ކުރީގެ ނޫޓުތަކަށް ޖުލައި 29އާ ހަމަޔަށް ބަދަލު ދެވޭނެ: އެމްއެމްއޭ
މި ފެށޭ ޖުލައި މަހުގެ 29އާ ހަމައަށް، ކުރީގެ ނޫޓުތަކަށް ބަދަލު ދެވޭނެ ކަމަށް މޯލްޑިވްސް މޮނިޓަރީ އޮތޯރިޓީ (އެމްއެމްއޭ)އިން ވިދާޅުވެއްޖެއެވެ.
އެކެއް އޯގަސްޓު 2016އިން ފެށިގެން ލީގަލް ޓެންޑަރ ނޫން ކަމުގައި އެމްއެމްއޭއިން ކަނޑައަޅުއްވައިފައިވާ 2، 10، 20، 50، 100 އަދި 500 ރުފިޔާގެ ކަރުދާސް ނޫޓަށް އަދި 1 ޖަނަވަރީ 2018 އިން ފެށިގެން ލީގަލްޓެންޑަރ ނޫން ކަމުގައި ކަނޑައަޅުއްވާފައިވާ 5 ރުފިޔާގެ ކަރުދާސް ނޫޓަށް ބަދަލުދެވޭނެ އެންމެ ފަހު ތާރިހަކީ 29 ޖުލައި 2021 ކަމުގައި އެ އޮތޯރިޓީން މިއަދު ވަނީ ވިދާޅުވެފައެވެ.
ކުރީގެ ނޫޓުތަކަށް ބަދަލު ދެވޭނެ އެންމެ ފަހު ތާރީޚު ކަމުގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ކަނޑައެޅުއްވީ 31 ޖުލައި 2021އެވެ. ނަމަވެސް އެ ދުވަހަކީ ރަސްމީ ބަންދު ދުވަހަކަށްވުމާ އެކު، އެމްއެމްއޭއިން ވަނީ ކުރީގެ ނޫޓްތަކަށް ބަދަލު ދެވޭނެ އެންމެ ފަހު ތާރީޚަކީ 29 ޖުލައި 2021 ކަމަށް ނިންމައި، އެ މުއްދަތުގެ ކުރިން ނޫޓްތަކަށް ބަދަލު ހޯދައި ނިންމުމަށް އިލްތިމާސް ކޮށްފައެވެ.
ރައީސުލް ޖުމްހޫރިއްޔާގެ ނަންބަރު 2016/6 އަދި 2017/7 ގަރާރުން ލީގަލްޓެންޑަރ ނޫން ކަމުގައި ކަނޑައަޅައިފައިވާ ކަރުދާސް ނޫޓަށް ބަދަލު ދިނުން އޮންނަނީ ގާނޫނު ނަންބަރު 6781 (މޯލްޑިވްސް މަނިޓަރީ އޮތޯރިޓީގެ ގާނޫނު) ގެ 18 ވަނަ މާއްދާގައިވާ ގޮތުގެ މަތިންނެވެ.
ކުރީގެ ކަރުދާސް ނޫޓުތައް ބޭނުންކުރުން ހުއްޓައިލައިފައި ވަނީ ކުރީގެ ރައީސް ޔާމީން ޢަބްދުލްޤައްޔޫމްގެ ސަރުކާރުގައި "ރަންދިހަ ފަހެއް" ނޫޓް ސީރީޒް ބޭނުންކުރަން ފެށުމާ ގުޅިގެންނެވެ. ރަންދިހަ ފަހެއް ނޫޓް ސީރީޒް ބޭނުންކުރަން ފަށައިފައި ވަނީ 26 ޖަނަވަރީ 2016 ގައެވެ.
