ވެހިކަލު ގަރާޖުތައް ކައުންސިލަށް ހަވާލުކުރީ އެންގުމެއް ނެތި: މޭޔަރު މުއިއްޒު
ވެހިކަލް ރަޖިސްޓްރީކުރުމަށް ބޭނުންވާ ގަރާޖު ހުއްދަ ދޫކުރުމުގެ މަސައްކަތް މާލެ ސިޓީ ކައުންސިލްގެ ދަށަށް ބަދަލުކުރަން ނިންމައި، ޓްރާންސްޕޯޓް މިނިސްޓްރީން ބަޔާނެއް ނެރުއްވީ ކައުންސިލަށް ނާންގައި ކަމަށް މާލޭ ސިޓީގެ މޭޔަރު ޑރ. މުހައްމަދު މުއިއްޒު މިރޭ ވިދާޅުވެއްޖެއެވެ.
މާލެ ސިޓީ ކައުންސިލުން މިރޭ ބޭއްވި ނޫސްވެރިންގެ ބައްދަލުވުމެއްގައި މޭޔަރު މުއިއްޒު ވިދާޅުވީ ސަރުކާރުން ހަވާލު ކުރާ ކޮންމެ މަސައްކަތެއް ކުރުމަށް ވެސް ކައުންސިލުން އޮތީ ތައްޔާރަށް ކަމަށެވެ.
"މާލެ ސިޓީގެ ރައްޔިތުންނަށް ހިދުމަތް ކުރުމުގައި ކުރަންޖެހޭ ކޮންމެ މަސައްކަތެއް ކުރުމަށް މި ތިބީ ތައްޔާރަށް. އެހެން ނަމަވެސް މި ދެންނެވި މައްސަލައިގައި އަޅުގަނޑުމެންނަށް ދިމާވާ ދަތިކަމަކީ އަޅުގަނޑުމެންނަށް އެނގުމެއް ނެތި، މިކަން އިއުލާނު ކުރެވިފައިވުން" ޑރ. މުއިއްޒު ވިދާޅުވިއެވެ.
މީގެ އިތުރުން ޑރ. މުއިއްޒު ވިދާޅުވީ ކައުންސިލުން އެންމެ ފަހުން މިނިސްޓްރީއާއި ކުރި މުއާމަލާތަކީ ރައްޔިތުން އެއް ކަމެއްގައި ދެ މުއައްސަސާއަކަށް ދިއުމަށް ކައުންސިލުން ނޭދޭ ކަމަށް ބުނެ ފޮނުވި ސިޓީއެއް ކަމަށެވެ. އެގޮތުން ވެހިކަލް ރަޖިސްޓްރީ ކުރުމަށް ބޭނުންވާ ގަރާޖުގެ ހުއްދަ ދޫކުރުމަށް ދެ މުއައްސަސާއަށް ދާން ޖެހޭ ޖެހުމަށް ނިމުމެއް ގެނައުމަށް، މިކަމާ ގުޅުން ހުރި ހުރިހާ މަސައްކަތެއް ކޮންމެވެސް އެއް މުއައްސަސާއެއްގެ ދަށަށް ބަދަލު ކުރަން އެ ސިޓީގައި އެދިފައިވާނެ ކަމަށް ވެސް ޑރ. މުއިއްޒު ވިދާޅުވިއެވެ.
