ކޮވިޑް ޖެހުމުން ކުޑަކުދިންނަށް ޖެހޭ ނުރައްކާތެރި ބަލި ފ އަތޮޅާއި މާލޭގައި!
ކޮވިޑް-19 ޖެހުމުގެ ސަބަބުން ކުޑަކުދިންނަށް ޖެހޭ ނުރައްކާތެރި ބައްޔެއް ކަމަށްވާ މިސްކް މާލެއިންނާއި ފ. އަތޮޅުން ފެނިފައިވާ ކަމަށް ކުޑަކުދިންގެ ހާއްސަ ޑޮކްޓަރު އަހުމަދު ފައިސަލް ވިދާޅުވެއްޖެއެވެ.
ޑރ ފައިސަލް ކުރައްވާފައިވާ ޓުވީޓެއްގައި ވިދާޅުވެފައި ވަނީ މި ބައްޔަކީ އުމުރުން 3 އަހަރާއި 10 އަހަރާ ދެމެދުގެ ކުޑަކުދިންނަށް ޖެހޭ ނުރައްކާތެރި ބައްޔެއް ކަމަށެވެ. އަދި ކޮވިޑް ޖެހިފައިވާ މުއްދަތުގައި ވެސް މި ބަލި ޖެހޭ ކަމަށް އެ ޓުވީޓުގައި ވިދާޅުވެއްޖެއެވެ.
ޑރ ފައިސަލް ވިދާޅުވީ، މި ބައްޔަކީ ގައިގަޔަށް އަރާ ބައްޔެއް ނޫން ކަމަށާއި އެހެން ނަމަވެސް މި ބަލި ޖެހެނީ ކޮވިޑްގެ ސަބަބުން ކަމަށް ވާތީ ބަލި ކޮންޓްރޯލް ކުރެވޭނީ، ކޮވިޑް ވެސް ކޮންޓްރޯލް ކުރެވިގެން ކަމަށެވެ. އަދި ކޮވިޑްގެ ޑެލްޓާ ވޭރިއަންޓާ އެކު ކޮވިޑު ޖެހޭ އަދަދު ފަހަކަށް އައިސް ގިނަވީމާ މިސްކު ޖެހޭ އަދަދު ގިނަވާނެ ކަމަށް ވެސް ޑރ. ފާހަގަކުރެއްވިއެވެ.
މި ބަލީގައި ގަދައަށް ހުން އަންނާނެކަން ފާހަގަ ކުރައްވައި ޑރ ފައިސަލް ވިދާޅުވީ، އަލާމަތްތައް ފެނުނުހާ އަވަހަށް ލަސްނުކޮށް ޑޮކްޓަރަށް ދެއްކުމަށެވެ.
Ads by STO
