށް ނުބަހައްޓަން، މަލާމާތެއް ވެސް ނުކުރަން. ދަރިވަރުގެ ފޮޓޯ ނެގިކަމަށް ވެސް ބުނި، އެކަމަކު އަޅުގަނޑު ފޮޓޯއެއް ވެސް ނުނަގަން. ދަރިވަރަކީ އާންމުކޮށް ހުރިހާ ކްލާސް ގަޑިތަކެއްގައި ވެސް ގޮނޑި ހިފައިގެން އެއްކައިިރިއަކަށް ދާ ކުއްޖެއް." ޓީޗަރު ބުންޏެވެ.
ޓީޗަރު އިތުރަށް ބުނީ، އެ ދަރިވަރަކީ މޮޅު ދަރިވަރެއް ކަމަށާއި އާންމުކޮށް އިސްލާމުން ވެސް 70 އާ 80 އާއި ދެމެދުން މާކްސް ހޯދާ ކަމަށެވެ. ދަރިވަރު އަމިއްލައަށް ކްލާހުގައި އެކަހެރިވި ކަމުގައި ވެސް އެއްވެސް ފިޔަވަޅެއް ވެސް އަޅައިފައި ނުވާނެ ކަމަށް ވެސް ޓީޗަރު ބުންޏެވެ.
ކައުންސިލުގެ ބަހާއި ޓީޗަރާމެދު ދެކޭ ގޮތް
މިކަމާ ގުޅޭގޮތުން އެ ރަށު ކައުންސިލުން ވިދާޅުވީ، ބެލެނިވެރިއަކު ހުށަހަޅާފައިވާ މިފަދަ މައްސަލައެއް އެޑިއުކޭޝަން މިނިސްޓްރީއާ ގުޅިގެން ބަލަމުން ދާ ކަމަށް އެ ސްކޫލުން މައުލޫމާތު ދީފައިވާ ކަމަށެވެ.
މީގެއިތުރުން އެ ރަށު ކައުންސިލުން ވިދާޅުވީ އެ ޓީޗަރަކީ އެތައް އަހަރަކު ސްކޫލަށް ޚިދުމަތް ކޮށްދީފައިވާ ޓީޗަރެއް ކަމަށާއި ދަރިވަރުންގެ ފަރާތުން ރަނގަޅު ނަތީޖާ ނެރެން މަސައްކަތްކޮށް ރަނގަޅު ނަތީޖާ ނެރެދޭ ހީވާގި ޓީޗަރެއް ކަމަށެވެ.
ރާއްޖޭގެ ކިޔަވާ ކުދިންގެ އަޚްލާގީ ފެންވަރު ދައްވުމުގެ އަސްލަކީ ކިޔަވާ ދަރިވަރުން ސަރުކާރުން ހައްދުފަހަނައަޅާ ދާވަރަށް ހިމާޔަަތް ދިނުން