ތަރައްޤީ ހާސިލްވާނީ ވެރިކަން ލިބުމުން މަސައްކަތް ކޮށްގެން، ނަންބޯޑު ބަދަލުކޮށްގެންނެއް ނޫން: ސައީދު
ގައުމީ ތަރައްގީ ހާސިލްވާނީ ވެރިކަން ލިބުމުން މަސައްކަތްކޮށްގެން ކަމަށާއި ނަން ބޯޑު ބަދަލުކޮށްގެން ނޫންކަމަށް ވިދާޅުވެ އިދިކޮޅު ޕީއެންސީގެ ނައިބު ރައީސް މުހައްމަދު ސައީދު ސަރުކާރަން ފާޑުވިދާޅުވެއްޖެއެވެ.
ސައީދު ވިދާޅުވީ ރައީސް ޔާމީން އެންމެ 5 އަހަރުން ހުޅުމާލެ 2ގެ ގޮތުގައި މުޅިން އައު ސިޓީއެއް ހެދިކަމަށާއި ގައުމު ތަރައްގީ ހާސިލްވާނީ ވެރިކަން ލިބުމުން މަސައްކަތެއް ކޮށްގެން ކަމަށެވެ.
"ރައީސް ޔާމީންގެ އެންމެ ފަސް އަހަރު. ހުޅުމާލެ2 ގެ ގޮތުގައި 255 ހެކްޓަރުގެ ބިން ހިއްކައި ވަށާ ތޮށިލާ، މަގު ހަދާ މުޅިން އާ ސިޓީއެއް! ގައުމީ ތަރައްގީ ހާސިލުވާނީ ވެރިކަން ލިބުމުން މަސައްކަތެއް ކޮށްގެން. ނަން ބޯޑު ބަދަލުކޮށްގެނެއް ނޫން. ކަމެއް ފައްޓަވާފައި ނަން ދެއްވާ" ސައީދުގެ ޓްވީޓްގައި ވިދާޅުވިއެވެ.
ނަންބޯޑު ބަދަލު ކުރައްވާފައިވާ ކަމަށް ސައީދު އިޝާރާތްކޮށްފައިވާ ވަނީ ރައީސް ޔާމީންގެ ސަރުކާރުން ފެއްޓެވި ބޯހިޔާވަހިކަމުގެ މަޝްރޫޢެއް ކަމަށްވާ "ވިނަރެސް"އަށެވެ. އެއީ 10 ޓަވަރުގެ ޖުމަލް 1344 ފްލެޓެވެ.
ވިނަރެސް ފްލެޓްތަކުގައި ހަތަރު ބާވަތެއްގެ އެޕާޓްމެންޓު ހުރެއެވެ. އެއީ މެރީނާ ވިއު، އިނާ ވިއު، އައުޓާ ވިއު އަދި ސްޓޭންޑާޑް ވިއު އެޕާޓްމެންޓުތަކެވެ. އޭގެ ތެރެއިން ސްޓޭންޑާޑް ވިއު އެޕާޓްމެންޓުގައި ހުންނާނީ 883 އަކަފޫޓެވެ. ނަމަވެސް ބާކީ ތިން ބާވަތުގެ އެޕާޓްމެންޓުގައި 902 އަކަފޫޓު ހުރެއެވެ.
