ސިނޮފާމް ވެކްސިނުން ރައްކާތެރިކަން ފޯރުކޮށްދެނީ 6 މަސް ދުވަހަށް، އިތުރު ޑޯޒަކުން އެހީތެރިވޭ!
ކޯވިޑް-19އަށް ޗައިނާއިން އުފައްދާފައިވާ ސިނޮފާމު ވެކްސިނުން ރައްކާތެރިކަން ފޯރުކޮށްދެނީ 6 މަސް ދުވަހަށް ކަމަށް ޗައިނާގެ ރިިސާޗްތަކުން ރިޕޯޓްކޮށްފިއެވެ.
މިކަން ދެނެގަތުމަށް ޗައިނާއިން ކުރި ރިސާޗްގައި ވަނީ ވެކްސިންގެ ދެވަނަ ޑޯޒް ޖެހި އުމުރުން 18-59 އަހަރާ ދެމެދުގެ މީހުންގެ ލޭ ނަގައި ޓެސްޓު ކޮށްފައެވެ. ޓެސްޓުތަކުން އެނގުނު ގޮތުގައި ސިނޯފާމް ވެކްސިނުން ކޮވިޑް-19އަށް ރައްކާތެރިކަން ފޯރުކޮށްދެނީ 6 މަސް ދުވަހެވެ. އަދި އޭގެ ފަހުން އިތުރު ބޫސްޓަރއެއް ޖަހަން ޖެހެއެވެ.
ވެކްސިންގެ ދެ ޑޯޒް ފުރިހަމަކުރި ނަމަވެސް ހަށިގަނޑުގެ އެނޓިބޮޑީސް ދަށް ކަަމަށް ، މިހައިތަނަށް ނެގުނު ލޭގެ ޓެސްޓުތަކުން ފާހަގަވެފައިވާކަމަށް ރިޕޯޓުތަކުން ބުނެއެވެ. މިކަމާ ގުޅޭ އިތުރު ތަހުގީގުތައް މިހާރު ކުރިޔަށްދާއިރު ތައިލެންޑާއި އިންޑިނޭޝިއާގައި މިހާރު ސިނޯފާމް ވެކްސިންގެ ދެ ޑޯޒް ފުރިހަމަ ކުރި މީހުންނަށް ތިންވަނަ ވެކްސިން ދޭން ވެސް ވަނީ ނިންމައިފައެވެ. އަދި ތުރުކީގައި މިހާރު 3 ވަނަ ވެކްސިން ޖަހަން ފަށައިފި ކަމަށް ރިޕޯޓުތަކުން ބުނެއެވެ.
ސިނޯފާމު އުފެއްދި ބެއިޖިންގް ޕުރޮޑަކްޓުސް އިންސްޓިޓިއުޓުން ބުނީ ކޯވިޑް-19އާ ދެކޮޅަށް އެ ވެކްސިނުގެ ކާމިޔާބީގެ ނިޞްބަތަކީ 79 އިންސައްތަކަމަށެވެ. އެ ވެކްސިން އުފެއްދި "ބެއިޖިންގް އިންސްޓިޓިއުޓް އޮފް ބައޮލޮޖިކަލް ޕްރޮޑަކްޓްސް" އަކީ ބޭހާއި ވެކްސިންއާއި އެ ނޫން ވެސް ސިއްހަތާ ބެހޭ ދާއިރާގެ ގިނަ އުފެއްދުންތަކެއް އުފައްދާ ކުންފުންޏެކެވެ. ރާއްޖޭގައި ބޭނުންކުރާ ވެކްސިންތަކުގެ ތެރޭގައި ސިނޯފާމް ވެކްސިން ހިމެނެއެވެ.
