ރައީސް ނަޝީދަށް ދިން ހަމަލާގައި 4 މީހަކަށް ދައުވާ ކުރަން ޕީޖީއަށް!
ނިމިދިޔަ މެއި މަހުގެ ހަވަނަ ދުވަހު ރައީސް ނަޝީދަށް އަމާޒުކޮށް ދިން ބޮމުގެ ހަމަލައިގައި ހަތަރު މީހެއްގެ މައްޗަށް ދައުވާ ކުރުމަށް ޕްރޮސިކިއުޓަރ ޖެނެރަލް (ޕީޖީ) އޮފީހަށް ފޮނުވަން ނިންމައިފައިވާ ކަމަށް ރައީސުލް ޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވަހަކަ ދައްކަވަމުން ރައީސް އިބްރާހިމް މުހައްމަދު ޞާލިހު ވިދާޅުވީ، ފުލުހުންގެ ފަރާތުން މިހާތަނަށް ލިބުނު މައުލޫމާތަށް ބަލާއިރު، އަށް މީހަކު ތަހުގީގަށް ފާހަގަ ކުރެވިފައިވާ ކަމަށާއި، އިރުރު ހަތަރު މީހެއްގެ މައްޗަށް ދައުވާ ކުރުމަށް ޕީޖީ އޮފީހަށް ފޮނުވުމަށް ނިންމައިފައިވާ ކަމަށެވެ.
މި ހަތަރު މީހުންގެ ތަހުގީގު މިހާރު ނިމިފައިވާ ކަމަށް ރައީސް ވިދާޅުވިއެވެ. އެހެންނަމަވެސް މި ހަތަރު މީހުންނަކީ ކޮން ބައެއް ކަމެއް ރައީސް ހާމަ ކުރައްވާފައެއް ނުވެއެވެ.
މި ހަމަލާއާ ގުޅިގެން މިހާތަނަށް ފުލުހުން ހައްޔަރު ކޮށްފައިވަނީ، ވ. ތިނަދޫ، ހިޔާ، އަދުހަމް އަހުމަދު ރަޝީދާއި މއ. ފޭރުގޭ މުޖާޒް އަހުމަދާއި ގއ. ކޮނޑޭ، ފޮޅޭމާ ތަހުމީން އަހުމަދު އަދި ލ. ގަން ދުންފިނިއުފާ އަހްމަދު ފާތިހެވެ.
މި ހަތަރު މީހުންގެ ތެރެއިން ވެސް އަދުހަމްއަކީ ރައީސް ނަޝީދަށް ހަމަލާ ދިނުމުގައި އަމަލީ ގޮތުން ބައިވެރިވި މީހާއެވެ.
މީގެ އިތުރުން ސެކިއުރިޓީ ފޯސަސްއާ ބެހޭ ގޮތުން ތައްޔާރު ކުރާ އިންޓެލިޖެންސް އޮޑިޓް ނިމުމަކާ ގާތްވެފައިވާ ކަމަށާއި، ތަހުގީގީ މަރުހަލާގެ ފުރިހަމަ އަދާހަމަތައް އެ މަނިކުފާނަށް ވަގުތުން ވަގުތަށް ލިބިވަޑައިގަންނަވާ ކަމަށް ރައީސް ވިދާޅުވިއެވެ.
Ads by STO
