ދައުލަތުގެ އެންމެ މަތީ މަގާމު އަދާ ކުރައްވައިފައިވާ ބޭފުޅަކު އެއްބާރުލުން ނުދެއްވީތީ ހިތާމަ ކުރަން: މަރު ކޮމިޝަން
ގެއްލުވައިލައިފައިވާ ނޫސްވެރިޔާ އަހްމަދު ރިލްވާންގެ މައްސަލައިގައި ސުވާލުކުރުމަށް ކުރީގެ ރައީސް އަބްދުﷲ ޔާމީން މިއަދު މަރު ކޮމިޝަނަށް ހާޒިރުކުރުމުން އެ މަނިކުފާނު ހުންނެނީ ހަނުކަމަށް އެ ކޮމިޝަނުން ވިދާޅުވެއްޖެއެވެ.
ރިޔާސީ ކޮމިޝަންގެ މެންބަރު މިސްބާހް އައްބާސް "ދެން"އަށް މައުލޫމާތު ދެއްވަމުން ވިދާޅުވީ ރައީސް ޔާމީން ރިޔާސީ ކޮމިޝަނަށް ހާޒިރު ކޮށްފައި ވަނީ އެމަނިކުފާނުގެ މައްޗަށް ކޮށްފައިވާ ތުހުމަތާ ގުޅިގެން މައުލޫމާތު ސާފުކޮށް އޮޅުން ފިލުވަން ޖެހޭ މުހިންމު ކަންތައްތަކެއް ހުރުމުން ކަމަށެވެ.
"ރިލްވާންގެ އާއިލާއާއި އެހެނިހެން އާއިލާތަކުން ވެސް، ދިވެހި ރައްޔިތުން ވެސް ބޭނުން ވާނެ ގޮތަކީ ރިޔާސީ ކޮމިޝަނުން ރައީސް ޔާމީނުގެ މައްޗަށް ކޮށްފައިވާ ތުހުމަތަށް އެމަނިކުފާނު ފުރިހަމައަށް ޖަވާބުދާރީ ވެވަޑައިގެންނެވުން. ނަމަވެސް ތަކުރާރުކޮށް އަޅުގަނޑުމެން އެ ފުރުސަތު އެރުވުމުން ވެސް، ދައުލަތުގެ އެންމެ މަތީ މަގާމު އަދާ ކުރައްވައިފައިވާ ބޭފުޅަކު އެއްބާރުލުން ނުދެއްވާ ހަނު ހުންނަވައިފައި ވާތީ ކޮމިޝަނުން ހިތާމަ ކުރަން" މިސްބާހް ވިދާޅުވިއެވެ.
އެނގިފައިވާ ގޮތުގައި ރައީސް ޔާމީން މިއަދު އެ ކޮމިޝަނަށް ވަޑައިގަތީ ފަސް ވަކީލުންނާ އެކުގައެވެ. އެކަމަކު ކޮމިޝަންގެ ބައެއް ކަންކަމާއި ހިތްހަމަ ނުޖެހިގެން ރައީސް ޔާމީންގެ އަރިހުގައި އެންމެ ވަކީލަކު މަޑުކުރެއްވުމަށް ފަހު އެހެން ވަކީލުން ތަހުގީގު ދޫކޮށް ވަޑައިގަތް ކަމަަށް ވެސް މައުލޫމާތު ލިބެއެވެ. ތަހުގީގުތަކުގައި ހަނު ހުރުމަކީ އާންމުކޮށް ލިބިފައިވާ ޙައްޤެކެވެ.
ގެއްލުވައިލައިފައިވާ މީހުންނާ ގޮތް ނޭނގޭ މަރުތަކުގެ ޙަޤީޤަތް ހޯދައި ހާމަ ކުރުމަކީ މި ސަރުކާރުގެ ރިޔާސީ ވައުދެކެވެ. އެ ކަމަށް އުފެއްދި ކޮމިޝަނުން ވެރިކަމުގެ ކުރީކޮޅުގައި އެދެވޭ މަސައްކަތްތަކެއް ކުރެއްވި ނަމަވެސް އެ ކޮމިޝަންގެ މަސައްކަތް މަޑު ޖެހިފައިވާ ކަމަށް ބުނެ ގިނަ ބަޔަކު ދަނީ ފާޑު ކިޔަމުންނެވެ. އެ ކޮމިޝަނުން ވަނީ އަފްރާޝީމްގެ މަރާ ގުޅޭ ގޮތުން މީގެ ކުރީން ރިޕޯޓެއް ނެރެފައެވެ. އަފްރާޝީމްގެ މަރާއި ރައީސް ޔާމީނާއި ގުޅުވައި 2018ގެ ކެމްޕެއިންގައި އޭރުގެ އިދިކޮޅުން ވާހަކަ ދެއްކެވި ނަމަވެސް އެ ރިޕޯޓް އާންމު ކުރައްވަމުން ކޮމިޝަންގެ އޭރުގެ ރައީސް ޙުސްނުއްސުޢޫދު ވިދާޅުވީ ރައީސް ޔާމީނާއި އަފްރާޝީމްގެ މަރާ އެއްވެސް ގުޅުމެއް ނެތް ކަމަށެވެ.
