ހިކަނދި ފަތް: ކެއްކުމުގެ އިތުރުން އެތައް ކަމަކު ބޭނުން ކުރެވޭ ފަތެއް!
ކައްކާ އިރު ހިކަނދިފަތަކީ ދިވެހިންގެ ތެރޭގައި މަގުބޫލު އެއްޗެކެވެ. ގިނަ ރަށްތަކުގައި ހިކަނދިފަތް ގަސްތައް ފުނިޖެހިފައި ހުރެއެވެ. ރިހަ ނޫނީ ލޮނު ބާވަތުގެ އެއްޗެހި ތައްޔާރު ކުރާއިރު ހިކަނދިފަތް އާންމުކޮށް ބޭނުން ކުރެއެވެ. ނަމަވެސް ކާއިރު އަހަރެމެންގެ ތެރެއިން ގިނަ މީހުންގެ ތަށިގެ އެއް ފަރާތެއްގައި ހޮވާ އެއްކޮށްފައި ބެހެއްޓުމަށް ފަހު އުކާލާ އެކައްޗަކީ ހިކަނދިފަތެވެ.
ހިކަނދިފަތަކީ އޭގެ ޒާތުގައި އަހަރެމެންގެ ހަށިގަނޑަށް އެތައް ފައިދާއެއް ލިއްބައިދޭ މާއްދާތަކެއް އެކުލެވިގެންވާ އެއްޗެކެވެ. އެގޮތުން ހިކަނދިފަތަކީ ބޭރަށް ހިންގުން ހުއްޓުވައިދީ ހަށިގަނޑުގެ ކޮލެސްޓްރޯލާއި ހަކުރު ދަށްކޮށްދިނުމަށް އެހީތެރިވެދޭ އެއްޗެކެވެ. މީގެ އިތުރުން ވެސް ހިކަނދިފަތުން ލިބޭ އެތައް ފައިދާއެއް ވެއެވެ.
- އެންޓިއޮކްސިޑެންޓްސް ގިނަ އަދަދަކަށް އެކުލެވޭ
ހިކަނދިފަތުގައި އެކުލެވޭ ވިޓަމިން އޭ، ވިޓަމިން ބީ، ވިޓަމިން ސީ، އަދި ވިޓަމިން އީގެ ސަބަބުން ހަށިގަނޑަށް ގިނަ އަދަދަކަށް އެންޓިއޮކްސިޑެންޓްސް ލިއްބައިދެއެވެ. މީގެ ސަބަބުން ހަށިގަނޑަށް ގެއްލުންދޭ އޮކްސިޑައިޒިންގް އޭޖެންޓްސްއާ މި ބާވަތް ހަނގުރާމަ ކުރެއެވެ. އަދި ހިކަނދިފަތަކީ ބެކްޓީރިއަލް އަދި ފަންގަލް އިންފެކްޝަންތަކާ ހަނގުރާމަކުރަން ވެސް އެހީވެދޭ އެއްޗެކެވެ.
- ބޭރަށްހިންގުން ހުއްޓުވައިދޭ
ދިރާސާތަކުން ދައްކާގޮތުން ހިކަނދިފަތުގައި އެކުލެވޭ މާއްދާއެއްގެ ސަބަބުން ހިކަނދިފަތް ކެއުމުން ބޭރަށް ހިންގުމުން ދުރުކޮށްދެއެވެ. އެގޮތުން ބޭރަށް ހިންގާނަމަ ހިކަނދިފަތުން ޕޭސްޓެއް ހަދައިގެން ނުވަތަ ޖޫސް ގިރައިގެން ބޭނުން ކުރާށެވެ.
- ހަކުރާއި ކޮލެސްޓްރޯލް ދަށްކޮށްދޭ
ދިރާސާތައް ދައްކާ ގޮތުން ހިކަނދިފަތަކީ ނުރައްކާތެރި އެލްޑީއެލް ކޮލެސްޓްރޯލް ދަށްކުރުމަށް އެހީވެދޭ ބާވަތެކެވެ. އަދި ގިނައިން ހިކަނދިފަތް ބޭނުންކުރުމަކީ ހަކުރުބަލި ކޮންޓްރޯލް ކުރުމަށް ވަރަށް ބޮޑަށް އެހީވެދޭ ކަމެއް ކަމަށް ވެސް ދިރާސާތަކުން ދައްކައެވެ.
- ކެންސަރާ ހަނގުރާމަ ކުރަން ބޮޑު އެހީއެއް ވެދޭ
ހިކަނދިފަތުގައި އެކުލެވޭ ކެމިކަލް މާއްދާތަކުގެ ސަބަބުން ލުކީމިއާ އަދި ޕްރޮސްޓްރޭޓް ކެންސަރު ފަދަ ކެންސަރުތަކާ ހަނގުރާމަކުރަން އެހީވެދެއެވެ.
- އިސްތަށިގަނޑު ރީތިކޮށް ދިގުވުމަށް އެހީވެދޭ
ހިކަނދިފަތުގެ ސަބަބުން އިސްތަށިގަނޑު ވަރުގަދަވެއެވެ. އަދި ހިކަނދިފަތަކީ ބޮލުގަ ނުރަ ޖެހުން ވެސް ދުރުކޮށްދީ އިސްތަށިގަނޑު ދިގުވުމަށް އެހީވެދޭ އެއްޗެއް ކަމަށްވެއެވެ. ހަފްތާއެކު އެއްފަހަރު ހިކަނދިފަތުން ޕޭސްޓެއް ތައްޔާރު ކުރުމަށްފަހު ތެލާއެކީ އިސްތަށިގަނޑުގެ ބުޑުގައި ހާކާ މަސާޖްކޮށްލާށެވެ.
- ލޮލަުގެ ފަރުވާ
ހިކަނދިފަތަކީ ގިނަ އަދަދަކަށް ވިޓަމިން އޭ އެކުލެވޭ އެއްޗެކެވެ. ވިޓަމިން އޭ ގައި އެކުލެވޭ ކެރޮޓެނޮއިޑްގެ ސަބަބުން ލޮލުގެ ފެނުން ރަނގަޅުކޮށްދެއެވެ. ވިޓަމިން އޭ މަދުވެއްޖެނަމަ ލޮލުގެ ފެނުން ފުސްވެ، އެކިކަހަލަ މައްސަލަތައް ދިމާވެއެވެ.
- ހަންގަނޑުގެ ފަރުވާ
ހިކަނދިފަތުން ޕޭސްޓެއް ހަދާފައި ހަންގަނޑުގައި އަނދައިފައި، ނުވަތަ ހަލާކުވެފައި ހުންނަ ތަންތަނުގައި އުނގުޅުމުން އަވަހަށް ފަސޭހަވެއެވެ.
ހިކަނދިފަތުގެ އިތުރުން ހިކަނދިފަތް ގަހުގެ އެކި ބައިތަކަކީވެސް ވަރަށް ބޭނުންތެރި ބައިތަކެކެވެ. އެގޮތުން ހިކަނދިފަތް ގަހުގެ މޫތަކަކީ ގައިގެ ރިހުމަށް ފަރުވާއަކަށް ބޭނުން ކުރެވޭ އެއްޗެކެވެ. އަދި މިގަހުގެ ތޮށިގަނޑަކީ ހަރުފަ ދަތްއަޅާފައިވާ ތަންތަނަށް ފަރުވާ ކުރަން ބޭނުންކުރާ އެއްޗެކެވެ.
