13 އަހަރުގެ ކުއްޖާގެ މަރުގެ ޚަބަރުތައް ގެނެސްދިން ގޮތުން މީޑިއާއަށް ފިޔަވަޅު އަޅައިފި

އުމުރުން 13 އަހަރުގެ ކުއްޖަކު ރަހީނުކޮށް، ރަހުމު ކުޑަ ގޮތަކަަށް މަރައިލައި އެއްލައިލި ހާދިސާގެ ޚަބަރާއި ރިޕޯޓުތައް ގެނެސްދިން ގޮތުން، އޮންލައިން ނޫސް "އަވަސް" ޖޫރިމަނާކޮށް އިތުރު ތިން މީޑިއާއަކަށް ނަސޭހަތް ދީފިއެވެ.

Ads by STELCO

ޖެންޑާ މިނިސްޓްރީން "އަވަސް" ޖޫރިމަނާ ކޮށްފައި ވަނީ 2000 ރުފިޔާއިންނެވެ.

މި ހާދިސާ ރިޕޯޓުކޮށްފައިވާ ގޮތާ ގުޅިގެން އެ މިނިސްޓްރީން ނަސޭހަތް ދީފައި ވަނީ ވަގުތު" ނޫހަށާއި، "އަދަދު" އަދި "ވަން އޮންލައިން" އަށެވެ.

13 އަހަރުގެ ކުއްޖާ މަރުވުމުގެ ހާދިސާ ބައެއް މީޑިއާތަކުން ރިޕޯޓު ކޮށްފައި ވަނީ އެ ކުއްޖާގެ ފޮޓޯ ޖަހައި، ކުއްޖާގެ ވަނަވަރާއި މަރައިލައިފައި އޮތް އިރު އޮތް ގޮތް ވެސް ހާމަވާ ގޮތަށެވެ.

މީޑިއާއަކަށް ޖެންޑާ މިނިސްޓްރީން ފޮނުވި ސިޓީގައި ވަނީ، ކުޑަކުއްޖެއްގެ ކަރާމާތަށް އުނިކަން އަންނަ ގޮތަކަށް ސޯޝަލް މީޑިއާގައި މައުލޫމާތު އާންމު ކުރާ ނަމަ، ކަމުގެ ކުޑަ ބޮޑުމިނަށް ބަލައި ފިޔަވަޅު އެޅުމުގެ ބާރު ކުޑަކުދިންގެ ހައްގުތައް ރައްކާތެރި ކުރުމުގެ ގާނޫނުގެ ދަށުން އެ މިނިސްޓްރީއަށް ލިބިގެންވާ ކަމަށެވެ.

އެ ސިޓީގައި އިތުރަށް ބުނެފައި ވަނީ ކުޑަކުދިންގެ ކަރާމާތަށް އުނިކަން އަންނަ ގޮތަށް އެ ކުދިންގެ މައުލޫމާތު އާންމު ކުރުމަކީ ކުޑަކުދިންގެ ހައްގުތައް ރައްކާތެރި ކުރުމުގެ ގާނޫނުގެ 33 ވަނަ މާއްދާގެ ދަށުން މަނާ ކަމެއް ކަމަށެވެ.