ތުލުސްދޫ ކަސްޓަމްސް އޮފީސް ބަންދުކޮށްފި
މާލޭ ކޮމާޝަލް ހާބަރު އަދި ވެލާނާ އިންޓަރނޭޝަނަލް އެއަރޕޯޓްގައި ދެމުންދާ ޚިދުމަތްތައް ވަރަށް ބޮޑަށް ފުޅާވެ ތަރައްޤީ ކުރެވިފައިވުމާ އެކު، މާލެއާއި ކައިރި ސަރަހައްދުތަކުގައި މަސައްކަތް ކުރަމުންދާ، މުދާ އެކްސްޕޯރޓްކުރާ ފަރާތްތަކުން ރަސްމީ ބަނދަރުތަކުން ޚިދުމަތް ހޯދުން އިތުރުވުމުގެ ސަބަބުން މާލެ އަތޮޅު ތުލުސްދޫގައި ގާއިމް ކޮށްފައިވާ ކަސްޓަމްސް އޮފީސް ބަންދުކޮށްފިއެވެ.
މިކަން އިއުލާނުކޮށް މިރޭ ކަސްޓަމްސްއިން އާއްމު ކުރި ނޫސްބަޔާނެއްގައި ވިދާޅުވީ ތުލުސްދޫގައި ގާއިމުކޮށްފައިވާ ކަސްޓަމްސް އޮފީސް މި އޯގަސްޓުމަހުގެ 15 ވަނަ ދުވަހުންފެށިގެން ބަންދުކޮށްފައިވާ ކަމަށެވެ.
އެބަޔާނުގައި ކަސްޓަމްސްއިން ވިދާޅުވީ ތުލުސްދޫގައި ކަސްޓަމްސްގެ ޚިދުމަތް ޤާއިމް ކުރެވިފައިވަނީ، ތުލުސްދޫގައި ހިކި ކަނޑުމަސް ރައްކާކުރުމާއި ބަންދުކޮށް ރާއްޖެއިން ބޭރުކުރުމުގެ މަސައްކަތް ފުޅާދާއިރާއެއްގައި ގިނަ ފަރާތްތަކުން ކުރަމުންދިއުމާ ގުޅިގެން މަސް އެކްސްޕޯރޓް ކުރާ ފަރާތްތަކަށް ކަސްޓަމްސްގެ ޚިދުމަތް ލުއިފަސޭހަކޮށް ފޯރުކޮށްދިނުމަށް ކަމަށެވެ.
"ނަމަވެސް ވޭތުވެދިޔަ 7 އަހަރުގެ ތެރޭގައި ގާއިމްކުރެވިފައިވާ ކަސްޓަމްސް އޮފީހުން، މުދާ އެކްސްޕޯރޓް ކުރާ ފަރާތްތަކުން އެއްގޮތަކަށްވެސް ޚިދުމަތް ނުހޯއްދަވައެވެ. އެހެންކަމުން އެރަށުގައި ގާއިމްކުރެވިފައިވާ ކަސްޓަމްސް އޮފީހުގެ އޮޕަރޭޝަންތައް ފާއިތުވި އަހަރުތަކުގައި ވަނީ އެއްކޮށް ހުއްޓިފައެވެ." ކަސްޓަމްގެ ބަޔާނުގައި ވިދާޅުވިއެވެ.
މީގެ އިތުރުން އެކްސްޕޯރޓް ކްލިއަރަންސް މަރުހަލާގައި ހަރަކާތްތެރިވާ އެހެނިހެން ، ކަމާ ގުޅޭ ރަސްމީ އިދާރާތައް ވެސް މިހާރު ތުލުސްދޫގައި ޤާއިމްވެ ޚިދުމަތް ދިނުމުގެ ބަދަލުގައި ރަސްމީ ބަނދަރުތަކަށް ބަދަލުވެފައިވާކަން ފާހަގަކުރާކަމަށް ވެސް މިބަޔާނުގައި ވަނީ ބުނެފައެވެ.
މީގެ އިތުރުން ތުލުސްދޫ ކަސްޓަމްސް އޮފީސް ބަންދު ކުރުމަށް ނިންމައިފައި ވަނީ ކަމާގުޅޭ ފަރާތްތަކާ މަޝްވަރާ ކުރުމަށް ފަހު އެފަރާތްތަކުގެ ލަފާގެމަތިން ކަމަށް ވެސް ކަސްޓަމްސްއިން ވިދާޅުވިއެވެ.
ސަރުކާރަށް ބުރަބޮޑުކުރަން މުސާރަދީފަ ތުލުސްދޫ ކަސްޓަމްސް އޮފީސްގައި ސްޓާފުންބެއިތިއްބުމުގެ ބޭނުމެއްނެތް