ފޮރިން ސާވިސް ބިލުގެ ނަން އަބްދުﷲ ޝާހިދަށް ނިސްބަތް ކުރުމަށް ހުށައަޅައިފި
ރާއްޖޭގެ ހާރިޖީ ސިޔާސަތު ހަރުދަނާ ކުރަން ދިވެހި ރާއްޖޭގެ ފޮރިން ސާވިސްގެ ނަމުގައި ހެންވޭރު ދެކުނު ދާއިރާގެ މެމްބަރު ހުސެއިން ޝަހީމް (އަނދުން ހުސެއިން)ހުށަހެޅި ބިލުގެ ނަން މިހާރުގެ ފޮރިން މިނިސްޓަރު އަބްދުﷲ ޝާހިދަށް ނިސްބަތްކޮށް އޭނާގެ ނަން ހިމަނަން، ތިމަރަފުށީ ދާއިރާގެ މެމްބަރު އަބްދުﷲ ރިޔާޒް ހުށަހަޅުއްވައިފިއެވެ.
ދިވެހި ރާއްޖޭގެ ފޮރިން ސާވިސްގެ ބިލަށް މިއަދު މަޖިލީހުގައި ކުރި ބަހުސްގައި ވާހަކަ ދައްކަވަމުން އަބްދުﷲ ރިޔާޒު ވިދާޅުވީ މިބިލަކީ ދިވެހި ޤައުމުގެ އެންމެ މަތީ މަސްލަހަތު ހިމާޔަތް ކުރާ ފަރާތްތަކަށް ހާއްސަ ކުރެވިގެންދާ ބިލެއް ކަމަށާއި ދިވެހި ޤައުމުގެ ދިފާއުގައި ދިވެހި ސިފައިން މަސައްކަތް ކުރައްވާ ފަދައިން، ޤައުމުން ބޭރުގައި ތިއްބަވައިގެން ރާއްޖެއަށް އެކި އެހީތައް ހޯއްދެވުމުގައާއި، އެނޫން ވެސް ގިނަ މަސައްކަތްތަކެއް ކުރައްވާ ބޭފުޅުންނަކީ ރާޢްޖޭގެ ފޮރިން ދާއިރާގެ ބޭފުޅުން ކަމަށެވެ.
އދ. ގެ އާންމު މަޖިލީހުގެ ރައީސް ކަމަށް ޝާހިދު އިންތިހާބުވެ ވަޑައިގެންނެވި ޝަރަފުވެރި މިދަނޑިވަޅުގައި ފޮރިން ސާވިސްގެ މިބިލު ހުށައެޅުއްވުމުން މި ބިލްގައި ޝާހިދުގެ ނަން ހިމަނަން އެދޭ ކަމަށް ރިޔާޒް ވިދާޅުވިއެވެ. އަދި ކޮވިޑްގެ މި ނުރައްކާތެރި ބަލިމަޑު ކަމުގެ ތެރޭގައިވެސް އެންމެ ބުރަ އަދި އެންމެ ބޭނުންތެރި މަސައްކަތް ޤައުމަށް ކޮށްދެއްވި އެއްބަޔަކީ ފޮރިން ދާއިރާގައި މަސައްކަތް ކުރައްވާ ބޭފުޅުން ކަމަށާއި އެބޭފުޅުންގެ ޚިދުމަތަކީ މިއަދު ވެސް މިގައުމަށް ނުހަނު ބޭނުންތެރި ހިދުމަތަކަށްވާ އިރު އެމަސައްކަތުގައި އިސްކޮށް ހުންނެވި މިނިސްޓަރ ޝާހިދަކީ މި ކަމަށް އަރާ ހުންނެވި ގާބިލް ބޭފުޅެއްކަމަށް ރިޔާޒު ވިދާޅުވިއެވެ.
އދ.ގެ އާންމު މަޖިލީހުގެ 76 ވަނަ މަޖިލީހުގެ ރައީސްކަމާ ޝާހިދު ހަވާލުވެވަޑައިގަންނަވާނީ މި އަހަރުގެ ސެޕްޓެމްބަރު މަހުގެ ތެރޭގައެވެ. ޝާހިދު މަގާމު ކަށަވަރު ކުރެއްވީ 191 ވޯޓުގެ ތެރެއިން 143 ވޯޓު ކާމިޔާބު ކުރައްވައިގެންނެވެ. މިނިސްޓަރ ޝާހިދު ވަނީ ރާއްޖެއަށް އދ.ގެ އާންމު މަޖިލީހުގެ ރައީސްކަމުގެ ގޮނޑި ކަށަވަރުކޮށްދިނުމަށް މަސައްކަތްކުރި އެކުވެރި ގައުމުތަކަށް ޝުކުރު އަދާކުރައްވައިފައެވެ.
އދގެ އާންމު މަޖިލީހުގެ 76 ވަނަ ދައުރާ ކުރިމަތިލާއިރު ބޮޑެތި މައްސަލަތަކާއި ގޮންޖެހުންތައް އެބަހުރި ކަމަށް ވިދާޅުވެ ޝާހިދު ވިދާޅުވީ، މިދިޔަ އަހަރަކީ ބަލިމަޑުކަމާއި، ނުތަނަވަސްކަމާއި، އުއްމީދު ގެއްލިފައިވާ އަހަރެއް ކަމަށާއި ހަމަހަމަކަން ގެއްލި ބޭއިންސާފާއި ހަމަނުޖެހުން އިތުރުވެފައިވާ ކަމަށާއި ވަށައިގެންވާ ތިމާވެއްޓާއި، ކަނޑާއި، ދުނިޔެއަށް ތަފާތު ގެއްލުންތައް ކުރިމަތިވަމުންދާ ކަމަށެވެ.
Ads by STO
